YOHANE 13

₁Nkhuvo wa Paseka loko wu lave ku va kona, Yesu, hi ku tiva leswaku nkarhi wa yena wu fikile wa ku suka emisaveni, ni ku ya eka Tata wa yena, leswi a nga rhandza vanhu va yena va le misaveni, u va rhandze ni ku yisa eku heteleleni. ₂Kuteloko ka ha laleriwa, hikuva Diyavulosi a a rhangile a nghenisa embilwini ya Yudasi Iskariyota, n'wana Simoni, ku navela ku n'wi xenga. ₃Yesu, hi ku tiva leswaku Tata wa yena u vekile hinkwaswo emavokweni ya yena, ni leswaku u humile eka Xikwembu, kutani u ya eka Xikwembu, ₄a suka a yima exilalelweni, a tshunxa nguvu ya yena, a teka nceka, a titsimba ha wona. ₅Kutani a chela mati enkambaneni, a sungula ku hlantswa milenge ya vadyondzisiwa va yena, a sula hi nceka lowu a titsimbeke ha wona. ₆A ta ni ka Simoni Petro; yeloyi a ku eka yena: “Hosi, xana wena u ta ndzi hlantswa milenge xana?” ₇Yesu a n'wi hlamula, a ku: “Sweswi, a ku twisisi lexi ndzi xi endlaka, kambe u ta xi twisisa endzhaku.” ₈Petro a ku eka yena: “U nga ka u nga ndzi hlantswi milenge, ni siku ni rin'we!” Yesu a n'wi hlamula, a ku: “Loko ndzi nga ku hlantswi, a wu na mhaka na mina.” ₉Simoni Petro a ku eka yena: “Hosi yi nga vi milenge ntsena, kambe na wona mavoko ni nhloko.” ₁₀Yesu a ku eka yena: “La hlantswiweke a nga na ku hlantswiwa loko yi nga ri milenge ntsena, kutani u ta basa hinkwako; loko mi ri n'wina, mi basile, kambe a hi hinkwenu.” ₁₁Hikuva a a tiva la nga ta n'wi xenga; hikwalaho a nga te: “A mi basanga hinkwenu.”

₁₂Kuteloko a hlantswile milenge ya vona, a tekile ni nguvu ya yena, a tlhela a ya tshama etafuleni, a ku eka vona: “Xana ma swi twisisa leswi ndzi mi endleke swona-ke? ₁₃Mi ndzi vula Mufundhisi ni Hosi, swona ma vurisa, hikuva ndzi yena. ₁₄Kutani loko mina ndzi nga Hosi ni Mufundhisi, ndzi mi hlantswile milenge, na n'wina mi fanele ku hlantswana milenge. ₁₅Hikuva ndzi mi vekele ntila, leswaku mi endla kukotisa leswi ndzi mi endleke swona.

₁₆“Ndzi vurisile ndzi ri eka n'wina: Nandza a hi nkulu eka hosi ya yena ni murhumiwa a hi nkulu eka la n'wi rhumeke. ₁₇Loko mi tiva timhaka teto, mi katekile loko mi ti endla. ₁₈A ndzi vuri n'wina hinkwenu, ndzi tiva lava ndzi va hlawuleke; kambe hileswaku Tsalwa ri ta endleka leri nge: ‘La dyaka vuswa na mina, u ndzi khadlanyile hi xirhendze.’ ₁₉Ndzi mi byela mhaka leyi, kaharhi sweswi, yi nga si humelela, leswaku siku yi humelelaka, mi ta pfumela leswaku hi mina Kriste. ₂₀Ndzi vurisile ndzi ri eka n'wina: La amukelaka loyi ndzi n'wi rhumaka, u mukela mina; la ndzi amukelaka, u amukela la ndzi rhumeke.”

₂₁Kuteloko Yesu a vurile timhaka teto, a vaviseka emoyeni, a tiyisa, a ku: “Ndzi vurisile ndzi ri eka n'wina: Un'wana wa n'wina u ta ndzi xenga.” ₂₂Kwalaho vadyondzisiwa va yena va langutana, va kanakana leswaku u hlambanyisa mani xana. ₂₃Kambe un'wana wa vadyondzisiwa va yena, loyi Yesu a n'wi rhandzaka, a tiseketele exifuveni xa Yesu. ₂₄Kutani Simoni Petro a n'wi tshunyeta ku vutisa leswaku a vula mani. ₂₅Yeloyi, kuteloko a korhamile exifuveni xa Yesu, a n'wi vutisa, a ku: “Hosi, i mani xana?” ₂₆Yesu a hlamula, a ku: “Hi loyi ndzi nga ta n'wi nyika xiphemu loko ndzi petile.” Kuteloko a petile, a xi nyika Yudasi Iskariyota, n'wana Simoni. ₂₇Kuteloko a tekile xiphemu, Satana a nghena eka yena. Kutani Yesu a ku eka yena: “Leswi u swi endlaka, hatlisa u swi endla.” ₂₈Kambe a ku vanga na un'we wa lava tshameke eswakudyeni, la nga twisisa laha marito lawa ma yisaka kona. ₂₉Hikuva van'wana a va anakanya leswaku leswi Yudasi a nga yena mutameri wa nkwama wa mali, kumbe Yesu a a n'wi byela ku xavela nkhuvo leswi va swi pfumalaka, hambi ku ri ku nyika xisiwana leswo karhi. ₃₀Kuteloko a tekile xiphemu, a hatlisa a huma, byi ri vusiku.

₃₁Kuteloko a humile, Yesu a ku: “Sweswi, N'wana wa Munhu u dzunisiwile, kutani Xikwembu xi dzunisiwile ha yena. ₃₂Loko Xikwembu xi dzunisiwe ha yena, na xona Xikwembu xi ta n'wi dzunisa eka xona, kambe xi ta hatlisa xi n'wi dzunisa.

₃₃“Vana vanga, ndza ha ri na n'wina ku nga ri kungani, mi ta ndzi lava, kambe hilaha ndzi nga byela Vayuda hakona, ndzi ku: ‘Laha ndzi yaka kona, mi nga ka mi nga ti sweswi, ndzi vurisa sweswo eka n'wina.’ ₃₄Ndzi mi vekela nawu lowuntshwa, hileswaku mi rhandzana; kukotisa leswi ndzi mi rhandzeke, rhandzanani, na n'wina. ₃₅Kungakuloko mi rhandzana, hilaha hinkwavo va nga ta tiva leswaku mi vadyondzisiwa va mina.”

₃₆Simoni Petro a ku eka yena: “Hosi, u ya kwihi?” Yesu a n'wi hlamula, a ku: “Laha ndzi yaka kona, u nga ka u nga ndzi landzi sweswi; kambe ndzhaku u ta ndzi landzela kona.” ₃₇Petro a ku eka yena: “Hosi, ndzi nga tsandzeka ha yini ku ku landza sweswi, xana? A ndzi ta tshika vutomi bya mina hikwalaho ka wena.” ₃₈Yesu a n'wi hlamula, a ku: “U ri u nga tshika vutomi bya wena hikwalaho ka mina xana? Ndzi vurisile ndzi ri eka wena: Nkuku loko wu nga si ringa, u ta va u ndzi landzurile kanharhu.