Ta vana va Amoni.
1Ku vula Yehovha: “Xana Israele a nga na vana, xana a nga na mudyandzhaka xana? Milikomo u dyela yini ndzhaka ya Gadi, ni tiko ra yena ri akise ku yini emitini ya yena? 2Hikwalaho ma ta ta masiku lawa, ku vula Yehovha, ndzi nga ta ba ha wona nkosi wa nyimpi ehenhla ka Rhaba wa vana va Amoni, u ta endla rhumbi; kutani miti ya vona yi ta hisiwa hi ndzilo; kutani Israele u ta fuwa ndzhaka ya lava ngi va n'wi fuwile, ku vula Yehovha. 3Kololani Hexiboni! Hikuva Ayi wu onhiwile; huwelelani vana va Rhaba, mi ambala tinguvu to khwaxa; rilani, mi famba erirhangwini, hikuva Milikomo u ta yisiwa ekhotsweni swin'we ni vaprista ni tindhuna ta yena.
4“U tidzunisela yini hi mikova, hi nkova lowu pfelelaka mati, n'wana wa wansati la tiarisaka, la tidzuniselaka rifuwo ra wena, u ku: ‘I mani la nga ndzi hundzukelaka xana?’ 5Vona, ndzi ta tisa nkosi eka wena ku vula Hosi, Yehovha wa tinyimpi, hi matlhelo hinkwawo ya wena; kutani mi ta hangalaka un'wana ni un'wana hitlhelo ra yena, ku nga ri na la hlengeletaka lava hangalakeke. 6Kambe endzhaku ndzi ta tlherisa lava nga ya eku bohiweni va vana va Amoni, ku vula Yehovha.”
Ta Vaedomu.
7Ku vula Yehovha wa tinyimpi: “Xana a ka ha tlharihanga eTemani? Xana miehleketo yi lahlekile eka vatsundzuxi-ke? Xana vutlhari bya vona byi herile? 8Tsutsumani, mi fularha, mi aka exihundleni, n'wina vaaki va ka Dedani! Hikuva ndzi ta tisela Esawu khombo siku ndzi n'wi holovelaka. 9Loko ngi vatshoveri va vhinya va nghena eka wena, a va ta siya masalela xana? Loko ngi ma ri makhamba ya vusiku, ma ta onha leswi ma swi kotaka. 10Kambe mina ndzi hluvurile Esawu, ndzi hahlule vuchavelo bya yena, kutani a ku nga ha tumbeleki; rixaka ra yena ri onhiwile, ni vamakwavo, ni lava akeke na yena; a ka ha salangi munhu. 11U nga siya swisiwana swa wena, mina ndzi ta swi hanyisa, na vona vasati va tinoni va wena va ta ndzi tshemba.”
12Hikuva Yehovha u te: “Vonani, lava va nga faneriki ku nwa, va ta nwa endzhekweni lowo, kutani wena u nga ka u nga holoveriwi ha yini-ke? U nga ka u nga tshikiwi u nga holoveriwi, kambe u fanela ku nwa. 13Hikuva ndzi hlambanya ha mina ku vula Yehovha, leswaku Bosira u ta hundzuka tiko ra ku oma, ni ku tsan'wiwa, ni ku onhaka, ni ku rhukaniwa; ni miti hinkwayo ya kona yi ta va marhumbi hilaha ku nga heriki.”
14Ndzi twile ku tivisiwa ku huma eka Yehovha, ni mulerisi la rhumiweke ematikweni, a ku: “Hlengeletanani, mi n'wi hundzukela, mi pfukela nyimpi.” 15Hikuva vonani, ndzi ta ku endla lontsongo exikarhi ka matiko, ni la sandziwaka exikarhi ka vanhu. 16Ku tikukumuxa ka wena ni ku tikurisa ka mbilu ya wena, swi ku kanganyisile wena la akeke etinfeni ta maribye u tshamile etihlohlorhini ta switsunga, ni loko u nga aka yindlu ya wena ehenhla ngopfu, u kotisa gama, ndzi ta ku wisa kona, ku vula Yehovha. 17“Edomu u ta huma a ri rhumbi ntsena un'wana ni un'wana la hundzaka eka yena u ta hlamala, a ba miloti hikwalaho ka makhombo ya yena hinkwawo. 18Kukotisa leswi swi tshamaka swi va kona eku hetiweni ka Sodoma na Gomora ni ka miti ya ekusuhi na kona, ku vula Yehovha, ku nga ka ku nga aki munhu kona, hambi a ri n'wana wa munhu ku tiakela kona.
