Ta ku dyiwa ka tinyama ta magandzelo.
1Yehovha a byela Muxe, a ku: 2“Byela Aroni ni vana va yena leswaku va tivonela loko va ri karhi va dya swilo leswi hlawuriweke swa vana va Israele, ni leswaku va nga tshuki va endla swahava vito ra mina leri kwetsimaka, eswilweni leswi va ndzi hlawulelaka swona: hi mina Yehovha. 3U ku eka vona: ‘Munhu un'wana ni un'wana wa rixaka ra n'wina, ni wa vatukulu va n'wina la nga ta tshinelela swilo leswi hlawuriweke, leswi vana va Israele va swi hlawuleleke Yehovha, loko a ri la nga tengangiki, munhu loyi, u ta susiwa emahlweni ka mina: hi mina Yehovha.
4“ ‘Munhu un'wana ni un'wana wa rixaka ra Aroni, la nga ni nhlokonho, kumbe la nga ni ndzundzwana, a nga tshuki a dya swilo leswi hlawuriweke a nga si tenga. 5Swi tano ni la khumbeke munhu la yirisiweke hi ntsumbu, ni loyi ku humeke eka yena mbewu ya mbeleko, 6kumbe la khumbeke xikokovi lexi n'wi yiriseke, hambiloko a khumbile la n'wi yiriseke hi thyaka rihi ni rihi; u ta va la nga tengangiki ku fika nimadyambu: a nga tshuki a dya swilo leswi hlawuriweke, kambe u ta hlamba ematini, 7kambe loko dyambu ri perile u ta tenga; kutani u ta dya swilo leswi hlawuriweke, hikuva i swakudya swa yena.
8“ ‘A nga tshuki a dya nyama ya swiharhi leswi feke, hambiloko yi handzuriwile leswaku a nga tiyirisi ha swona: hi mina Yehovha.
9“ ‘Va ta hlayisa milawu ya mina, leswaku va nga tirhwexi nandzu etimhakeni leti, va nga tshuki va fa hikwalaho ka ku onha ka vona: hi mina Yehovha loyi a va kwetsimisaka.
10“ ‘Muluveri, hambi a ri un'we, a nga tshuki a dya swilo leswi hlawuriweke, la tshamaka eka muprista, ni la rhambiweke hi yena, va nga tshuki va dya swilo leswi hlawuriweke. 11Kambe munhu la xaviweke hi muprista hi mali, u ta dya swona, hambi a ri la tswariweke endlwini ya yena vona va ta dya swakudya swa yena.
12“ ‘N'wana wa muprista la tekiweke hi muluveri, a nga ka a nga dyi leswi pamburiweke eka swilo leswi hlawuriweke; 13kambe n'wana wa muprista la nga noni, hambi a ri la tshikiweke a nga ri na vana, la tlheleleke endlwini ya tata wa yena a tshama kona kukotisa evuntshweni bya yena, u ta dya swakudya swa tata wa yena; kambe muluveri a nga ka a nga dyi swona.
14“ ‘Loko munhu a dya hi ku hoxa xilo lexi hlawuriweke, u ta tlherisela muprista mali ya xona, a engetela hi vuntlhanu bya mali leyi. 15Va nga tshuki va endla swahava hi swilo leswi hlawuriweke swa vana va Israele, leswi va swi pambulelaka Yehovha; 16va nga tshuki va va rhwexa nandzu lowu ngi va wu endlile hi ku dya swilo swa vona leswi hlawuriweke; hikuva hi mina Yehovha la va hlawulaka.’ ”
17Yehovha a byela Muxe, a ku: 18“Byela Aroni ni vana va yena, ni vana hinkwavo va Israele, u ku eka vona: ‘Mani na mani wa yindlu ya Israele, hambi wa valuveri va Israele, la humeselaka Yehovha holokosta ku tiyisa rito leri a nga ri vula eka Yehovha, hambi yi ri nyiko yihi ni yihi, hi ku tirhandzela ka yena, 19loko a rhandza ku amukeriwa, u ta teka xifuwo xa xinuna hambi ku ri exikarhi ka tihomu, hambi exikarhi ka tinyimpfu kumbe timbuti, swi nga ri na xivati. 20Mi nga tshuki mi humesa lexi nga ni xivati, hikuva gandzelo leri, a ri nga ta amukeriwa. 21Kungakuloko munhu a humesela Yehovha gandzelo ra ku khensa ra xifuwo lexikulu kumbe ra lexitsongo, ku tiyisa ku vula ka yena eka Yehovha, hambiloko yi ri nyiko ya ku rhandza ka yena, u ta humesa xifuwo lexi nga riki na xivati, leswaku xi ta amukeriwa; xi nga ka xi nga vi na xivati. 22Mi nga tshuki mi humesela Yehovha xifuwo lexi feke mahlo, hambi xa vulema, hambi lexi tsheniweke, hambi lexi nga ni xilondza, hambi mungundzu, hambiloko swi ri ni ntshansi; mi nga tshuki mi endla ha xona mhamba leyi hiseriwaka Yehovha ealitarini. 23Loko u ri ni homu hambi xinyimpfana lexi nga ni xirho lexi leheke, kumbe lexi komeke, u nga xi humesa yi va nyiko ya ku tirhandzela ka wena; kambe loko ku ri ku tiyisa ku vula ka wena, xi nga ka xi nga amukeriwi. 24Mi nga tshuki mi humesela Yehovha xifuwo lexi tsheniweke hi ku kamiwa, kumbe hi ku khandliwa, kumbe hi ku tshoviwa, hambi hi ku tsemiwa; mi nga tshuki mi endla xilo lexo tano etikweni ra n'wina. 25Hambi swifuwo leswi swi huma eka valuveri, mi nga tshuki mi swi humesa, swi va swakudya swa Xikwembu xa n'wina; leswi tsheniweke, swi ni xisandzu; swi nga ka swi nga amukeriwi loko mi swi humesa.’ ”
26Yehovha a byela Muxe, a ku: 27“Kutakuloko rhole, hambi xinyimpfana, hambi ximbutana swi tswariwile, swi ta tshama masiku ya ntlhanu na mambirhi ni mana wa swona, kutani ku suka eka siku ra ntlhanu na manharhu, ni masiku lama tlhandlamaka, swi ta amukeriwa loko swi humesiwa, ti ri timhamba leti hiseriwaka Yehovha. 28Mi nga tshuki mi tlhava xifuwo ni n'wana wa xona hi siku rin'we, hambi yi ri homu, hambi yi ri nyimpfu.
29“Kutakuloko mi humesela Yehovha gandzelo ra ku khensa, mi ta ri humesa hi mukhuva wo lulama leswaku mi ta amukeriwa. 30Ri ta dyiwa hi siku rin'we; mi nga siyeli siku leri tlhandlamaka nchumu: hi mina Yehovha.
31“Mi ta hlayisa milawu ya mina, mi landza yona: hi mina Yehovha.
32“Mi nga tshuki mi endla vito ra mina ro kwetsima swahava, kambe ndzi ta hlawuriwa exikarhi ka vana va Israele. 33Hi mina Yehovha la mi hlawulaka, loyi a mi humeseke etikweni ra Egipta, leswaku ndzi va Xikwembu xa n'wina. Hi mina Yehovha.”
