YOHANE 11

₁A ku ri ni munhu la vabyaka, a nga Lazaro wa Betaniya, wa muti wa Mariya na Marta makwavo. ₂Kambe Mariya hi yena loyi a nga tota Hosi hi mafurha lama nun'hwelaka, a n'wi sula milenge hi misisi ya yena; kutani makwavo Lazaro a a vabya. ₃Vamakwavo va rhuma eka Yesu va ku eka yena: “U nga vona, Hosi, loyi u n'wi rhandzaka wa vabya.” ₄Kuteloko Yesu a swi twile, a ku: “Ku vabya loku, a ku yisi eku feni, kambe ku yisa eku dzuniseni ka Xikwembu, leswaku N'wana wa Xikwembu a dzunisiwa hakona.”

₅Kambe Yesu a a rhandza Marta ni makwavo, na Lazaro. ₆Kambe, hambi a twile leswaku wa vabya, a tshama masiku mambirhi kwalaho ingi a ri kona. ₇Kutani ndzhaku ka swona, a ku eka vadyondzisiwa va yena: “A hi tlheleni hi ya eYudiya.” ₈Vadyondzisiwa va ku eka yena: “Rabi, Vayuda va ha ku lava ku ku khandla hi maribye, kasi u engeta u tlhelela kona xana?” ₉Yesu a hlamula, a ku: “Xana mikarhi ya siku rin'we a hi khume na mambirhi xana? Loko munhu a famba ninhlekanhi, a nga ka a nga khunguvanyeki, hikuva u vona ku vonakala ka misava leyi; ₁₀kambe loko munhu a famba nivusiku, a nga khunguvanyeka, hikuva a ku na ku vonakala eka yena.”

₁₁Kuteloko a vulavule sweswo, a ku eka vona: “Lazaro, murhandziwa wa hina, u etlele, kambe ndzi ta ya n'wi pfuxa.” ₁₂Kutani vadyondzisiwa va ku eka yena: “Hosi, loko a etlele, u ta hanya.” ₁₃Kasi Yesu a a vula ku fa ka yena; kambe vona a va anakanya leswaku u vula vurhongo byinene. ₁₄Kutani Yesu a va hlamusela, a ku: “Lazaro u file, ₁₅kutani ndzi tsakile hikwalaho ka n'wina, leswi ngi a ndzi nga ri kona, leswaku mi pfumela; kambe a hi yeni eka yena.” ₁₆Tomasi, lo va ngi Didima, a ku eka vanakulobye: “A hi yeni na hina, hi ta fa na yena.”

₁₇Yesu, kuteloko a fikile, a n'wi kuma a ri ni mune wa masiku esirheni. ₁₈Kambe Betaniya a a ri ekusuhi na Yerusalema, a ku lava ku va mpfhuka wa tistadiya ta khume na ntlhanu. ₁₉Kambe Vayuda lavo tala a va tile eka Marta ni ka Mariya ku ta va chavelela hikwalaho ka makwavo.

₂₀Kuteloko Marta a twile leswaku Yesu wa ta, a ya hlangana na yena; kambe Mariya a tshamisa endlwini. ₂₁Kutani Marta a ku eka Yesu: “Hosi, loko ngi a wu ri kona, ingi makwerhu a nga fanga. ₂₂Kambe ndza swi tiva ni sweswi, leswaku hinkwaswo leswi u nga ta swi kombela eka Xikwembu, Xikwembu xi ta ku nyika swona.” ₂₃Yesu a ku eka yena: “Makwenu u ta pfuka.” ₂₄Marta a ku eka yena: “Ndza swi tiva leswaku u ta pfuka hi siku ra makumu, eku pfukeni ka vafi.” ₂₅Yesu a ku eka yena: “Hi mina ku pfuka ni vutomi; la pfumelaka eka mina, hambi a file, u ta hanya. ₂₆Un'wana ni un'wana la hanyaka, a va a pfumela eka mina, a nga ka a nga fi, ni siku ni rin'we. Xana wa pfumela sweswo xana?” ₂₇A ku eka yena: “Ina, Hosi, ndza pfumela leswaku hi wena Kriste, N'wana wa Xikwembu, loyi a fanekeleke ku ta emisaveni.”

