YOBO 41

₁“Xana u nga phasa ngwenya hi xinjovo?

U nga boha ririmi ra yona hi ngole-ke?

₂U nga nghenisa muhalo etinhompfini ta yona?

U yi boxa rihlaya ku nghenisa sindza xana?

₃Xana yi ta ku khongela ngopfu,

Kumbe yi ta vulavula na wena hi marito ya ku nandziha-ke?

₄Xana yi ta tiboha eka wena,

Leswaku yi ta ku tirhela hi masiku xana?

₅Xana u ta tlanga na yona kukotisa nyanyana,

U yi kuleka ku tlangisa vana va wena xana?

₆Xana vanhu va ta hlangana ku bindzula ha yona?

Va nga pambulelana ni vaxavi xana?

₇Xana u nga funengeta dzovo ra yona hi matlhari?

Ni nhloko ya yona hi miseve ya vaphasi xana?

₈Yisa voko ra wena ehenhla ka yona,

Kutani u nga ha tlheli u anakanya ku yi pfuka.

₉Ku langutela ka loyi a yi pfukaka ku hela kan'we,

Wa hela mbilu loyi a yi langutaka.

₁₀A ku na nhenha leyi nga tiyaka mbilu ku yi pfuxa,

Kambe i mani la nga yimaka emahlweni ka mina?

₁₁I mani loyi ndzi nga ni nandzu ka yena,

ndzi ta n'wi rihela,

Ehansi ka tilo, hinkwaswo i swa mina!

₁₂“Ndzi rhandza kambe ku vula ta swirho swa yona,

Ni ta matimba ya yona,

ni vumbhurhi bya xivumbeko xa yona.

₁₃I mani la nga ta funungula nguvu ya yona?

Ni ku nghena exikarhi ka tinhlaya ta yona?

₁₄I mani la nga pfulaka tinyangwa ta nomu wa yona?

Ku chavisa ku le menweni ya yona!

₁₅A hi ku saseka ka tinxaxa ta switlhangu swa yona!

Swi xaxamelana, swi tiyisiwa swin'we,

₁₆Xin'wana xi namarhelana xin'wana,

Moya wu nga ka wu nga ngheni emilotini ya swona.

₁₇Swi namarhelana, swi mumakanile,

Swi nga ka swi nga namuriwi.

₁₈Ku entshemula ka yona ku humesa ku vonakala,

Ni mahlo ya yona ma kotisa tin'hwembeti ta vurhonga.

₁₉Swisa swi huma enon'wini wa yona,

Ni tinhlahle ta ndzilo ti baleka kona.

₂₀Musi wu huma etinhompfini ta yona,

Kukotisa musi lowu humaka embiteni leyi vilaka.

₂₁Ku huhuta ka yona ku nga hisa makala,

Malangavi ma huma enon'wini wa yona.

₂₂Matimba ma tiakele enhan'wini ya yona,

Kutani ku chava ku famba emahlweni ka yona.

₂₃Misiha ya nyama ya yona yi hlangene swin'we,

Yi chuluriwe ehenhla ka yona, a yi tsekatseki.

₂₄Nyama ya mbilu ya yona yi nonon'hwa kukota ribye,

Yi kotisa tamba ra le hansi ka xisilelo.

₂₅Loko yi pfuka, va matimba va tshuka,

Ku chava ka vona ku va tsutsumisa.

₂₆Hambi u yi tlhava hi tlhari, a ri ngheni,

A yi vuri nchumu hi nseve ni tlhuvana,

ni xisirhelo xa xifuva.

₂₇Eka yona, nhumbu yi kotisa byanyi,

Ni koporo, yi kota rikunyi leri boleke.

₂₈N'wana wa vurha a nga yi chavisi;

Maribye ya xipelupelu ma fana ni mungu eka yona.

₂₉Yi languta xigombo kukota rihlanga,

Yi hleka ku ntswiririka ka matlhari.

₃₀Khwiri ra yona ri tlhomiwe hi swirhengele leswi tlhavaka;

Endzopeni, yi endla ndlela kukotisa xileyi.

₃₁Yi pfindlusa xidziva, ingi i mbita yo vila;

Yi phyaphyarhisa lwandle kukota khuwana leri teleke mirhi ya risuna.

₃₂Mitila ya yona i ndlela leyi vangamaka.

Lwandle ri fana ni misisi ya timpfu.

₃₃A yi na n'wini wa yona la emisaveni;

Yi endliwile yi pfumala nchavo.

₃₄A yi chavi ku languta leswi tlakukeke hinkwaswo,

I hosi ya swiharhi hinkwaswo swa matimba.”