1Yobo a tlhela a hlamula, a ku:
2“Kunene ingi mi tiko hinkwaro,
Kutani vutlhari, mi ta fa na byo!
3Na mina, mbilu, ndzi na yo kukota n'wina;
A ndzi xihlangi eka n'wina,
Timhaka teto, i mani la nga ti tiviki xana?
4Ndzi hundzukile mahleko eka vanakulorhi,
Loko ndzi kombela ku pfuniwa hi Xikwembu;
Ingi la lulameke, la pfumalaka nandzu, i mahleko!
5Makhombo ma lulamele hi xisolo, hi ku vula ka lava tsakeke!
Ku soriwa ku langutele loyi sondzo ra yena ri rhetemukaka.
6Mitsonga ya vaonhi yi ni ku tsaka;
Ku rhula i ka lava nga vuriki nchumu hi Xikwembu,
Lava tamelaka xikwembu xa vona emavokweni ya vona.
7“Wa nga vutisa tihomu, ti ta ku dyondzisa,
Ni tinyanyana ta le tilweni, ti ta ku byela;
8Kumbe xana u vutisa misava, yi ta ku dyondzisa,
Ni tinhlampfi ta lwandle, ti ta ku hlamusela.
9Ka swona hinkwaswo, i mani la nga alaka ku vona leswaku voko ra Yehovha ri endlile swilo hinkwaswo.
10Loyi mimoya ya leswi hanyaka hinkwaswo yi nga evokweni ra yena,
Ni ku hefemula ka vanhu hinkwavo.
11A ndzi ku: Ndleve a yi nga hlawuli ku vulavula,
Kukota malaka lama tivaka ku hlawula swakudya-ke?
12Swikoxa swi ni vutlhari,
Ni va malembe yo tala, va ni ku twisisa.
13“Eka xona Xikwembu ku tshama vutlhari ni matimba;
Xi ni mianakanyo ni ku twisisa.
14Vona, loko xi onha, a ku na la nga vuyetelaka,
Loko xi pfalela munhu, a ku na la nga n'wi pfulelaka.
15Waswivo xi sivela mati, kutani ma phya,
Xi tlhela xi ma tshika, kutani misava yi onhaka.
16Eka xona ku tshamile matimba ni vutlhari;
La hambukeke ni loyi a hambukisaka va le mavokweni ya xona;
17Xi yisa valerisi ekhotsweni, va ri lava phangiweke,
Xi hungukisa vaavanyisi,
18Xi tshova tinhamu ta tihosi;
Xi boha swifungha swa tona hi tiketana.
19Xi yisa vaprista ekhotsweni,
Xi wisa ehansi lava matimba.
20Lava tivaka ku vulavula, xi va pfumata timhaka;
Xi tekela vakulu ku twisisa.
21Xi chela xisandzu ehenhla ka tihosana,
Xi tshunxa vamba ra lava matimba.
22Xi boxa makungu lama fihliweke emunyameni,
Xi humesa ndzhuti wa rifu eku vonakaleni,
23Xi andzisa matiko, kutani xi ma lovisa;
Xi navisa matiko, xi tlhela xi ma vuyisela emindzilekaneni ya wona.
24Xi susa ku twisisa ka tihosi ta matiko,
Xi ti rhendzelekisa emananga laha ndlela ku nga hava;
25Va hulumeta emunyameni, ku nga ri na ku vonakala;
Xi va dedelekisa kukota vanhu lava phyophyiweke.
