YOBO 40

₂“Xana mukaneti u ta tenga yini ni Lowa matimba hinkwawo?

La landzulaka mhaka ni Xikwembu a a hlamule!”

₃Kutani Yobo a hlamula Yehovha, a ku:

₄“Vona, ndzi lontsongo ntsena, ndzi nga ku hlamula yini?

Ndzi veka voko ra mina enon'wini

wa mina.

₅Ndzi vulavurile kan'we, a ndzi nga ha hlamuli;

Ndzi angule kambirhi, a ndzi nga ha vuli nchumu.”

₆Kutani Yehovha a hlamula Yobo a ri exihuhurini, a ku:

₇“Wa nga tiboha swisuti kukota wanuna;

Ndzi ta ku vutisa, wena u ndzi hlamula.

₈Xana kunene u nga handzula

ku lulama ka mina?

Xana u ta ndzi kaneta ku tibasisa-ke?

₉U ni voko leri fanaka ni ra Xikwembu xana?

Ni rito ra wena ri nga pfuma kukota ra xona-ke?

₁₀“Tifunengete hi vuhosi ni vukulukumba,

U tibombisa hi ku kwetsima

ni vumbhurhi,

₁₁U chela ku hiseka ka vukari

bya wena,

U languta vatikukumuxi hinkwavo, u va tsongahata!

₁₂Languta vatiarisi hinkwavo, u va wisa,

U kandziyela timbabva laha ti yimaka kona;

₁₃U va lahla hinkwavo entshurini,

U yimbela mimombo ya vona emunyameni!

₁₄Hi laha, na mina,

ndzi nga ta tiva ku ku dzunisa,

Hikuva voko ra wena ra xinene ingi ri ku hlayisile!

₁₅“Languta mpfuvu leyi ndzi yi endleke swin'we na wena;

Yi dya byanyi kukota homu.

₁₆Vona, matimba ya yona ma le xisutini xa yona,

Ni ku tiya ka yona ku le misiheni ya khwiri ra yona;

₁₇Yi yimisa ncila wa yona kukotisa kedari,

Misiha ya mirumbi ya yona yi lukiwe swin'we.

₁₈Marhambu ya yona,

ingi i timpompi ta koporo;

Swirho swa yona swi fana ni timhandze ta nsimbhi.

₁₉“I xirhangana xa mitirho ya Xikwembu;

Loyi a yi vumbeke u yi nyikile tlhari ra yona;

₂₀Tintshava ti yi mirisele byanyi bya yona,

Laha swiharhi swa nhova

swi tlangelaka kona.

₂₁Yi etlela emindzhutini ya lotusi.

Ni le vufihlelweni bya tinhlanga ni bya mitlhangasi;

₂₂Mirhi ya lotusi yi yi funengeta hi mindzhuti ya yona;

Mixumati ya nambu yi yi rhendzeleka exikarhi.

₂₃Loko milambu yi tala, a yi chavi nchumu,

A yi hlamari ni loko Yordani a nga kukumuka ku fika enon'wini wa yona.

₂₄Xana u ta ringeta ku yi khoma yi ri karhi yi ku languta,

Kumbe u nga yi phasa ku yi boxa nhompfu xana?