1Kutani Yobo a hlamula, a ku:
2“Ni sweswi ku dzumadzuma ka mina ka ha tele ku bava,
Voko leri ndzi baka ra ndzi tikela, ri funengeta ku n'unun'uta ka mina.
3Yo! Loko ndzi nga tiva laha ndzi nga xi kumaka kona,
Leswaku ndzi ta fika eka xiluvelo xa xona!
4A ndzi ta tlhandlakanya timhaka ta mina emahlweni ka xona,
Ndzi tata nomu wa mina hi timhaka,
5A ndzi ta tiva timhaka leti xi nga ta ndzi hlamula ha tona,
Ndzi twa ni leswi xi nga ta ndzi byela swona.
6Xana xi ta lwa na mina hi matimba lamakulu ya xona-ke?
E-e, niswitsanana, xi ta ndzi tsetselela!
7Loko ngi hi lowo lulama a kanetanaka na xona,
Ndzi ta va ndzi tshunxekile hilaha ku nga heriki eka muavanyisi wa mina.
8“Kambe, loko ndzi ya evuxeni a xi kona,
Hambi ndzi ya evupeladyambu a ndzi xi kumi.
9Hambi xi tirha en'walungwini, a ndzi xi voni,
Hambi xi tifihla edzongeni, a ndzi xi vonisisi.
10Kasi xi tiva tindlela ta mina;
Ni loko xi nga ndzi ringa,
a ndzi ta huma ndzi basile kukota nsuku.
11Nenge wa mina wu tiyile emitileni ya xona;
Ndzi hlayisile ndlela ya xona, a ndzi hambukanga eka yona.
12Milawu ya milomu ya xona a ndzi yi hambukanga;
Ndzi hlayisile timhaka ta nomu wa xona ku tlula leswi ndzi tihlambanyisaka ha swona.
13Hambiswiritano, xi ni ku anakanya kun'we ntsena,
i mani la nga xi rhendzevetaka?
Leswi moya wa xona wa swi rhandzaka, wu swi endla.
14Xi ta hetisa mhaka leyi xi yi vuleke ehenhla ka mina,
Timhaka leto tano ti tele eka xona.
15Hikwalaho ndzi rhurhumelaka emahlweni ka xona,
Loko ndzi xi anakanya, ndzi xi chava ngopfu.
16Kasi Xikwembu xi tsanisile mbilu ya mina,
Lowa matimba hinkwawo u ndzi chavisile ngopfu.
17Hikuva a ndzi herisiwi hi munyama,
A hi vusiku lebyi ndzi funengetaka.
