1Elifasi wa Temani a hlamula, a ku:
2“Xana munhu wa vutlhari a nga hlamula hi timhaka ta hava xana?
Xifuva xa yena xi nga tshuka xi tele moya wa le vuxeni xana?
3Xana ku hlamula ka yena ku fana ni loko ku nga ri nchumu?
Ni marito ya yena ma nga pfumala ku pfuna-ke?
4Na wena u herisa ku chava ka Xikwembu,
U sivela xikhongelo emahlweni ka Xikwembu,
5Hikuva ku homboloka ka wena ku risa nomu wa wena,
Hambi u tekele marito ya vumbabva.
6Nomu wa wena, hi wona lowu ku kanetaka, a hi mina,
Kambe milomu ya wena i timbhoni leti ku hehlaka.
7“Xana hi wena munhu la nga rhanga a tswariwa-ke?
U humele, tintshava ti nga si va kona xana?
8Xana u dyondzile makungu ya Xikwembu,
U titekele vutlhari xana?
9U tiva mhaka yihi leyi hi nga yi tiviki?
U twisisa mhaka yihi leyi hina hi nga yi twisisiki?
10Van'wana va kona exikarhi ka hina lavakulu, va misisi yo basa,
Lava tlulaka tata wa wena hi malembe.
11Xana u tsan'wa ku chavelela ka Xikwembu,
Ni marito ya ku olova lawa u khongoteriwaka ha wona?
12Mbilu ya wena yi ku yisa kwihi xana?
U ponyola mahlo ya wena ha yini-ke?
13Loko u pfukela Xikwembu vurhenha,
Ni loko nomu wa wena wu humesile marito layo nghasi.
14Munhu i yini leswaku a basa?
La velekiweke hi wansati i yini, leswaku a lulama?
15Vona, swi tsandza ni vakwetsimi va xona, a xi va tshembi,
Hambi ma ri matilo, a ma basanga emahlweni ka xona,
16Ngopfungopfu xi nga tsandzeka ku tshemba munhu wa thyaka la onhakeke,
La nwaka ku homboloka kukotisa mati!
17“Ndzi ta ku dyondzisa, u ndzi yingisela!
Ndzi ta ku byela leswi ndzi swi voneke,
18Leswi vuriwaka hi lava vutlhari,
Leswi va nga swi fihlangiki hilaha va nga swi teka eka vatata wa vona.
19Hilaha tiko ingi ri nyikiwile vona ntsena,
Ku nga ri na wumbe wa matiko la ngheneke exikarhi ka vona.
20Munhu wa mbabva wa xaniseka hi masiku hinkwawo ya ku hanyaka yena,
Hi malembe hinkwawo lawa a ma averiweke.
21Nkosi wu pfuma etindleveni ta yena,
Hambi ku tsakiwile, muonhi a n'wi wela ehenhla;
22A nga tshembi leswaku u ta huma emunyameni,
Fumu ri n'wi etlelele;
23U pepetseka hala ni hala a lava swakudya swi kwihi xana?
U tiva leswaku siku ra munyama ri n'wi tshinelele.
24Makhombo ni ku xaniseka swi n'wi chavisa,
Swi n'wi kama kukotisa hosi leyi tilunghiseleke ku huma nyimpi.
25Hikuva u tshambulutile voko ra yena ku lwa na Xikwembu,
U yeyisile Lowa matimba hinkwawo.
26U tsutsumile ku lwa na yena, a tiyisa nhamu,
A tisirhelela ehansi ka mihlana ya switlhangu swa yena.
27Hikuva mombo wa yena wu nonile,
U nonisile matsheve ya yena.
28Hikwalaho u ta aka emitini leyi onhakeke,
Etindlwini leti tshikiweke, leti lavaka ku endla rhumbi.
29A nga ka a nga fuwi; rifuwo ra yena ri nga ka ri nga sali,
Ni vukosi bya yena byi nga ka byi nga andzi emisaveni.
30A nga ka a nga poni munyama;
Ritshwa ri ta omisa marhavi ya yena,
U ta susiwa hi ku huhuta ka nomu wa yena.
31Hambi a titshembisa hi swo biha, o tikanganyisa,
Hikuva u ta kuma hakelo ya yena leyo biha;
32Malembe ya yena ma nga si hela, u ta yi kuma,
Marhavi ya yena ma nga ka ma nga hluki.
33U ta kotisa vhinya leyi tshikaka mihandzu ya yona ya ha ri mimbisi,
Ni kukota mutlhwari lowu hohlokaka vulangi bya wona.
34Hikuva yindlu ya lowo biha yi ta nyumba,
Kutani ndzilo wu ta dya ntsonga wa lowo homboloka.
35U ahlamula ku biha, u tswala ku homboloka.
Exifuveni xa yena ku tirha ku tikanganyisa.”
