Ta ku lwa ekusuhi na Gibiyoni; va hlasela ni miti ya le dzongeni.
1Adoni-Sedeke, hosi ya Yerusalema, kuteloko a twile leswaku Yoxuwa a tekile Ayi, a va a wu yirisa, ni leswaku a endlele Ayi ni hosi ya kona kukotisa leswi a endleke Yeriko ni hosi ya kona, ni leswaku vaaki va Gibiyoni a va kumile ku rhula ni Vaisraele, ni leswaku a va ri exikarhi ka vona, 2a chava ngopfungopfu, hikuva Gibiyoni a wu ri muti lowukulu, kukotisa muti wa tihosi, wu tlula Ayi, kambe vavanuna va wona a ti ri tinhenha. 3Kutani Adoni-Sedeke, hosi ya Yerusalema, a rhuma eka Hohamu, hosi ya Hebroni, ni le ka Piramu, hosi ya Yaramutu, ni le ka Yafiya, hosi ya Lakixi, ni ka Debiri, hosi ya Egiloni, a ku eka vona: 4Khandziyani eka mina, mi ta ndzi pfuna, hi ta hlasela Gibiyoni, hikuva va twananile na Yoxuwa ni vana va Israele. 5Kavaloko tihosi ta ntlhanu ta Vaamori, yi ri hosi ya Yerusalema, ni hosi ya Hebroni, ni hosi ya Yaramutu, ni hosi ya Lakixi, ni hosi ya Egiloni, ti hlengeletana ti khandziya ni tinyimpi ta tona hinkwato, ti ya gova emahlweni ka Gibiyoni ti wu rhendzela.
6Kutani vanhu va Gibiyoni va rhuma eka Yoxuwa, emixaxeni ya Giligala, va ku eka yena: “U nga tshiki malandza ya wena, hatlisa u khandziya eka hina, u hi kutsula ni ku hi pfuna, hikuva tihosi hinkwato ta Vaamori, leti akeke entshaveni ti hlengeletanele hina.”
7Kavaloko Yoxuwa a suka eGiligala a ri ni vanhu hinkwavo lava hlomeke ni tinhenha hinkwato. 8Kutani Yehovha a ku eka Yoxuwa: “U nga va chavi hikuva ndzi va nyiketile emavokweni ya wena, ku nga ka ku nga tiyi ni un'we emahlweni ka wena.” 9Kavaloko Yoxuwa a fika kan'we eka vona; a fambile vusiku hinkwabyo loko a suka eGiligala. 10Kutani Yehovha a va hangalasa emahlweni ka Israele kutani Israele a lwa na vona, a va hlula swinene ekusuhi na Gibiyoni; kutani Israele a va hlongorisa endleleni leyi khandziyaka ya Bet-Horoni, a lwa na vona ku fika eAzeka na Makeda. 11Kutani, kuteloko va ha balekele Israele eku rheleleni ka Bet-Horoni, Yehovha a va nisela hi le tilweni maribye lamakulu ku fika eAzeka, kutani va fa, lava dlayiweke hi maribye lawa ya xihangu a va tlula lava vana va Israele va va dlayeke hi tlhari.
12Kavaloko Yoxuwa a vulavula na Yehovha siku Yehovha a nyiketeke Vaamori eka vana va Israele, a ku:
“Dyambu, yima ehenhla ka Gibiyoni, na wena n'weti enkoveni wa Ayaloni.” 13Kavaloko dyambu ri yima, ni n'weti wu yimisa ku famba ka yona, tiko ri ko ri tirihisela eka valala va rona. A hi timhaka leti tsariweke ebukwini ya La Lulameke xana?
Dyambu ri yima etilweni, ri nga hatlisanga ku pela, ku lava ku ringana siku rin'we.
14A ku vanga na siku kukota siku lero, hambi ku ri emahlweni, hambi ku ri ndzhaku, loko Yehovha a yingisa rito ra munhu; hikuva Yehovha a a lwela Israele. 15Kutani Yoxuwa a tlhelela emixaxeni, eGiligala, a ri ni Vaisraele hinkwavo.
16Kutani tihosi leti ta ntlhanu ti baleka, ti ya tumbela ebakweni ra Makeda. 17Kutani va ya byela Yoxuwa, va ku: “Tihosi leti ta ntlhanu, va ti kumile ti tumbele ebakweni ra Makeda.” 18Kutani Yoxuwa a ku: “Vumbuluxelani maribye lamakulu enyangweni ya bako, mi veka kona vavanuna ku ti langutela. 19Loko mi ri n'wina, mi nga yimi, hlongorisani valala va n'wina, mi va pfukela ku lwa hi le ndzhaku; mi nga va pfumeleli ku nghena emitini ya vona, hikuva Yehovha, Xikwembu xa n'wina, u va nyiketile emavokweni ya n'wina.”
20Kuteloko Yoxuwa ni vana va Israele va va hlaserile va ko va va heta, kambe van'wana va balekela emitini ya makhokholo, 21tiko hinkwaro ri vuya ka Yoxuwa, emixaxeni, eMakeda ri tsakile; kambe a ku vanga na munhu un'we la hlevaka vana Vaisraele.
