YOBO 10

₁“Mbilu ya mina yi phiriwile hi vutomi bya mina!

Ndzi fanela ku nyika ku dzumadzuma ka mina nkarhi,

Ndzi vulavula eku vavisekeni ka moya wa mina.

₂Ndzi ta ku eka Xikwembu:

‘U nga si ndzi vula lowo biha,

Vula lexi hi tengisanaka ha xona!

₃U tsakela yini ku ndzi endla swo biha,

Leswaku u tshika mitirho ya mavoko ya wena,

U tivonakisa emakun'weni ya lavo biha xana?

₄Xana mahlo ya wena i ya nyama-ke?

Xana u vona kukotisa munhu xana?

₅Xana masiku ya wena ma fana ni ya vanhu lava faka?

Ni malembe ya wena ma fana ni ya vanhu xana?

₆Loko u lava nandzu wa mina,

U vutisisa xidyoho xa mina xana?

₇Kasi wa swi tiva leswaku a ndzi na nandzu,

Ni leswaku a ku na munhu la nga ndzi lamulelaka evokweni ra wena.

₈Mavoko ya wena ma ndzi vumbile,

Ma ndzi hetisisa hinkwako.

Kasi u rhandza ku ndzi mita!

₉Wa nga anakanya leswaku u ndzi vumbile kukota vumba;

Kutani u ri ndzi tlhelela entshurini xana?

₁₀Xana a ku ndzi chululanga kukotisa ntswamba?

U ndzi minya kukota masi layo tiya!

₁₁Xana a ku ndzi funengetanga hi nhlonge leyi nga le mirini,

Ni ku ndzi tiyisa hi marhambu ni misiha-ke?

₁₂U ndzi hile vutomi ni tintswalo,

Ku tsetselela ka wena ku ndzi sirhelele ku hefemula ka mina.

₁₃Kambe embilwini ya wena u fihlile timhaka,

Ndzi tiva leswi u swi khumbuleke eka wena.

₁₄Loko ndzi dyohile, u ndzi siya,

Wa ala ku ndzi khomela milandzu ya mina.

₁₅Loko ndzi ri ni nandzu, i khombo ra mina!

Loko ndzi nga ri na nandzu, ndzi chava ku tlakusa nhloko,

Hikuva ndzi xurhile tingana, ndzi vona makhombo ya mina.

₁₆Loko ndzi nga yimisa nhloko, u ta ndzi tsutsumela kukotisa nghala,

U engetela mahlori ya wena ehenhla ka mina.

₁₇U ndzi humesela kambe timbhoni ta wena,

U lwa, u andzisela vukari bya wena,

U ndzi tela hi mavandla ku ta ndzi hlasela.

₁₈“ ‘Yo! U ndzi humesele yini ekhwirini ri manana?

Ingi ndzi file kona, ndzi nga voniwi hi tihlo ra munhu;

₁₉A ndzi ta kota lava nga riki kona;

Ingi ndzi nghenisiwe esirheni ndza ha huma ekhwirini.

₂₀Masiku ya mina i mangani-ke?

Loko swi ri tano, ndzi tshike,

Ndzi tlhela ndzi tlakusa mombo switsanana,

₂₁Ndzi nga si famba laha ndzi nga tiki tlhela ndzi vuya kona,

Etikweni ra munyama ni le ndzhutini wa rifu,

₂₂Ri nga tiko ra ntima kukota vusiku lebyikulu,

Tiko ra ndzhuti wa rifu ni wa mpfilumpfilu,

Laha ku vonakala ku fanaka ni munyama.’ ”