YOXUWA 12

₁Hi tona tihosi leti nga hluriwa hi vana va Israele, leti va tekeke tiko ra tona ehase ka Yordani, evuxeni, ku suka exinambyaneni xa Arinoni ku ya fika entshaveni ya Hermoni, ni rivala hinkwaro ra le vuxeni:

₂Sihoni, hosi ya Vaamori, leyi akeke eHexiboni; a a fuma Arowere, ni ribuwu ra xinambyana xa Arinoni, ku suka exikarhi ka nkova, ni hafu ya Giliyadi, ku fika exinambyaneni xa Yaboko lowu nga endzilakaneni wa vana va Amoni; ₃ni le rivaleni, ku fika eLwandle ra Kinereta, evuxeni, ni ku fika eLwandle ra Rivala, ri nga Lwandle ro Dzuma, evuxeni, tlhelo ra Beta-Yeximoto, ni le dzongeni, ehansi ka ntshava ya Pisga.

₄Va teka ni tiko ra Ogo hosi ya Baxani, la saleke wa Varefayimi, a akile eAxitaroto, na Edreyi; ₅a a fuma entshaveni ya Hermoni, na Saleka, na Baxani hinkwayo ku fika endzilakaneni wa Vagexuri, ni Vamaakati, ni ku fika eka hafu ya Giliyadi, endzilakaneni wa tiko ra Sihoni, hosi ya Hexiboni.

₆Muxe, nandza wa Yehovha, ni vana Vaisraele, va va hlurile, kutani Muxe, nandza wa Yehovha, a nyikile va Rhuveni, va Gadi, ni hafu ya nyimba ya Manase, tiko ra vona.

₇Hi tona tihosi ta tiko leti Yoxuwa ni vana Vaisraele va nga ti hlula halenu ka Yordani, evupeladyambu, ku suka eBaali-Gadi, enkoveni wa Lebanoni, ku ya fika entshaveni ya Ripalo leyi yimeke etlhelweni ra Seyira. Yoxuwa a nyika tinyimba ta Vaisraele tiko leri leswaku va ri fuma hi ku averiwa ka vona, ₈ku ri entshaveni, ni le tikweni leri nga ehansi, ni le rivaleni, ni le ku rheleleni ka tintshava, ni le mananga, ni le dzongeni: va ri Vahiti, ni Vaamori, ni Vakanana, ni Vaperesi ni Vahivhi ni Vayebusi.

₉Hosi ya Yeriko, yin'we; hosi ya Ayi, ekusuhi na Betele, yin'we; ₁₀hosi ya Yerusalema, yin'we; hosi ya Hebroni, yin'we; ₁₁hosi ya Yaramutu, yin'we; hosi ya Lakixi, yin'we, ₁₂hosi ya Egiloni, yin'we; hosi ya Gezere, yin'we, ₁₃hosi ya Debiri, yin'we; hosi ya Gedere, yin'we; ₁₄hosi ya Horma, yin'we; hosi ya Aradi, yin'we; ₁₅hosi ya Libina, yin'we; hosi ya Adulama yin'we; ₁₆hosi ya Makeda, yin'we; hosi ya Betele, yin'we; ₁₇hosi ya Tapuwaka, yin'we; hosi ya Hefere, yin'we; ₁₈hosi ya Afeke, yin'we; hosi ya Laxaroni, yin'we; hosi ya Madona, yin'we; ₁₉hosi ya Hasoro, yin'we; hosi ya Ximroni-Meroni, yin'we, ₂₀hosi ya Akixafa, yin'we; hosi ya Taanaka, yin'we; ₂₁hosi ya Megido, yin'we; hosi ya Kedexe, yin'we; ₂₂hosi ya Yokineyama, eKarmele, yin'we, hosi ya Dori, etintshaveni ta Dori, yin'we; ₂₃hosi ya Goyimi, ekusuhi na Giligala, yin'we, hosi ya Tirisa, yin'we. ₂₄Loko ti hlanganisiwa, ti ri tihosi ta 31.