22Kutani Yoxuwa a ku: “Pfulani nyangwa ya bako, mi humesa tihosi leti ta ntlhanu, mi ti tisa eka mina.” 23Va endlisa sweswo, va ya n'wi humesela ebakweni tihosi leti ta ntlhanu, hosi ya Yerusalema, ni hosi ya Hebroni, ni hosi ya Yaramutu, ni hosi ya Lakixi, ni hosi ya Egiloni. 24Kuteloko va tisile tihosi leti emahlweni ka Yoxuwa, Yoxuwa a hlengeleta vavanuna hinkwavo va Israele, kutani a ku eka tihosi ta vanhu va nyimpi lava fambeke na yena: “Tshinelani mi kandziya hi mikondzo ya n'wina emikolweni ya tihosi leti.” Kutani va tshinelela va kandziya hi mikondzo ya vona emikolweni ya tona. 25Kutani Yoxuwa a ku eka vona: “Mi nga chavi, mi nga tsemeki nhlana, tiyani, mi va ni mbilu, hikuva Yehovha u ta endlela valala va n'wina hinkwavo lava mi lwaka na vona hi sweswo.” 26Endzhaku ka swona, Yoxuwa a ti tlhava, a ti dlaya, kutani a ti hayeka emirhini ya ntlhanu, ti tshama ti hayekiwa emirhini ku fika nimadyambu. 27Kakuloko dyambu ri ya eku peleni, Yoxuwa a lerisa leswaku ti hawuriwa emirhini, ti cukumetiwa ebakweni, laha ti tumbeleke kona; kutani va veka enyangweni ya bako maribye lamakulu, lama nga kona ni namuntlha.
28Hi siku leri, Yoxuwa a teka Makeda, a wu heta hi matlhari, kutani a yirisa hosi ya wona, ni hinkwavo lava hanyaka lava ngi va ri eka wona; a nga tshikanga mubaleki, kambe a endlela hosi ya Makeda kukotisa leswi a endleleke hosi ya Yeriko.
29Yoxuwa ni Vaisraele hinkwavo va suka eMakeda, va ya Libina, a lwa na Libina. 30Kutani Yehovha a wu nyiketa emavokweni ya Israele, wona ni hosi ya wona, kutani a dlaya hi tlhari hinkwaswo leswi hanyaka leswi ngi i swi ri kona, ku nga balekanga munhu, kutani a endlela hosi ya kona kukotisa leswi a endleleke hosi ya Yeriko.
31Yoxuwa ni Vaisraele hinkwavo va suka eLibina, kutani va ya eLakixi, va gova emahlweni ka wona, va lwa na wona. 32Kutani Yehovha a nyiketa Lakixi emavokweni ya Vaisraele kutani hi siku ra vumbirhi a wu teka a dlaya hi tlhari hinkwaswo leswi hanyaka, leswi ngi swi ri eka wona, kukotisa leswi a endleleke Libina. 33Kavaloko Horamu, hosi ya Gezere, a ya pfuna Lakixi; kambe Yoxuwa a lwa na yena ni tiko ra yena, a va dlaya, ku nga balekanga munhu.
34Yoxuwa ni Vaisraele hinkwavo, va suka eLakixi, va ya eEgiloni, kutani va gova emahlweni ka wona, va lwa na wona. 35Va wu teka hi siku rolero va wu herisa hi tlhari: hi siku leri, va yirisa hinkwaswo leswi hanyaka leswi ngi swi ri eka wona kukotisa leswi va swi endleleke Lakixi.
36Kutani Yoxuwa ni Vaisraele hinkwavo va suka eEgiloni, va ya eHebroni, va lwa na wona, 37va wu teka, kutani va wu heta hi tlhari, ni hosi ya wona, ni miti hinkwayo ya wona, ni leswi hanyaka hinkwaswo leswi ngi swi ri eka wona, a nga tshikangi munhu a baleka, kambe a wu yirisa kukotisa leswi a swi endleleke Egiloni, ni hinkwaswo leswi hanyaka leswi ngi swi ri eka wona.
38Kutani Yoxuwa ni Vaisraele hinkwavo va kongoma eDebiri, va lwa na wona. 39Kutani va wu teka, ni hosi ya kona, ni miti hinkwayo ya wona, va wu heta hi tlhari, kutani va yirisa leswi hanyaka hinkwaswo leswi ngi swi ri ka wona, a nga tshikanga mubaleki hilaha a endleleke Hebroni hakona, kambe a endlela Debiri ni hosi ya kona kukotisa leswi a swi endleleke Libina ni hosi ya kona.
40Yoxuwa a hlasela tiko leri hinkwaro etintshaveni ni le dzongeni, ni le tikweni leri nga ehansi, ni le eku rheleleni ka tintshava, ni tihosi hinkwato ta kona, a nga tshikanga mubaleki, kambe a yirisa hinkwaswo leswi hefemulaka, hilaha Yehovha, Xikwembu xa Israele a leriseke hakona. 41Yoxuwa a hlasela ku suka eKadexe-Bariniya ku ya fika eGaza, ni tiko hinkwaro ra Goxeni ku ya fika eGibiyoni. 42Yoxuwa a teka kan'we tihosi hinkwato ni matiko ya tona, hikuva Yehovha, Xikwembu xa Vaisraele, a a lwela Israele. 43Kutani Yoxuwa ni Vaisraele hinkwavo va tlhelela emixaxeni, eGiligala.
