1Yehovha a byela Muxe, a ku: 2“Loko munhu a dyohile, a endle leswi nga faneriki emahlweni ka Yehovha, hi ku hembela warikwavo ehenhla ka xilo lexi vekiweke emavokweni ya yena, hambi lexi lombiweke, hambi lexi yiviweke, hambiloko a yivile xilo eka warikwavo; 3kumbe loko a rholele xilo lexi lahlekeke, kutani a hlambanya hi mavunwa exilweni lexo tano, lexi dyohisaka munhu; 4kutakuloko a dyohile sweswo, kutani a tivula, u ta tlherisa xilo lexi a xi yiveke, hambi xi ri xilo lexi nga vekiwa eka yena, hambi xi ri xilo lexi lahlekeke, lexi a nga xi kuma, 5hambi xi ri xihi ni xihi lexi a nga hlambanya hi mavunwa ehenhla ka xona; u ta swi tlherisa hinkwaswo, a engetela hi vuntlhanu bya swona, a swi nyika n'wini wa swona siku leri a nga ta phahla mhamba ya yena ya ku riha. 6U ta yisa eka muprista mhamba ya yena ya ku rihela Yehovha, ri nga khuna leri nga riki na xivati, leri hlawuriweke entlhambini, leri u ri ringaniseke. 7Muprista u ta n'wi phahlela mhamba emahlweni ka Yehovha, kutani u ta rivaleriwa, hambi nandzu wa yena wu nga va wihi ni wihi.”
Ta milawu leyi kombisaka mitirho ya vaprista ni ku averiwa ka vona etimhambeni.
8Yehovha a byela Muxe, a ku: 9“Lerisa Aroni ni vana va yena, u ku eka vona: ‘Hi wona nawu wa holokosta: Holokosta yi ta va exitikweni xa alitari vusiku hinkwabyo, byi ko byi xa, ndzilo wu ri karhi wu pfurha. 10Muprista u ta ambala hembe ya ntsembyana, ni buruku ra ntsembyana, kutani u ta susa nkuma wa ndzilo lowu nga hisa mhamba ealitarini, a wu veka etlhelweni ra alitari. 11U ta susa tinguvu ta yena, a ambala tin'wana, hi kona a nga ta yisa nkuma ehandle ka mixaxa, exivandleni lexi tengeke. 12Ndzilo wu ta pfurha ealitarini, wu nga timeki. Hi masiku hinkwawo nimixo, muprista u ta hlanganyeta tihunyi, a lunghisa gandzelo ehenhla ka tona, a hisa mafurha ya mihlengo ya ku khensa. 13Ndzilo wu ta pfurha hi masiku hinkwawo ealitarini, wu nga tshuki wu timeka.
14“ ‘Hi wona nawu wa nhlengo: Vana va Aroni va ta wu tisa emahlweni ka Yehovha, emahlweni ka alitari. 15Kutani va ta hunguta xandla xa mapa layo saseka ya nyiko, ni mafurha ya yona, ni mirhi ya risuna hinkwayo leyi engetelaka gandzelo kutani va ta swi hisa ealitarini swi va xitsundzuxo xa risuna lero nun'hwela eka Yehovha. 16Leswi nga ta sala, xi ta dyiwa hi Aroni ni vana va yena; va ta swi dya ni xinkwa lexo kala comela exivandleni lexo kwetsima, exivaveni xa tabernakela ya nhlengeletano. 17Va nga tshuki va swi sweka hi comela. Hi kona ku averiwa loku ndzi va nyikeke emagandzelweni ya mina lama hisiwaka hi ndzilo. I xilo lexi kwetsimaka ngopfu kukotisa gandzelo ra xidyoho, ni gandzelo ra ku riha. 18Vana hinkwavo va xinuna va Aroni va ta xi dya. I ku averiwa loku nga heriki etinxakeni ta n'wina, emagandzelweni lama hiseriwaka Yehovha. Un'wana ni un'wana la nga ta khumba xona, a ta va la hlawulekeke.’ ”
19Yehovha a byela Muxe, a ku: 20“Hi wona nhlengo wa Aroni ni vana va yena, lowu va nga ta wu humesela Yehovha siku va nga ta cheriwa hi mafurha enhlokweni: ku avanyisa ka vukhume bya efa ya mapa yo saseka, ri ta va gandzelo leri nga heriki; va ta humesa hafu nimixo ni hafu nimadyambu. 21Ma ta katingiwa exirhengeleni hi mafurha, u ta ma tisa ma katingiwile ma phemiwile, ri va risuna eka Yehovha. 22N'wana wa yena la nga ta vekiwa muprista ematshan'weni ya yena, u ta humesa nhlengo wolowo. I ku lerisa loku nga heriki ka Yehovha, nhlengo wolowo wu ta hisiwa hinkwawo. 23Mihlengo hinkwayo ya vaprista, yi ta hisiwa hinkwayo, yi nga tshuki yi dyiwa.”
24Yehovha a engeta, a byela Muxe, a ku: 25“Byela Aroni ni vana va yena, u ku eka vona: ‘Hi wona nawu wa gandzelo ra nandzu. Exivandleni lexi va tlhavaka timhamba leti hisiwaka, hi kona ku nga ta tlhaviwa mhamba ya nandzu emahlweni ka Yehovha. I xilo lexi kwetsimaka ngopfu. 26Muprista la nga ta yi humesa, u ta yi dya; yi ta dyiwa exivandleni lexo kwetsima, exivaveni xa tabernakela ya nhlengeletano. 27Un'wana ni un'wana la nga ta khumba nyama ya yona u ta va la hlawulekeke, kutani kutakuloko ngati ya yona yi phyandlukela engubyeni, u ta yi hlantswa exivandleni lexo kwetsima. 28Mbita ya vumba leyi va swekeke ha yona, yi ta fayiwa; loko vi swekiwile embiteni ya koporo, yi ta basisiwa, yi hlantswiwa kambe ematini. 29Muprista un'wana ni un'wana wa wanuna u ta dya mhamba yoleyo; i xilo lexi kwetsimaka ngopfu. 30Kambe ku nga tshuki ku dyiwa mhamba ya nandzu, hambi yi ri yin'we, leyi va nga yisa ngati ya yona etabernakeleni ya nhlengeletano ku endla mhamba evukwetsimelweni; yona yi ta hisiwa endzilweni.
