1Kutani Sofara wa Naama, a hlamula, a ku:
2“Marito layo tala lawa, ma ta pfumala ku hlamuriwa xana?
Ni munhu wa rivulavulo u ta vuriwa la lulameke xana?
3Xana timhaka ta wena ta hava ti nga miyeta vavanuna?
Xana u ta sola, ku nga ri na la ku khomisaka tingana xana?
4U ri: ‘Mikhuva ya mina yi lulamile,
Ndzi basile emahlweni ka wena.’
5Loko ngi Xikwembu xi nga vulavula!
Xi ahlamisa nomu wa xona, xi vulavula na wena,
6Ku ku boxela xihundla xa vutlhari bya xona lebyi enteke,
Ku tlula ku twisisa ka wena,
U ta swi vona leswaku Xikwembu xi rivele vukulu bya xidyoho xa wena.
7“Xana u fikele eku tlakukeni ka Xikwembu,
U twisisile ku enta ka Lowa matimba hinkwawo xana?
8I ku tlakuka loku kotaka ka le tilweni, u ta endla yini?
Ku entile ku tlula xivandla xa vafi, u ta tiva yini?
9Ku leha ka kona ku tlula misava,
Ku anama ka kona ku tlula lwandle.
10Loko xi hundza, ni loko xi khoma,
Loko xi vitana vanhu eku avanyisiweni xi ta siveriwa hi mani xana?
11Hikuva xi tiva vumbabva bya vanhu,
Xi vona swidyoho hambi xi nga swi chavuki.
12Kambe munhu la nga riki na ku twisisa, loko a kumile miehleketo,
Ximbhongolwana xa nhova xi ta fanana na yena.
13“Kambe wena loko u yisa mbilu ya wena eka xona,
Loko u tlakusa mavoko ya wena eka xona,
14Loko u tshineta ku biha ekule na wena,
U nga tshiki ku homboloka ku tshama entsongeni wa wena.
15U ta tiva ku yimisa nhloko ya wena u nga ri na xivati.
U ta tiya matimba, u nga chavi nchumu;
16U ta rivala ku vaviseka ka wena,
U ta ku anakanya ku kota mati lama hundzeke.
17Vutomi bya wena byi ta tlhavela byi tlula dyambu ra nhlekanhi,
Loko wu ri munyama, wu ta fana ni loko wu ri mixo.
18U ta tiya mbilu, hikuva ku tshemba ku ta va kona.
U ta hiteka, kutani u ta etlela vurhongo lebyinene.
19Ku wisa ka wena a ku nga karhatiwi hi munhu,
Lavo tala va ta tsakela mombo wa wena.
20Kambe mahlo ya timbabva ma ta herisiwa;
Va ta pfumala vuchavelo,
Ku langutela ka vona ri ta va rifu ntsena.”
