YOHANE 3

₁A ku ri ni munhu wa ka Vafarisi, vito ra yena a a ri Nikodema; a a ri hosanyana ya Vayuda; ₂a ta eka Yesu nivusiku, a ku eka yena: “Rabi, ha swi tiva leswaku u mufundhisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.” ₃Yesu a hlamula, a ku eka yena: “Kunenenene ndzi ri eka wena: Loko munhu a nga tswariwi ra vumbirhi, a nga ka a nga voni ku fuma ka Xikwembu.” ₄Nikodema a ku eka yena: “Xana munhu loko a dyuharile, a nga tswarisiwa ku yini? Xana a nga tlhela a vuyela ekhwirini ra mana wa yena, a tlhela a tswariwa xana?” ₅Yesu a hlamula, a ku: “Kunenenene ndzi ri eka wena: Loko munhu a nga tswariwi hi mati ni Moya, a nga ka a nga ngheni eku fumeni ka Xikwembu. ₆Leswi tswariweke hi nyama, i nyama; kambe leswi tswariweke hi Moya, i Moya. ₇U nga hlamali loko ndzi ku eka wena: ‘Swa fanela leswaku mi tswariwa ra vumbirhi.’ ₈Moya wu hungela laha wu rhandzaka kona, kutani u twa mpfumawulo wa wona, kambe a ku tivi laha wu humaka kona, ni laha wu yaka kona. Swi tano ni ka hinkwavo lava tswariweke hi Moya.” ₉Nikodema a hlamula, a ku eka yena: “Swilo leswi, swi nga endlekisa hi ku yini xana?” ₁₀Yesu a n'wi hlamula, a ku: “U mufundhisi wa Israele, kasi a ku tivi timhaka leti xana? ₁₁Ndzi vurisile ndzi ri eka wena: Hi vula leswi hi swi tivaka, kutani hi vula vumbhoni bya leswi hi swi voneke; kambe a mi amukeri vumbhoni bya hina.

₁₂“Kungakuloko ndzi mi byela swa laha emisaveni, kutani mi nga pfumeri, xana mi ta pfumerisa ku yini loko ndzi mi byela swa le tilweni? ₁₃A ku na munhu la tshamaka a tlhandlukela etilweni, loko a nga ri la xikeke etilweni, a nga N'wana wa Munhu la nga etilweni. ₁₄Kukotisa Muxe loko a hayekile nyoka emananga, N'wana wa Munhu u fanekele ku hayekisiwa sweswo; ₁₅leswaku un'wana ni un'wana la pfumelaka eka yena a nga tshuki a lova, kambe a va ni vutomi lebyi nga heriki.” ₁₆Hikuva Xikwembu xi rhandzile misava swonghasi, xi ko xi nyika N'wana wa xona la nga tswariwa a ri swakwe, leswaku un'wana ni un'wana la pfumelaka eka yena, a nga tshuki a lova, kambe a va ni vutomi lebyi nga heriki. ₁₇Hikuva Xikwembu a xi rhumanga N'wana wa xona emisaveni ku ta avanyisa misava, kambe hileswaku misava yi ponisiwa ha yena. ₁₈La pfumelaka eka yena, a nga avanyisiwi; kambe la nga pfumeriki, wa avanyisiwa, hikuva a nga pfumelangi vito ra N'wana wa Xikwembu la nga tswariwa a ri swakwe. ₁₉Ku avanyisa hi kuloku: Ku vonakala ku tile emisaveni, kambe vanhu va rhandzile munyama ku tlurisa ku vonakala, hikuva mitirho ya vona a yi ri leyo biha. ₂₀Hikuva un'wana ni un'wana la endlaka leswo biha, u venga ku vonakala, kutani a nga ti eku vonakaleni, mitirho ya yena yi nga ti tshuka yi tshinyiwa. ₂₁Kambe la endlaka swinene, wa ta eku vonakaleni, mitirho ya yena yi ta vonaka leswaku yi endleriwa Xikwembu.

₂₂Endzhaku ka sweswo, Yesu a ya etikweni ra Yudiya a ri ni vadyondzisiwa va yena, kutani a tshama kona na vona, a khuvula vanhu. ₂₃Yohane na yena, a a khuvula le Enoni, ekusuhi na Salime, hikuva mati a ma tele kona, ni vanhu a va ya kona ku ya khuvuriwa; ₂₄hikuva Yohane a a nga si nghenisiwa ekhotsweni.

₂₅Kutani ku humelela ku kanetana emhakeni ya ku tibasisa exikarhi ka vadyondzisiwa va Yohane ni Vayuda. ₂₆Va ta eka Yohane va ku eka yena: “Rabi, loyi ngi u ri na yena entsungeni wa hase wa Yordani, loyi u nga vula vumbhoni ehenhla ka yena, wa khuvula na yena, kutani hinkwavo va ya eka yena.” ₂₇Yohane a hlamula, a ku: “Munhu a nga ka a nga amukeri nchumu loko xi nga ri lexi a xi nyikiweke hi tilo. ₂₈N'wina mi timbhoni ta mina leswaku ndzi vurile ndzi ku: ‘A hi mina Kriste, kambe ndzi rhumiwile ku n'wi rhangela emahlweni.’ ₂₉Loyi a fuwaka mutekiwa, i muteki; kambe xangwana ya muteki leyi yimaka yi n'wi yingisa, yi tsaka hi ku tsaka lokukulu, loko yi twa rito ra muteki; hi kona ku tsaka ka mina loku hetisekeke. ₃₀Yena u fanele ku kula, mina ndzi tsongahala.” ₃₁La humaka etilweni u le henhla ka hinkwavo; la humaka emisaveni, i wa misava, kutani u vulavula hi swa misava; la humaka etilweni u le henhla ka hinkwavo. ₃₂Kutani lexi a xi voneke, ni lexi a xi tweke, hi lexi a xi tiyisaka; kambe a ku na munhu la amukelaka vumbhoni bya yena. ₃₃La amukelaka vumbhoni bya yena, u tiyisile leswaku Xikwembu xa tshembeka. ₃₄Hikuva la rhumiweke hi Xikwembu, u vula marito ya Xikwembu, hikuva Xikwembu xi n'wi nyika Moya ku nga ri hi mpimo. ₃₅Tatana u rhandza N'wana, u vekile swilo hinkwaswo emavokweni ya yena. ₃₆La pfumelaka eka N'wana, u ni vutomi lebyi nga heriki; kambe la nga yingisiki N'wana, a nga ka a nga voni vutomi, kambe ku kariha ka Xikwembu ku tshame ehenhla ka yena.