LEVHITIKA 25

₁Yehovha a byela Muxe entshaveni ya Sinayi, a ku: ₂“Byela vana va Israele, u ku eka vona: ‘Kutakuloko mi fikile etikweni leri ndzi mi nyikaka rona, misava yi ta wisa; ku ta va ni Savata eka Yehovha. ₃Hi malembe ya ntlhanu na rin'we, u ta byala ensin'wini ya wena, kutani hi malembe ya ntlhanu na rin'we, u ta tshena vhinya ya wena, u tshovela mihandzu ya yona. ₄Kambe lembe ra ntlhanu na mambirhi, ri ta va ra Savata, ku nga ku wisa ka misava ni Savata ra Yehovha; u nga tshuki u byala nchumu ensin'wini ya wena, hambi ku ri ku tshena vhinya ya wena. ₅U nga tshuki u tshovela ntuka, ni ku kha mihandzu ya vhinya ya wena leyi nga tsheniwangiki; i lembe ra ku wisa ka misava. ₆Kambe mihandzu ya misava hi lembe ra ku wisa ka yona, swi ta va swakudya swa n'wina swi ri swa wena ni swa nandza wa wena hambi a ri wanuna, hambi a ri wansati, ni swa mutirhi wa wena, ni swa muluveri wa wena, va ri lava akeke na n'wina; ₇hambi swa swifuwo swa wena, ni swa swiharhi leswi nga etikweni ra wena. Mihandzu hinkwayo ya rona swi ta va swakudya.

₈“ ‘U ta hlaya mavhiki ya ntlhanu na mambirhi ya malembe, hileswaku malembe ya ntlhanu na mambirhi lama hlayiwaka kantlhanu ni kambirhi, kutani mavhiki ya ntlhanu na mambirhi lawa ya malembe ma ta endla malembe ya 49. ₉Kutani hi n'hweti ya ntlhanu na timbirhi, hi siku ra khume ra n'hweti, u ta ririsa nanga etikweni hinkwaro ra n'wina. ₁₀Mi ta hlawula lembe ra ntlhanu wa makume, mi va mi huwelela ku tshunxeka ka vaaki hinkwavo va tiko. Ri ta va ka n'wina lembe ra ku tsaka, ra Jubili; un'wana ni un'wana wa n'wina u ta tlhelela endzhakeni ya yena, kambe un'wana ni un'wana u ta tlhelela eka rikwavo.

₁₁“ ‘Lembe ra ntlhanu wa makume ri ta va eka n'wina lembe ra ku tsaka: mi nga tshuki mi byala nchumu, hambi ku ri ku tshovela mavele ya lembe leri, ni ku kha mihandzu leyi nga timilela ntsena. ₁₂Hikuva i Jubili; ri ta va leri hlawuriweke eka n'wina; mi ta dya mihandzu ya masimu.

₁₃“ ‘Hi lembe leri ra Jubili, un'wana ni un'wana u ta tlhelela endzhakeni ya yena. ₁₄Kungakuloko mi xavisa xilo eka warikwenu, hambiloko mi xava xilo xa warikwenu, ku nga tshuki ku va ni ku dyelelana. ₁₅U ta xavelana ni warikwenu hi ku hlaya malembe ku suka eka Jubili; na yena u ta xaviselana na wena hi ku hlaya malembe ya ku tshovela. ₁₆U ta engetela nxavo hi ku tala ka malembe, kambe u ta hunguta nxavo hi vutsongo bya nhlayo wa malembe, hikuva wa ku xavisela ku tshovela. ₁₇Ku nga tshuki ku va ni un'we la dyelelaka warikwavo; kambe u chava Xikwembu xa wena; hikuva hi mina Yehovha Xikwembu xa n'wina.

