Ta Yeremiya loko a kokeriwa eEgipta.
1Kuteloko Yeremiya a hetile ku byela tiko hinkwaro marito hinkwawo ya Yehovha, Xikwembu xa vona, lawa Yehovha, Xikwembu xa vona, a ma rhumeleke eka vona ha yena, ma ri marito lawa hinkwawo, 2Azariya n'wana Hoxaya, na Yohanani n'wana Kariyaka, ni vanhu va ku tikukumuxa hinkwavo va byela Yeremiya, va ku: “U vulavula vunwa. Yehovha, Xikwembu xa hina a nga ku rhumanga leswaku u ku eka hina: ‘Mi nga yi eEgipta, mi ya aka kona.’ 3U susumetiwa hi Baruku n'wana Neriya, leswaku hi nyiketiwa emavokweni ya Vakalediya, va ta hi dlaya, kumbe va hi yisa ekhotsweni eBabilona.”
4Yohanani, n'wana Kariyaka, ni tindhuna hinkwato ta mavandla ni tiko hinkwaro a va yingisanga rito ra Yehovha leswaku va aka etikweni ra Yuda. 5Kambe Yohanani, n'wana Kariyaka, ni tindhuna hinkwato ta mavandla, va teka masalela hinkwawo ya Yuda, lava ngi va tlherile ematikweni hinkwawo lomu va nga hangalakela kona, ku ta aka etikweni ra Yuda, 6vavanuna, ni vavasati, ni vana, ni vanhwanyana va hosi, ni vanhu hinkwavo lava Nebuzaradani, ndhuna ya valanguteri, ingi yi va siyile eka Gedaliya, n'wana Ahikama, n'wana Xafani, na yena muprofeta Yeremiya, na Baruku n'wana Neriya, 7va ya etikweni ra Egipta, hikuva a va yingisangi rito ra Yehovha, va ya fika eTahapanese.
8Rito ra Yehovha ri ta eka Yeremiya eTahapanese, ri ku: 9“Teka maribye lamakulu u ma fihla evumbeni, ehondweni ya switina leyi nga entsendzeleni wa yindlu ya Faro, eTahapanese, emahlweni ka vanhu va Yuda u va byela, u ku: 10‘Ku vula Yehovha, Xikwembu xa Israele: Vonani, ndzi ta rhumela ku vitana Nebukadnetsara, hosi ya Babilona, nandza wa mina ndzi veka xiluvelo xa yena ehenhla ka maribye lawa ndzi ma fihleke, a andlala nguvu ya yena ehenhla ka wona. 11U ta ta onha tiko ra Egipta: Lava lulameleke rifu a va ye eku feni, lava lulameleke ku khotsiwa a va ye ekhotsweni lava lulameleke tlhari a va ye etlharini.
12“ ‘Ndzi ta tshivela ndzilo etindlwini ta swikwembu swa Egipta, Nebukadnetsara, u ta ti hisa, a yisa swikwembu ekhotsweni, u ta tifunengeta hi tiko ra Egipta kukota murisi loko a funengela nguvu ya yena, u ta suka kona hi ku tsaka. 13U ta tshovelela swifaniso swa Beta-Xemexe etikweni ra Egipta, ni tindlu ta swikwembu swa Egipta a ti hisa hi ndzilo.’ ”