19“Vona, kukota nghala, u huma eswihlahleni swa Yordani, u tlhandlukela evuakweni lebyo tiya; kan'we ndzi ta balekisa Edomu, a suka kona; kutani yeloyi ndzi n'wi hlawuleke, ndzi ta lerisa yena ehenhla ka byona. Hikuva i mani la kotaka mina? I mani la nga ndzi vitelaka ehubyeni? I mani, murisi la nga yimaka emahlweni ka mina?
20“Hikwalaho, yingisani makungu ya Yehovha lawa a ma kaneleleke Edomu, ni miehleketo ya yena leyi a yi anakanyeleke vaaki va Temani: Hakunene va ta ta va koka kukota leswitsongo swa ntlhambi; hakunene vuako bya vona byi ta onhiwa swin'we na vona!
21“Hi mpfumawulo wa kuwa ka vona, misava yi tsekatseka; rito ra ku kolola ka vona ri twakala eLwandle-ro-Tshwuka. 22Vonani, wa tlhandluka kukota gama, u haha, u andlala timpapa ta yena hitlhelo ra Bosira, kutani hi siku lero timbilu ta tinhenha ta Edomu ti ta kota mbilu ya wansati la velekaka.”
Ta Damaska.
23“Hamata u khomisiwe tingana na Aripadi; hikuva va twile mhaka yo biha, va tsanile; i lwandle leri bobomaka, ri hluleka ku miyela. 24Damaska u tsanile, u tilunghisele ku baleka, kambe wa rhurhumela; khombo ni ku vaviseka ku n'wi khomile kukotisa loyi a velekaka. 25Swi lo yini-ke, muti wa vubombi, muti wa ku tsakisa ka mina, a wu tshikiwanga? 26Hikwalaho majaha ya kona ma ta wa emitsendzeleni, tinhenha hinkwato ti ta hetiwa hi siku rero ku vula Yehovha wa tinyimpi. 27Ndzi ta tshivela ndzilo erirhangwini ra Damaska, ndzi ta heta makhokholo ya Bene-Hadada.”
Ta Vaarabiya.
28Eka Kedari, ni ka ku fuma ka Hasoro, loku Nebukadnetsara, Hosi ya Babilona, a tshamaka a ku hlula. Ku vula Yehovha: “Sukani, mi tlhandlukela eKedari, mi onha vana va le vuxeni. 29Mi nga phanga matende ya vona, ni tinyimpfu ta vona, ni mitsonga ya vona, ni tinhundzu ta vona, ni tikamela ta vona, kutani mi huwelela, mi ku: ‘Ka chavisa matlhelo hinkwawo.’ 30Tsutsumani, mi hatlisa ngopfu, mi aka exihundleni, n'wina vaaki va Hasoro, ku vula Yehovha; hikuva Nebukadnetsara, Hosi ya Babilona, u mi kanele makungu, u mi anakanyele mhaka.
31“Sukani, mi tlhandlukela eka tiko leri rhuleke, laha va akeke hi ku tshemba, ku vula Yehovha. A ku na tinyangwa, hambi tinghole eka vona, va ake swavo. 32Tikamela ta vona ti ta phangiwa, ni mitlhambi leyo tala ya vona yi ta byisiwa. Kutani ndzi ta haxa lava byewulaka ripala emimoyeni hinkwayo, kutani ndzi ta va humesela makhombo hi matlhelo hinkwawo, ku vula Yehovha. 33Kutani Hasoro u ta va tshanga ra timhungubye ni mananga, hilaha ku nga heriki. Ku nga ka ku nga aki munhu kona, hambi a ri n'wana wa munhu ku tiakela kona.”
Ta Elamu.
34Rito ra Yehovha ri tshama ri ta eka muprofeta Yeremiya hikwalaho ka Elamu, eku sunguleni ka ku fuma ka Sedekiyasi, hosi ya Yuda, ri ku:
35“Ku vula Yehovha wa tinyimpi, vona, ndzi ta tshova vurha bya Elamu, matimba manene ya vona. 36Ndzi ta humesela Elamu mimoya ya mune, yi huma etinhleni ta mune ta le tilweni, kutani ndzi ta va hangalasa emimoyeni hinkwayo, ku nga ha ri na tiko leri valuveri va Elamu va nga fikiki eka rona. 37Ndzi ta rhurhumerisa Elamu emahlweni ka lava nga valala eka yena, ni le mahlweni ka lava lavaka vutomi bya vona; ndzi ta va humesela khombo, ku nga ku kariha loku hisaka ka mina, ku vula Yehovha; kutani ndzi va landzelela hi mafumu, ndzi ko ndzi va herisa. 38Ndzi ta veka xiluvelo xa mina eElamu; kutani ndzi herisa kona hosi ni vakulukumba, ku vula Yehovha. 39Hambiswiritano, enkarhini wa ku hetelela ndzi ta tlherisa eku bohiweni va ka Elamu, ku vula Yehovha.”
