YOBO 38

₂“La nyamisaka makungu ya mina

Hi marito lama kalaka ku twisisa, i mani xana?

₃Sweswi, tibohe xisuti kukota wanuna; Ndzi ta ku vutisa, u ta ndzi dyondzisa!

₄“A wu ri kwihi siku ndzi akeke masungulo ya misava?

Vulavula loko u ri ku twisisa.

₅I mani la vekeke mpimo wa yona, wa n'wi tiva xana?

Kumbe i mani la yi ringanyeteke hi ngoti?

₆Masungulo ya timhandze ta yona ma celeleke eka yini?

Kumbe i mani la vekeke ribye ra yinhla ra yona?

₇Siku tinyeleti ta vuxa ti baka huwa yo tsaka,

Ni vana hinkwavo va Xikwembu va yimbelelaka hi ku tsakisisa?

₈“I mani la pfaleleke lwandle hi timbanti,

Siku ri humaka hi matimba ekhwirini ra mana wa rona?

₉Loko ndzi ri nyika mapapa ti va tinguvu ta rona,

Ni hunguva ya ntima ku tifunengeta ha yona?

₁₀Ndzi va ndzi ri vekela mindzilekana ya rona,

Ndzi tiyisa timbanti ni swipfalo swa rona.

₁₁Ndzi ri: ‘U ta fika kwala, a ku na ku hundzela emahlweni,

Ku kukumuka ka magandlati ya wena ku ta helela kwala’?

₁₂“Mpfhuka u tumbuluka, u tshama u byela mixo ku humelela xana?

Kumbe u byerile vurhonga laha byi nga ta tshama kona,

₁₃Leswaku byi khoma makumu ya misava,

Byi va byi hangalasa timbabva ta yona?

₁₄Misava yi hundzuka hi nghohe kukotisa vumba loko byi kandziyisiwa hi fungho.

Eswilweni hinkwaswo, ku vonaka swiambalo leswo saseka.

₁₅Kambe ku vonakala ka timbabva ku susiwa eka vona,

Ni voko leri tshambulukeke ra tshoveka.

₁₆“Xana u fikile emakun'weni ya lwandle?

U ya valanga eku enteni ka xidziva xana?

₁₇Xana tinyangwa ta rifu ti tikombisile eka wena-ke?

Xana u vonile tinyangwa ta ndzhuti wa rifu?

₁₈Xana u kambile hi mahlo ku anama ka misava xana?

Vulavula, loko u tiva sweswo hinkwaswo!

₁₉“Yi kwihi ndlela leyi yaka endlwini ya ku vonakala?

Ni munyama, wu ake kwihi xana?

₂₀Xana u ta wu lava endzilakaneni wa wona,

U ta tiva ni tindlela leti yaka endlwini ya wona-ke?

₂₁Wa swi tiva, hikuva a u velekiwile,

Ku hlaya ka masiku ya wena kukulu ngopfu!

₂₂“Xana u fikele evuhlayiselweni bya gamboko?

Xana u vonile laha xihangu xi hlayisiwaka kona-ke?

₂₃Lexi ndzi xi vekeleke siku ra ku onhaka,

Ni siku ra ku huma nyimpi ni ra ku lwa?

₂₄Ndlela hi yihi, leyi ku vonakala ku avanyisiwaka eka yona,

Laha mheho ya le vuxeni yi humaka kona ku hungela misava-ke?

₂₅“I mani la endleke tinyangwa leti haxaka timpfula,

Ni ndlela ya tindlati ni ku pfuma,

₂₆Ku nisa mpfula emisaveni leyi nga akiwangiki,

Ni mananga, laha ku nga akangiki munhu!

₂₇Ku nwisela mananga laha ku nga riki na nchumu,

Ni ku mirisa byanyi bya rilambyana?

₂₈“Xana mpfula yi ni tatana wa yona-ke?

Kumbe mathonsi ya mberha ma vekiwile hi mani xana?

₂₉Xirhami xi huma emarhumbyini ya mani-ke?

I mani la velekeke gamboko ya le mpfhukeni xana?

₃₀Loko mati ma tiyile, ma nonon'hwa kukota ribye,

Ni loko mati ya rivala ra xidziva ma bohiwe swinene?

₃₁“Wa swi kota ku boha Xirimela hi pindza xana?

Kumbe u ni matimba ya ku tshunxa tinghole ta Nhlahle?

₃₂Xana u nga humesa swikombiso swa le tilweni enkarhini wa swona?

Kumbe hi wena la fambisaka Gongomela ni vana va yona?

₃₃Xana wa yi tiva milawu ya le tilweni.

Ni mitirho ya yona emisaveni xana?

₃₄“Xana u nga huwelela eka mapapa

hi rito ra wena,

Leswaku ma funengeta hi maboboma ya mpfula?

₃₅Xana u nga rhuma tindlati, ti famba,

Ti ku eka wena: ‘Hi hina valava’?

₃₆I mani la vekeke vutlhari embilwini ya munhu-ke?

I mani la nyikeke moya wa yena ku twisisa xana?

₃₇I mani la kumeke ntsengo wa mapapa hi vutlhari?

I mani la chelaka makhuwana ya le tilweni,

₃₈Leswaku ntshuri wu va wu hlangana,

Ni leswaku mabuwu ya misava ma namarhelana?

₃₉“Xana u nga dlayela ntswele ya nghala xiharhi,

U nga xurhisa ndlala ya swinghalana xana?

₄₀Loko ti etlela etindhawini ta tona,

Ni loko ti bvutamile exihlahleni?

₄₁I mani la tsetselelaka wukuwuku hi swakudya swa rona?

Loko mavondlo ya rona ma huwelela eka Xikwembu,

Loko ma solovanya hala ni hala hi ku twa ndlala?