YEREMIYA 46

₁Hi rona rito ra Yehovha leri nga fika eka muprofeta Yeremiya hikwalaho ka matiko: ₂Hikwalaho ka Egipta, ni ka nyimpi ya Faro Neko, hosi ya Egipta, loyi ngi a ri ekusuhi ni nambu wa Yufrata, eKarkemixi, loyi Nebukadnetsara, hosi ya Babilona a nga n'wi hlula, hi lembe ra vumune ra Yoyakimi, n'wana Yosiya, hosi ya Yuda.

₃“Lunghisani switlhangu ni switlhangunyana mi tshinelela eku lweni! ₄Bohani tihanci, mi khandziyisa vakhandziyi; yimani hi mixanxa vangamisani matlhari, ambalani swisirhelo swa swifuva. ₅Ndzi va vona ha yini va rhurhumela, va tlhela hi le ndzhaku; ni tinhenha ta vona ti hangalaka ha yini ti baleka ha yini, ti nga rhendzeleki? Ku chavisa ematlhelo hinkwawo, ku vula Yehovha. ₆La nga ni matsambu a nga tsutsumi, ni tinhenha a ti nga phonyoki! Hi tlhelo ra n'walungu, eribuwini ra nambu wa Yufrata va rhurhumela, va wela kona.

₇“I mani loyi a tlhandlukelaka, a kota nambu wa Nilo, kukota nambu lowu hlunguretaka mati ya wona. ₈I Egipta la tlhandlukaka, a kotisa nambu wa Nilo, kukotisa loko nambu wu pfindlusa mati ya wona, wu ku: Ndzi ta tlhandluka ndzi funengeta misava, ndzi onha muti ni vaaki va wona. ₉Khandziyani tihanci! Tigolonyi, tsutsumani hi matsamba! Tinhenha a ti rhange emahlweni; Vakuxi ni Vaputu lava tamelaka switlhangu, ni Valudu lava khomaka mavurha!

₁₀“Kambe siku rero eka Hosi, Yehovha wa tinyimpi, i siku ro rihisa, ku tirihisela eka valala va yena! Fumu ri ta dya, ri xurha, ri pyopyiwa hi ngati ya vona; hikuva ku ni magandzelo ya Hosi, Yehovha wa tinyimpi, emisaveni ya n'walungu, enambyeni wa Yufrata. ₁₁Tlhandlukela eGiliyadi ku titekela kona murhi, wanhwanyana, n'wana Egipta; hambi u nga teka mirhi yo tala, i swahava; a ku na ku hanyisiwa ka wena. ₁₂Matiko ma twa swa tingana ta wena, mikosi ya wena yi tata misava hikuva tinhenha ti tsekatseka, yin'wana yi wa le henhla ka yin'wana, va wa kun'we hinkwavo.”

₁₃Rito leri Yehovha a ri byeleke muprofeta Yeremiya hikwalaho ka ku ta ka Nebukadnetsara, Hosi ya Babilona, nkarhi ingi a ta ta ba tiko ra Egipta ha wona.

₁₄“Tivisani Egipta, mi byela Migidolo; mi byela Nofu, na Tahapanese, mi ku: ‘Yima, u tilunghisa, hikuva fumu ri dya hi matlhelo ya wena. ₁₅Tinhenha ta wena ti voyamisela yini? A ku na loyi a yimeke, hikuva Yehovha u va wisele ehansi.’ ₁₆Va tele lava tsekatsekaka, lava waka, un'wana u wela ehenhla ka un'wana va ku: ‘Pfuka, hi vuyela eka tiko ra rikwerhu, ni tiko leri hi nga tswariwa ka rona, hi chava tlhari leri dlayaka.’ ₁₇Kwalaho va huwelela, va ku: ‘Faro, Hosi ya Egipta u wile; nkarhi wa yena wu herile.’ ₁₈Ndza hanya, ku vula Hosi leyi, Yehovha wa tinyimpi ri nga vito ra yona, leswaku kukota Taboro a nga exikarhi ka tintshava, kukota leswi Karmele a nghenaka elwandle, wa ta. ₁₉U tilunghisele nhundzu ya ku ya eku bohiweni, wena muaki, n'wana wa wansati wa Egipta! Hikuva Nofu u ta endliwa swahava, a hundzuka mananga, a va a pfumala muaki.

₂₀“Egipta i thokazi lero saseka ngopfu: Muonhi u huma etlhelo ra n'walungu, wa fika. ₂₁Langutani vatatisi va yena va kotisa marhole lama nonisiweke, hikuva na vona va rhendzeleka, va baleka swin'we, a va yimi siku ra vona ra makhombo ri va tela, siku ro holoveriwa ra vona. ₂₂Rito ra yena ra ta, ri kota ra nyoka; va karhi va famba hi mavandla, va ta eka yena hi swihloka, kukota vatsemi va timhandze. ₂₃Va tsema xihlahla xa yena, ku vula Yehovha, hambi xi nga ngheniwi hikwalaho ka ku tlhuma; hikuva va tele ku tlurisa tinjiya, va nga ka va nga hlayiwi.

₂₄“N'wana Egipta u khomisiwe tingana, u nyiketiwa emavokweni ya tiko ra n'walungu.” ₂₅Ku vula Yehovha wa tinyimpi Xikwembu xa Israele: “Vonani, ndzi ta ba Amoni wa No, na Faro, na Egipta, ni swikwembu swa vona, ni tihosi ta vona, na Faro ni lava n'wi tshembeke. ₂₆Kutani ndzi ta va nyiketa emavokweni ya lava lavaka vutomi bya vona, ni le mavokweni ya Nebukadnetsara, Hosi ya Babilona, ni le mandleni ya malandza ya yena; kambe ndzhaku, Egipta u ta tlhela a akiwa kukota khale, ku vula Yehovha.

₂₇“Kambe wena u nga chavi, nandza wanga, Yakobo, u nga tshuki wena Israele! Hikuva ndzi ta ku kutsula emisaveni ya le kule, ni vatukulu va wena etikweni ra ku bohiwa ka vona; kutani Yakobo u ta vuya a tshama, a tsaka, a nga chavisi hi munhu. ₂₈Wena u nga chavi nandza wanga, Yakobo, ku vula Yehovha, hikuva ndzi na wena; hikuva ndzi ta herisa matiko hinkwawo lawa ndzi ku hangalaseleke exikarhi ka wona; loko u ri wena ndzi nga ka ndzi nga ku herisi, ndzi ta ku holovela hi mpimo; hikuva ndzi tsandzeka ku ku tshika u nga layiwi.”