₁₈“ ‘Mi ta hlayisa milawu ya mina, mi yingisa ku lerisa ka mina, mi endla hakona; kutani mi ta aka etikweni, mi nga chavi nchumu. ₁₉Misava yi ta humesa mihandzu ya yona, mi dya mi ko mi xurha, kutani mi ta aka eka yona mi nga chavi nchumu. ₂₀Loko mi ku: “Hi ta dya yini hi lembe ra ntlhanu na mambirhi, hikuva leswi hi nga tiki byala, hi nga ka hi nga tshoveri nchumu?” ₂₁Ndzi ta katekisa ngopfu lembe ra ntlhanu na rin'we, ri va ri mi nyika swakudya leswi ringanaka malembe manharhu; ₂₂hi lembe ra ntlhanu na manharhu mi ta byala, kambe mi ta dya leswi tshoveriweke khale, ku ko ku fika lembe ra ntlhanu na mune, mi ta dya mavele ya khale ku ko ku fika ku tshovela ka rona.

₂₃“ ‘Masimu ma nga tshuki ma xavisiwa hilaha ku nga heriki, hikuva misava i ya mina; hikuva mi valuveri ni vaendzi eka mina.

₂₄“ ‘Etikweni hinkwaro leri mi nga ta ri fuwa, mi ta pfumelela n'wini wa nsimu ku yi kutsula. ₂₅Kungakuloko makwenu a pfumala, kutani a xavisa ximpin'wana xa nsimu ya yena, mulamuleri wa yena la nga ekusuhi na yena hi vuxaka, u ta kutsula lexi xavisiweke hi makwavo. ₂₆Kambe loko munhu a nga ri na mukutsuri, kutani loko a swi kota ku tilavela lexi ringanaka nxavo, ₂₇u ta hlaya malembe lama hundzeke ku suka eku xaviseni ka yena, kutani u ta tlherisela muxavi mali leyi ringanaka, kutani u ta tlhelela endzhakeni ya yena. ₂₈Kungakuloko a nga kumi leswi ringanaka nxavo, xilo lexi xavisiweke xi ta sala emavokweni ya muxavi ku ko ku fika lembe ra Jubili; xi ta tshunxiwa hi Jubili, kutani muxavisi u ta tlhelela endzhakeni ya yena.

₂₉“ ‘Kungakuloko munhu a xavisa yindlu leyi nga emutini lowu nga ni rirhangu ra maribye, u ta kota ku yi kutsula hi lembe leri a nga yi xavisa ha rona. Matimba ya yena ya ku yi kutsula, i ya lembe rin'we. ₃₀Loko lembe hinkwaro ri hela yi nga si xaviwa, yindlu leyi nga emutini lowu nga ni rirhangu, yi ta salela muxavi ni vana va yena hi masiku; yi nga ka yi nga kutsuriwi hi Jubili. ₃₁Tindlu ta miti leyi nga biyiwangiki hi rirhangu, ti fanisiwa ni masimu, ti nga kutsuriwa hi masiku, kambe ti ta tshunxiwa hi Jubili.

₃₂“ ‘Loko yi ri miti ya Valevhi, ni tindlu ta miti leyi nga ta va ya vona, matimba ya nxavo ma ta tshama eka Valevhi hi masiku. ₃₃Kungakuloko un'wana wa Valevhi u xavile yindlu leyi xavisiweke emutini wa yena, yi ta tshunxiwa hi Jubili; hikuva tindlu ta miti ya Valevhi, i rifuwo ra vona exikarhi ka vana va Israele. ₃₄Masimu lama rhendzelaka miti ya vona, ma nga ka ma nga xavisiwi, hikuva i rifuwo ra vona hi, masiku.

₃₅“ ‘Kungakuloko makwenu la nga ekusuhi na wena a pfumala, ni loko voko ra yena ri rhurhumela entirhweni, u ta n'wi amukela, hambi a ri muluveri, hambi muendzi leswaku a tshama eka wena. ₃₆U nga ka u nga bindzuli ha yena ni ku n'wi dyelela; kambe u ta chava Xikwembu xa wena, kutani makwenu u ta tshama eka wena. ₃₇U nga tshuki u n'wi lomba mali ya wena hi bindzu, hambi ku ri ku n'wi nyika swakudya swa wena hi ku n'wi dyelela. ₃₈Hi mina Yehovha, Xikwembu xa n'wina, la mi humeseke etikweni ra Egipta, ku mi nyika tiko ra Kanana, ni ku va Xikwembu xa n'wina.

