YOBO 3

₃“A ku love siku leri ndzi nga velekiwa ha rona,

Ni vusiku lebyi va nga te: ‘N'wana u humele.’

₄Siku rolero a ri hundzuke munyama,

Xikwembu xi nga ri tsetseleli xi ri etilweni,

Ku vonakala ku nga ri voningi!

₅A ri laviwe hi munyama ni mindzhuti ya rifu,

Mapapa a ma ri funengete,

A ri chavisiwe hi leswi nyamisaka dyambu!

₆Vusiku byebyo! A byi phorhiwe hi munyama,

Byi nga tsaki exikarhi ka masiku ya lembe,

Byi nga hlayiwi entsengweni wa masiku ya tin'hweti!

₇Vusiku byebyo a byi nyumbe,

Ku tsaka a ku pfumaleke eka byona!

₈A byi rhukaniwe hi lava rhukanaka masiku,

Lava nga ni vutlhari byo pfuxa Levhiyatani!

₉Tinyeleti ta vupeladyambu bya byona

a ti nyamisiwe;

A byi langutele ku vonakala, mahala,

byi nga ku voni,

Byi nga voni tin'hwembeti ta vurhonga!

₁₀Hikuva a byi pfalangi khwiri leri ndzi humeke eka rona,

A byi fihlanga ku vaviseka emahlweni ka mina.

₁₁“A ndzi fanga ha yini ndza ha ri ekhwirini ra manana?

Kumbe a ndzi lahlekanga ha yini

ndza ha huma enyimbeni ya yena?

₁₂Ndzi kumele yini matsolo ya ku ndzi vukarhela xana?

Ni mavele ya ku ndzi an'wisa?

₁₃Hikuva sweswi, ingi ndzi te nhavalala,

ndzi timiyelele;

Ingi ndzi etlele, ndzi wisa na mina,

₁₄Ndzi ri ni tihosi ni vakulukumba va misava,

Lava tiakeleke masirha

₁₅Ni tihosana leti fuweke nsuku,

Lava tateke tindlu ta vona hi silivhere.

₁₆Kumbe a ndzi ta fana ni mhondlwana leyi yimberiweke,

Ndzi kotisa vana lava nga vonangiki ku vonakala.

₁₇Kona lavo biha va tshika ku pfilunganya,

Ku wisa kona lava heleriweke hi matimba.

₁₈Lava bohiweke hinkwavo va hlangana kona hi ku tsaka,

A va ha twi rito ra muxanisi.

₁₉Lavatsongo ni lavakulukumba va hlangana kona,

Ni nandza u tshunxekile eka n'wini wa yena.

₂₀“Lowa khombo u nyikiwa ku vonakala ha yini-ke?

Ni vutomi byi nyikiwa lava nga ni mbitsi etimbilwini ha yini-ke?

₂₁Va nga lava langutelaka rifu, kambe a ri fiki;

Ni lava ri navelaka ku tlula xuma lexi fihliweke.

₂₂A va ta tsaka hi ku tsaka loku tlurisaka,

Va nyarhula loko ngi va kuma sirha?

₂₃Ndzi vula munhu la lahlekeriweke hi ndlela ya yena,

Loyi Xikwembu xi n'wi sivelaka hinkwako:

₂₄Hikuva vuswa bya mina i mbitsi yanga,

Ku kolola ka mina ku khuluka kukota makhukhumba.

₂₅Hikuva ku chavisa loku ndzi ku chavaka ku ndzi tele,

Leswi ndzi swi tshukaka hi leswi ndzi humelelaka.

₂₆Loko ndzi nga si kuma nkarhi wa ku rhula ni ku wisa,

Ku xaniseka lokuntshwa ku ndzi tela ehenhla.”