YOHANE 16

₁“Ndzi mi byerile timhaka leti, leswaku mi nga tshuki mi khunguvanyeka. ₂Va ta mi hlongola emasinagogeni; kambe nkarhi wa ta lowu un'wana ni un'wana la nga ta mi dlaya a nga ta ehleketa leswaku u tirhela Xikwembu. ₃Va ta mi endla hinkwaswo leswi, hikuva a va tivi Tatana na mina. ₄Kambe ndzi mi byerile timhaka leti, leswaku loko nkarhi wa tona wu fikile, mi ta tsundzuka leswaku ndzi mi byerile tona. A ndzi mi byelanga tona ka ha ri eku sunguleni, hikuva a ndzi ri na n'wina.

₅“Sweswi, ndzi ya eka loyi a ndzi rhumeke, kutani a ku na un'we wa n'wina la ndzi vutisaka, a ku: ‘U ya kwihi?’ ₆Kambe leswi ndzi mi byeleke sweswo, timbilu ta n'wina ti tele tingana. ₇Hambiswiritano, ndza mi byela leswi tiyeke, ndzi ri: Swi sasekile eka n'wina loko ndzi famba; hikuva loko ndzi nga fambi, Muchaveleri a nga ka a nga ti eka n'wina; kambe loko ndzi famba, ndzi ta n'wi rhuma eka n'wina. ₈Kutakuloko yena a ta, u ta khorwisa misava leswaku ku dyoha ku kona, ni ku lulama, ni ku avanyisa. ₉Ku dyoha ku kona, hikuva a va pfumeri eka mina; ₁₀ku lulama ku kona, hikuva ndzi ya eka Tatana, kutani a mi nga tshami mi ndzi vona; ₁₁ku avanyisa ku kona, hikuva hosi ya misava leyi, yi avanyisiwile.

₁₂“Ndza ha ri ni timhaka leto tala leti ndzi nga mi byelaka tona, kambe loko ku ri sweswi, ti nga mi tikela. ₁₃Kambe kutakuloko yeloyi a ta, wu nga Moya wa ntiyiso, wu ta mi fambisa entiyisweni hinkwawo; hikuva wu nga ka wu nga vulavuri wu tisungulela swa wona; kambe hinkwaswo leswi wu swi tweke, wu ta swi vula; na swona wu ta mi tivisa leswi nga ta ta. ₁₄Wona wu ta ndzi dzunisa, hikuva wu ta teka leswi nga swa mina, wu mi tivisa swona. ₁₅Hinkwaswo leswi Tatana a nga na swona, i swa mina; hikwalaho ndzi nge: Wu ta teka leswi nga swa mina, wu mi tivisa swona.

₁₆“Ku nga ri kungani, a mi nga ha ndzi voni; kambe ku nga ri kungani, mi ta tlhela mi ndzi vona hikuva ndzi ya eka Tatana.” ₁₇Vadyondzisiwa va yena van'wana va vutisana; va ku: “Mhaka leyi a hi byelaka yona, hi leyo yini, loko a ku: ‘Ku nga ri kungani mi nga ka mi nga ha ndzi voni, kambe ku nga ri kungani mi ta tlhela mi ndzi vona’; ni loko a ku: ‘Ndzi ya eka Tatana’?” ₁₈Kutani a va ku: “Hi ku yini loko a ku: ‘Ku nga ri kungani’? A hi tivi lexi a xi vulaka.”

₁₉Kuteloko Yesu a tiva leswaku va rhandza ku n'wi vutisa, a ku eka vona: “Mi vutisana lexi ndza ha ku xi vulaka, loko ndzi te: ‘Ku nga ri kungani mi nga ka mi nga ha ndzi voni, kambe ku nga ri kungani, mi ta tlhela mi ndzi vona’? ₂₀Ndzi vurisile ndzi ri eka n'wina: Mi ta rila, mi va mi kolola, kutani yona misava yi ta tsaka; mi ta va ni ku vaviseka, Kambe ku vaviseka ka n'wina ku ta hundzuka ku tsaka. ₂₁Loko wansati a veleka, u twa ku vaviseka, hikuva nkarhi wa yena wu fikile; kambe loko a velekile n'wana, a nga ha anakanyi ku xaniseka ka yena, hi ku tsaka ka yena, hikuva ku velekiwile munhu emisaveni. ₂₂Na n'wina ma vaviseka sweswi, kambe ndzi ta tlhela ndzi mi vona, timbilu ta n'wina ti ta tsaka, kutani a ku na munhu la nga ta mi tekela ku tsaka ka n'wina.

₂₃“Hi siku rero, a mi nga ndzi vutisi nchumu. Ndzi vurisile ndzi ri eka n'wina: Swilo hinkwaswo leswi mi nga ta swi kombela eka Tatana hi vito ra mina, u ta mi nyika swona. ₂₄Ku fikela sweswi, a mi si kombela nchumu hi vito ra mina; kombelani, mi ta nyikiwa, leswaku ku tsaka ka n'wina ku hetiseka.

₂₅“Ndzi mi byerile timhaka leti, hi swifaniso; kambe nkarhi wa ta, lowu ndzi nga taka ndzi nga mi byeri nchumu hi swifaniso; kambe ndzi ta mi tivisa swa Tatana hi ku hlamusela. ₂₆Enkarhini wolowo, mi ta kombela hi vito ra mina, kambe a ndzi mi byeri leswaku ndzi ta mi khongelela eka Tatana; ₂₇hikuva na yena Tatana wa mi rhandza, hikuva mi ndzi rhandzile, ni ku pfumela leswaku ndzi huma eka Xikwembu. ₂₈Ndzi humile eka Tatana, kutani ndzi tile emisaveni; sweswi, ndzi tlhela ndzi suka emisaveni ndzi ya eka Tatana.”

₂₉Vadyondzisiwa va yena va ku eka yena: “Waswivo, sweswi, u hlamuserile, a wa ha vulavuri hi xifaniso. ₃₀Sweswi, ha swi tiva leswaku u tiva hinkwaswo, a ku faneri ku vutisiwa nchumu hi munhu; hikwalaho ha pfumela leswaku u huma eka Xikwembu.” ₃₁Yesu a va hlamula, a ku: “Sweswi, ma pfumela xana? ₃₂Vonani, nkarhi wa ta, ni sweswi, wu tile, lowu mi nga ta hangalaka ha wona, un'wana ni un'wana a famba hi ndlela ya yena, mi ndzi siya ndzi ri swanga, kambe a ndzi swanga hikuva Tatana u na mina. ₃₃Ndzi mi byerile timhaka leti, leswaku mi va ni ku rhula ka mina. Mi ta va ni nhlomulo emisaveni, kambe tiyisani timbilu, ndzi hlurile misava.”