₃₉“ ‘Kungakuloko makwenu la nga ekusuhi na wena a pfumala, kutani a tixavisa eka wena, u nga ka u nga n'wi tirhisi kukotisa khumbi; ₄₀u ta tshama eka wena, a fana ni mutirhi, ni nandza; u ta ku tirhela ku ko ku fika lembe ra Jubili. ₄₁Kutani u ta huma ka wena, yena ni vana va yena, a tshunxiwile; u ta tlhelela eka varikwavo, ni endzhakeni ya vatata wa yena. ₄₂Hikuva i malandza ya mina, lawa ndzi ma humeseke etikweni ra Egipta; ma nga ka ma nga xavisiwi kukotisa leswi va xavisaka khumbi. ₄₃U nga tshuki u n'wi fuma hi matimba; u ta chava Xikwembu xa wena. ₄₄Lava fuyiwaka, va xinuna ni va xisati, lava mi nga ta va fuwa, va ta huma ematikweni lawa mi xaxameleke na wona; mi ta xava eka vona makhumbi ya xinuna ni ya xisati. ₄₅Mi ta tiva ku xava makhumbi ni xikarhi ka vana va valuveri lava tshameke eka n'wina, ni xikarhi ka mindyangu ya vona leyi nga na n'wina, va ri vana lava nga ta velekiwa etikweni ra n'wina, va ta va vafuyiwa va n'wina. ₄₆Mi ta va siyela vana va n'wina endzhaku ka n'wina, ri va rifuwo ra vona leswaku va va fuwa; mi va tirhisa hi masiku; kambe loko va ri vamakwenu vana va Israele, mi nga tshuki mi va fuma hi matimba.

₄₇“ ‘Kungakuloko muluveri la akeke eka wena a va a fuwile, kambe makwenu la nga ekusuhi na yena a pfumala, kutani a tixavisa eka muluveri la akeke eka wena, hambi ka munhu wa yindlu ya muluveri; ₄₈kutakuloko a tixavisile, a nga kutsuriwa; un'wana wa vamakwavo u ta tiva ku n'wi kutsula. ₄₉Tata wa yena u ta tiva ku n'wi kutsula, hambi n'wana wa tata wa yena, hambi un'wana wa varikwavo wa ngati ya yena, u ta tiva ku n'wi kutsula; kumbe loko a swi kota, u ta tikutsula a ri yena. ₅₀U ta ringanisiwa hi muxavi wa yena ku suka lembe leri a tixaviseke ha rona, ku fika lembe ra Jubili; nxavo wu ta ringanisiwa hi nhlayo ya malembe; u ta va eka yena kukotisa la rhambiweke. ₅₁Loko ku sele malembe layo tala, u ta humesa leswi ringanaka malembe lawa, swi ri karhi swi ringanisiwa hi mali ya nxavo lowu a xaviweke ha wona. ₅₂Kungakuloko malembe lama seleke ma nga talanga ku fikela lembe ra Jubili, u ta popelana na yena, kutani u ta humesa mali ya nkutsulo wa yena hi ku ringanisa ntsengo wa malembe. ₅₃U ta tshama eka yena kukotisa mutirhi la tibohaka hi lembe; kutani n'wini wa yena a nga tshuki a n'wi tirhisa hi matimba emahlweni ka wena. ₅₄Loko a nga kutsuriwi hi mukhuva wolowo, u ta huma elembeni ra Jubili, yena ni vana va yena. ₅₅Hikuva vana va Israele, i malandza ya mina; i malandza ya mina lawa ndzi ma humeseke etikweni ra Egipta: hi mina Yehovha, Xikwembu xa n'wina.