₂₈Kuteloko a vurile sweswo, a ya vitana Mariya makwavo exihundleni a ku: “Mufundhisi u kona, wa ku vita.” ₂₉Kuteloko Mariya a swi twa, a hatlisa a suka, a ta eka yena. ₃₀Kambe Yesu a a nga si fika emutini, a a ha tshamisile laha Marta a nga hlangana na yena kona. ₃₁Kutani Vayuda lava ngi va ri endlwini na yena, va n'wi chavelela; loko va n'wi vona a suka hi ku hatlisa a humela ehandle, va n'wi landzela, va ku: “A ya esirheni ku ya rila kona.” ₃₂Kuteloko Mariya a fikile laha Yesu ingi a ri kona, a n'wi vona, kutani a tiwisela emilengeni ya yena, a ku eka yena: “Hosi, loko ngi a wu ri kona, ingi makwerhu a nga fanga.” ₃₃Yesu loko a n'wi vona a ri karhi a rila, ni Vayuda lava nga n'wi heleketa va rila na vona, a tlhaveka emoyeni, a twa ku vaviseka, a ku: “Mi n'wi veke kwihi?” ₃₄Va ku eka yena: “Tana Hosi, u ta vona.” ₃₅Kutani Yesu a rila.

₃₆Kavaloko Vayuda va ku: “Vonani! A a n'wi rhandzisa ku yini!” ₃₇Van'wana exikarhi ka vona va ku: “Yeloyi a nga hanyanyisa mahlo ya lavo fa mahlo, u tsandzekile ha yini ku endla leswaku na yena munhu loyi a nga tshuki a fa xana?”

₃₈Yesu a engeta a tlhaveka embilwini ya yena, a ya esirheni. Kambe sirha a ri ri bakwa, kutani ribye a ri pfarile nyangwa ya rona. ₃₉Yesu a ku: “Susani ribye.” Marta, makwavo wa mufi, a ku eka yena: “Hosi, kambe wa nun'hwa, hikuva u ni mune wa masiku a ri kwala.” ₄₀Yesu a ku eka yena: “Xana a ndzi ku byelanga leswaku loko u pfumela u ta vona ku kwetsima ka Xikwembu xana?” ₄₁Kavaloko va susa ribye, laha mufi ingi a vekiwile kona; kutani Yesu a tlakusela mahlo ehenhla, a ku: “Tatana, ndza ku khensa hikuva u ndzi yingisile. ₄₂Ndza swi tiva leswaku wa ndzi yingisa hi masiku kambe ndzi vurisa sweswo hikwalaho ka ntshungu lowu ndzi rhendzeleke, leswaku va pfumela leswaku hi wena la ndzi rhumeke.” ₄₃Kuteloko a vule sweswo, a huwelela hi rito lerikulu, a ku: “Lazaro, humela ehandle!” ₄₄Kutani mufi a huma a tsondzeriwe milenge ni mavoko hi tinguvu; emombyeni, a funengetiwe hi duku. Yesu a ku eka vona: “N'wi tshunxeni a tifambela.”

₄₅Lavo tala eka Vayuda lava teke eka Mariya, loko va vona leswi Yesu a swi endleke, va pfumela eka yena. ₄₆Kambe van'wana exikarhi ka vona va ya eka Vafarisi, va va byela leswi Yesu a swi endleke.

₄₇Kutani vaprista lavakulu ni Vafarisi va hlengeleta huvo, va ku: “Hi ta endla yini leswi munhu loyi a endlaka masingita layo tala? ₄₈Loko hi n'wi tshika a endla sweswo, hinkwavo va ta pfumela eka yena, kutani Varhoma va ta ta lovisa muti wa hina ni tiko ra hina.” ₄₉Un'wana wa vona, Kayafasi, loyi ngi a ri muprista lonkulu hi lembe rero, a ku eka vona: ₅₀“N'wina, a mi tivi nchumu, a mi ehleketi leswaku swi nga saseka eka hina loko munhu a ri un'we a fela tiko, tiko hinkwaro ri nga tshuki ri lova.” ₅₁Kambe a nga vurisanga sweswo a tisungulela, kambe, hikuva a a ri muprista lonkulu hi lembe rero, a bvumbha leswaku Yesu u fanele ku fela tiko; ₅₂ku nga ri ku fela tiko ntsena, kambe hileswaku, a hlengeleta swin'we vana va Xikwembu lava hangalakeke.

₅₃Ku sungula siku rero, va kanela swin'we leswaku va ta n'wi dlaya. ₅₄Hikwalaho, Yesu a nga ha tshamanga a famba erivaleni, exikarhi ka Vayuda; kambe a suka kwalaho, a ya etikweni leri nga ekusuhi ni mananga emutini lowu vuriwaka Efrayimi, a ya tshama kona ni vadyondzisiwa va yena.

₅₅Paseka ya Vayuda a yi ri ekusuhi, kutani lavo tala va suka etikweni va tlhandlukela eYerusalema, ku ya tibasisa kona, Paseka yi nga si fika. ₅₆Kutani va lava Yesu, va yima etempeleni, va vutisana, va ku: “N'wina-ke loko mi anakanya, mi ri yini? Xana a nga ka a nga ti enkhubyeni?” ₅₇Kambe vaprista lavakulu ni Vafarisi a va endlile nawu leswaku loko munhu a tiva laha a nga kona, a va tivisa, leswaku a ta khomiwa.