1“Xidyoho xa Yuda xi tsariwile hi rinhi ra nsimbhi, hi dayimani leyo kariha; xi tsariwile etimbilwini ta vona, ni le timhondzweni ta tialitari ta vona. 2Kukotisa loko va anakanya vana va vona, va anakanyisa sweswo tialitari ta vona ni swifaniso swa vona swa Axera ekusuhi ni mirhi leyi nga ni matluka eswitsungeni leswi tlakukeke.
3“Ntshava ya mina, ni masimu ya yona, ni rifuwo ra wena, ni vukosi bya wena hinkwabyo, ndzi ta swi nyiketa leswaku swi phangiwa, na swona swivandla leswi tlakukeke swa wena hikwalaho ka swidyoho swa wena leswi nga emindzilekaneni ya wena hinkwayo. 4Hikwalaho ka nandzu wa wena u ta lahlekeriwa hi ndzhaka leyi ngi ndzi ku nyikile yona, kambe ndzi ta ku endla nandza wa lava nga valala eka wena, etikweni leri u nga ri tiviki; hikuva mi pfurhisile ndzilo wa ku kariha ka mina, wa ha ta hisa hilaha ku nga heriki.”
5Yehovha a ku: “Ku rhuketeriwe munhu la titshembelaka munhu, la endlaka nyama matimba ya yena, loyi mbilu ya yena yi fularheleke Yehovha. 6U fana ni xisiwana emananga; a nga voni ku kateka loko ku fikile; u tshama evutshweni bya mananga, emisaveni leyo dzuma leyi nga riki na vaaki. 7Ku katekile munhu la titshembelaka Yehovha, loyi ku tshemba ka yena ku nga ka Yehovha! 8U kotisa murhi lowu simekiweke ekusuhi ni mati, lowu timitsu ta wona ti navaka ematini; ni loko ku nga ta dyandza, a wu twi nchumu; ni matluka ya wona ma va ya ntima; hi lembe ra dyandza a wu tshuki nchumu, kambe a wu tshiki ku veka mihandzu.
9“Mbilu yi ni mano ku tlula hinkwaswo, yi borile ngopfu; yi nga tiviwa i mani-ke? 10Hi mina Yehovha ndzi kambaka timbilu, ndzi ringaka xisuti, leswaku ndzi tlherisela eka un'wana ni un'wana hi ku endla ka yena, ni mihandzu ya mitirho ya yena.”
11Loyi a hlengeletaka rifuwo hi mukhuva lowu nga lulamangiki, i n'hwari leyi fukamelaka leswi nga tshikeriwangiki hi yona; exikarhi ka masiku ya yena u ta swi tshika, kutani eku heleni ka yena, u ta va xihunguki.
12Ka ha ri eku sunguleni, xivandla xa xikwetsimisiso xa hina i xiluvelo lexi tlakukeke xa ku kwetsima. 13Wena Yehovha, ku tshemba ka Israele! Lava ku tshikaka hinkwavo va ta khomisiwa tingana. Lava ndzi tshikaka va ta tswariwa emisaveni, hikuva va tshikile xihlovo xa mati lama hanyisaka, a nga Yehovha.
14Oho Yehovha, ndzi horise, leswaku ndzi hanya; u ndzi ponisa, kutani ndzi ta ponisiwa. 15Kambe waswivo, va ku eka mina: “Ri kwihi rito ra Yehovha xana? A ri humelele-ke!” 16Kutani mina a ndzi alangi ku va murisi la ku landzaka hi le ndzhaku; kambe a ndzi navelanga siku ra khombo; wena wa swi tiva; leswi humeke enon'wini wa mina swi le mahlweni ka wena. 17U nga vi ku chava eka mina; u xichavelo xa mina hi siku ra khombo. 18Lava ndzi xanisaka a va khomisiwe tingana, kambe mina ndzi nga tshuki ndzi khomisiwa tingana; a va rhurhumele, kambe mina ndzi nga tshuki ndzi rhurhumela. A va humeseriwe siku ra khombo, kutani u va kandziyela hi ku va kandziyela kambirhi.
Ta ku hlawuriwa ka siku ra Savata.
19Yehovha a va a ndzi byela, a ku: “Yana u ya yima enyangweni ya vana va tiko, leyi tihosi ta Yuda ti nghenaka ha yona, ti va ti huma ha yona; kambe u yima ni le tinyangweni hinkwato ta Yerusalema. 20Kutani u ku eka vona: ‘Yingisani rito ra Yehovha, n'wina tihosi ta Yuda, na n'wina hinkwenu, Vayuda, ni vaaki hinkwavo va Yerusalema, lava nghenaka hi tinyangwa leti.
21“ ‘Yehovha u vula, a ku: “Tilanguteleni mimoya ya n'wina, kambe mi nga rhwali mirhwalo hi siku ra Savata, mi nga tshuki mi yi nghenisa hi tinyangwa ta Yerusalema. 22Mi nga humesi ndzhwalo ni wun'we etindlwini ta n'wina hi siku ra Savata; kambe mi nga endli ntirho ni loko wu ri wun'we, kambe mi hlawula siku ra Savata hilaha ndzi leriseke vatata wa n'wina hakona. 23Kambe a va yingisanga, a va rhiyanga tindleve kambe va ti nonon'hwisile tinhamu, leswaku va nga yingisi, ni leswaku va nga amukeri dyondzo. 24Kungakuloko mi ndzi yingisa swinene, ku vula Yehovha, kutani mi nga fambisi mirhwalo hi tinyangwa ta muti lowo hi siku ra Savata, kambe mi hlawula siku ra Savata, mi nga endli ntirho ni wun'we hi siku rero, 25hi tinyangwa ta muti lowo, ku ta nghena tihosi ta n'wina ni tihosana ta n'wina leti titshamelaka exiluvelweni xa Davhida va nghena hi tigolonyi, va khandziyile tihanci, ti ri tona tihosi ni vakulukumba va tiko, ni vanhu va Yuda ni vaaki va Yerusalema; kutani muti lowo wu ta tshama wu karhi wu akiwa hilaha ku nga heriki. 26Kambe va ta suka emitini ya Yuda, ni le matlhelweni ya Yerusalema, ni le tikweni ra Benjamini, ni le rivaleni, ni le ntshaveni, ni tlhelo ra dzonga, va tisa tiholokosta ni magandzelo, ni mihlengo, ni mirhi ya risuna, va tisa ni magandzelo ya ku khensa endlwini ya Yehovha. 27Kambe loko mi nga ndzi yingisi, loko ndzi mi lerisa ku hlayisa siku ra Savata, ni ku ka mi nga rhwari mirhwalo, ni ku ka mi nga yi nghenisi hi tinyangwa ta Yerusalema, hi siku ra Savata, ndzi ta tshivela ndzilo etinyangweni ta muti, leswaku wu ta hisa tindlu ta tihosi ta Yerusalema, kambe wu nga ka wu nga timiwi.” ’ ”
