Ta Yeremiya loko a nghenisiwa ekhotsweni.
1Ematshan'weni ya Yekoniya, n'wana Yoyakimi, ku fuma Sedekiyasi, n'wana Yosiya, a vekiwa hosi etikweni ra Yuda hi Nebukadnetsara, hosi ya Babilona. 2Loko a ri yena, ni malandza ya yena ni vanhu va tiko, a va yingisanga marito ya Yehovha lawa a nga ma vula hi muprofeta Yeremiya.
3Hosi Sedekiyasi a rhuma Yuhukali n'wana Xelemiya, na Sofoniya n'wana Maaseya, muprista, eka muprofeta Yeremiya a ku: “U hi khongelela eka Yehovha Xikwembu xa hina.” 4Yeremiya a a ri karhi a nghena a huma exikarhi ka tiko a nga si nghenisiwa ekhotsweni. 5Mavandla ya Faro a ma humile eEgipta kutani Vakalediya lava nga sivelela Yerusalema, kuteloko va twile timhaka toleto, va sukela Yerusalema.
6Kutani rito ra Yehovha ri ta eka muprofeta Yeremiya, ri ku: 7“Ku vula Yehovha, Xikwembu xa Israele: Byela hosi ya Yuda la rhumeleke eka mina ku ndzi vutisa u ku: ‘Vona, mavandla ya Faro lama humeke ku ta mi tatisa, ma ta tlhelela etikweni ra rikwavo le Egipta; 8kutani Vakalediya va ta vuya ku ta lwa ni muti lowo, va nghena, va wu hisa hi ndzilo. 9Ku vula Yehovha: Mi nga tikanganyisi, mi ku: “Vakalediya va ta suka va ya ekule na hina; kasi a va nga suki.” 10Hikuva loko ngi mi dlayile nyimpi hinkwayo ya Vakalediya lava lwaka na n'wina, ku sala vanhu va timbanga ntsena, a va ta pfuka un'wana ni un'wana etendeni ya yena, va hisa muti lowo hi ndzilo!’ ” 11Kuteloko mavandla ya Vakalediya ma sukile emahlweni ka Yerusalema, hi ku chava mavandla ya Faro, 12Yeremiya a huma eYerusalema, a ya etikweni ra Benjamini, ku huma exikarhi ka tiko. 13A ku a ha fika enyangweni ya Benjamini, mulerisi wa valanguteri a a ri kwalaho, vito ra yena a nga Yiriya, n'wana Xelemiya n'wana Hananiya; a khoma muprofeta Yeremiya, a ku: “U ya tinyiketa eka Vakalediya-ke?” 14Yeremiya a ku: “Mavunwa! A ndzi yi ku tinyiketa eka Vakalediya.” Kambe yeloyi a nga pfumelanga; kutani Yiriya a khoma Yeremiya, a n'wi neha eka vakulukumba. 15Kutani vakulukumba va pfukela Yeremiya va n'wi ba, va n'wi yisa endlwini ya khotso, endlwini ya Yonatani, mutsari, hikuva a va yi endlile khotso. 16Kavaloko Yeremiya a nghena endlwini ya khotso emakheleni, kutani Yeremiya a tshama kona masiku yo tala.
17Hosi Sedekiyasi a rhumela ku n'wi vitana, kutani hosi yi n'wi vitela endlwini ya yona exihundleni, yi ku: “Xana rito ri kona leri humaka eka Yehovha xana?” Yeremiya a hlamula a ku: “Ri kona,” a engeta a ku: “U ta nyiketiwa emavokweni ya hosi ya Babilona.” 18Kambe Yeremiya a ku eka hosi Sedekiyasi: “Ndzi ku dyohele ha yini, kumbe malandza ya wena, kumbe tiko leri, leswaku mi ndzi nghenisa ekhotsweni? 19Va kwihi vaprofeta va n'wina lava mi profetelaka, va ku: ‘Hosi ya Babilona yi nga ka yi nga mi hlaseri, n'wina ni tiko leri?’ 20Kutani sweswi, hosi yanga! Wa nga yingisa xikhongelo xa mina; a xi amukeriwe emahlweni ka wena; u nga ndzi tlheriseli endlwini ya Yonatani mutsari, ndzi nga ti fela kona.” 21Kutani hosi Sedekiyasi a va byela leswaku Yeremiya a vekiwa exivaveni xa khotso a nyikiwa siku rin'wana ni rin'wana ximbundzu xa vuswa, xi huma entsendzeleni wa vasweki, ku fikela loko vuswa byi hela emutini, kutani Yeremiya a tshama exivaveni xa khotso.
