Ta ku avanyisa ka ku dyoha kun'wana.
1Yehovha a byela Muxe, a ku: 2“Mani na mani exikarhi ka vana va Israele, hambi exikarhi ka valuveri lava luvelaka eIsraeleni, la nyikaka un'wana wa vana va yena ku n'wi humesela Moloko, u ta avanyiseriwa rifu: vanhu va tiko va ta n'wi khandla hi maribye. 3Na mina ndzi ta languta munhu loyi, hi vukari, ndzi n'wi susa exikarhi ka tiko ra yena, hikuva u humesele Moloko n'wana wa yena ku nyamisa vukwetsimelo bya mina, ni ku endla xisandzu hi vito ra mina ro kwetsima. 4Kungakuloko vanhu va tiko va tisiva mahlo ehenhla ka munhu loyi, loko a humesele Moloko vana va yena, va nga n'wi dlayi, 5mina ndzi ta languta hi vukari munhu loyi ni yindlu ya yena, ndzi n'wi susa etikweni ra yena, swin'we ni hinkwavo lava tinyiketaka vuoswi kukotisa yena, hi ku oswana na Moloko.
6“Kungakuloko munhu a ya evangomeni ni ka lava hlahluvaka, a oswana na vona, ndzi ta languta hi vukari munhu loyi, ndzi n'wi susa etikweni ra yena. 7Mi ta tihlawula, kutani mi ta va lava hlawulekeke; hikuva hi mina Yehovha, Xikwembu xa n'wina. 8Mi ta hlayisa milawu ya mina ni ku yi endla; hi mina Yehovha la mi hlawulaka.
9“Un'wana ni un'wana la rhukanaka tata wa yena, hambi mana wa yena, u ta dlawa: u rhukanile tata wa yena hambi mana wa yena; ngati ya yena yi le henhla ka yena.
10“Kungakuloko wanuna a oswana ni wansati la tekiweke, u oswana ni nsati wa warikwavo, wanuna ni wansati lava oswaneke va ta dlawa.
11“Loko wanuna a etlela ni nsati wa tata wa yena, u funungula vuhava bya tata wa yena; va ta dlawa havambirhi; ngati ya vona yi le henhla ka vona.
12“Kungakuloko wanuna a etlela ni n'wingi wa yena, va ta dlawa havambirhi; va onhile ngopfu; ngati ya vona yi le henhla ka vona.
13“Loko wanuna a etlela ni wanunakulobye, kukotisa loko munhu a etlela ni wansati va endlile havambirhi xilo lexo biha ngopfu, va ta dlawa; ngati ya vona yi le henhla ka vona.
14“Loko wanuna a teka wansati swin'we ni mana wa yena, i ku dyoha loku chavisaka; va ta hisiwa endzilweni havambirhi leswaku ku dyoha loku ku nga tshuki ku va kona exikarhi ka n'wina.
15“Loko wanuna a endla manyala ni xifuwo, u ta dlawa, mi ta dlaya ni xifuwo. 16Kungakuloko wansati a tshinelela xifuwo ku endla manyala na xona, u ta dlaya wansati ni xifuwo: kunene u ta dlawa, na xona xifuwo xi ta dlawa; ngati ya wansati yi ta va ehenhla ka yena, swi va tano ni xifuwo.
17“Loko wanuna a teka makwavo wa xisati, a nga n'wana wa tata wa yena, hambi a ri n'wana wa mana wa yena, ni loko a vona vuhava bya yena ni wansati a vona bya yena, i vuoswi lebyi yilaka ni ku tlurisa, va ta susiwa exikarhi ka tiko ra vona; u funungule vuhava bya makwavo, u ta rhwala ku dyoha ka yena.
18“Kungakuloko wanuna a etlela ni wansati, loko a ri ni tin'hweti, a funungula vuhava bya yena, u funungule masangu ya yena na yena wansati u funungule tingati ta yena, va ta susiwa havambirhi etikweni ra vona.
19“U nga tshuki u funungula vuhava bya ndzisana ya mana wa wena, ni bya hahani wa wena, hikuva sweswo i ku funungula xaka ra wena ra xiviri, va ta rhwala xivi xa vona.
20“Loko wanuna a endla vuoswi ni nsati wa makwa tata wa yena, u funungule vuhava bya makwa tata wa yena; va ta rhwala nandzu wa vona; va ta fa va nga ri na vana.
21“Loko wanuna a teka nsati wa makwavo, swa yila; u funungule vuhava bya makwavo, va ta pfumala vana.
22“Mi ta hlayisa milawu hinkwayo ya mina, ni ku lerisa hinkwako ka mina, mi endla hakona, kutani tiko leri ndzi mi nghenisaka eka rona ku aka kona, ri nga ka ri nga mi hlanti. 23Mi nga tshuki mi landza mikhuva ya tiko leri ndzi ri hlongolaka emahlweni ka n'wina, hikuva va endlile swilo sweswo hinkwaswo, hakona va ndzi nyenyetsa. 24Ndzi mi byerile, ndzi te eka n'wina: Hi n'wina mi nga ta fuwa tiko ra vona, ndzi ta mi nyika rona leswaku ri va ra n'wina; i tiko leri teleke ntswamba ni vulombe. Hi mina Yehovha, Xikwembu xa n'wina, loyi ndzi mi hlawuleke exikarhi ka matiko.
25“Hlawulani swiharhi leswi tengeke exikarhi ka leswi nga tengangiki, ni tinyanyana leti tengeke eka leti nga tengangiki; mi nga tshuki mi tiendla lava nga tengangiki hi swiharhi, ni tinyanyana, ni hinkwaswo leswi kokovaka emisaveni, leswi ndzi mi tiviseke swona leswaku a swi lulamanga. 26Mi ta tihlawulela mina, hikuva ndzi hlawulekile, mina Yehovha; ndzi mi hlawurile exikarhi ka matiko leswaku mi va va mina.
27“Kungakuloko wanuna, hambi wansati, a vutisa swikwembu, kumbe loko va bvumbha, va ta dlawa; va ta khandliwa hi maribye; ngati ya vona yi le henhla ka vona.”
