Ta ku pfuxiwa ka nyimba ya Benjamini.
1Vavanuna va Israele a va hlambanyile eMispa, va te: “A ku nga vi na un'we wa hina la nga ta nyika n'wana wa yena ku tekiwa hi va Benjamini.” 2Kutani tiko ri ya eBetele va tshama kona emahlweni ka Xikwembu ku fika nimadyambu, va rila, va kolola hi ku kolola lokukulu ngopfu. 3Va ku: “Oho Yehovha, Xikwembu xa Israele, mhaka leyi yi humelerise ku yini eIsraeleni! Namuntlha ku pfumaleka ha yini nyimba yin'wana eIsraeleni?” 4Kutani siku leri tlhandlamaka, wa ha ri mixo, tiko ri pfuka ri aka alitari kona, va tlhava magandzelo lama hisiwaka ni magandzelo ya ku khensa.
5Kutani vana va Israele va ku: “I va mani etinyimbeni hinkwato ta Israele lava nga tlhandlukelangiki eka Yehovha enhlengeletanweni?” Va vula sweswo hikuva a va hlambanyile hi ku hlambanya lokukulu hikwalaho ka lava nga ala ku tlhandlukela eka Yehovha eMispa, va ku: “Kunene va ta dlawa.” 6Kambe vana va Israele va va ni tingana hikwalaho ka vamakwavo, va Benjamini, va ku: “Nyimba yin'wana yi tsemiwile namuntlha eIsraeleni. 7Hi ta va endlerisa ku yini lava seleke ku va nyika vavasati, leswi hi nga hlambanya eka Yehovha, hi ku: ‘Hi nga ka hi nga va nyiki vana va hina leswaku va va vasati va vona?’ ” 8Kutani va ku: “Xana hi vahi va tinyimba ta Israele lava nga tlhandlukelangiki eka Yehovha eMispa xana?” Kutani va kuma leswaku a ku nga ri na un'we wa va Yabexe wa Giliyadi la tlhandlukeleke emixaxeni ni le nhlengeletanweni. 9Hikuva loko tiko ri hlayiwa, ku kumiwa leswaku a ku nga ri na un'we wa lava akeke eYabexe wa Giliyadi. 10Kavaloko nhlengeletano yi rhumela kona vavanuna va tinhenha va 12 000, va va lerisa, va ku: “Fambani mi ya dlaya lava akeke eYabexe wa Giliyadi hi vukari bya tlhari, vavasati kun'we ni vana lavatsongo. 11Kambe lexi mi nga ta xi endla hi lexi: Mi ta dlaya vavanuna hinkwavo ni vavasati hinkwavo lava tivaneke ni vavanuna.” 12Kutani va kuma exikarhi ka lava akeke eYabexe wa Giliyadi, vanhwana va 400 lava nga tivanangiki ni vavanuna, kutani va va tisa emixaxeni, eXilo, etikweni ra Kanana. 13Kutani nhlengeletano hinkwayo yi rhumela ku ya twanana ni vana va Benjamini lava tshameke eribyeni ra Rimoni, ku va tivisa leswaku ku rhula ku kona. 14Hi siku rero, va Benjamini va tlhela, kutani va nyikiwa vavasati lava hanyisiweke va Yabexe wa Giliyadi. Ntsena a va va ringananga.
15Kambe tiko ri va ni tingana hikwalaho ka va Benjamini, hikuva Yehovha a a endlile xipetlu etinyimbeni ta Israele. 16Kutani vakulukumba va nhlengeletano, va ku: “Hi ta endlisa ku yini hi lava nga sala leswaku va va ni vasati, leswi vavasati va Benjamini va nga herisiwa?” 17Va ku: “Va Benjamini lava nga hanya va fanele ku va ni ndzhaka ya vona, leswaku nyimba yin'wana yi nga tshuki yi onhiwa eIsraeleni. 18Loko hi ri hina, hi nga ka hi nga va nyiki vana va hina, hikuva vana va Israele va hlambanyile leswaku: ‘A ku rhuketeriwe la nga ta nyika va Benjamini nsati.’ ” 19Kutani va ku: “Vonani nkhuvo wa Yehovha wu kona eXilo, hi lembe rin'wana ni rin'wana, hitlhelo ra n'walungu ra Betele, ni tlhelo ra vuxa eka ndlela leyi sukaka eBetele ku tlhandlukela eXikeme, ni tlhelo ra dzonga ra Lebona.” 20Hikwalaho, va lerisa vana va Benjamini, va ku: “Fambani mi ya etlelela emasin'wini ya vhinya; 21mi ta languta loko mi vona vanhwana va Xilo va huma, va cina, mi ta huma emasin'wini ya vhinya kutani un'wana ni un'wana wa n'wina a tikhomela nsati exikarhi ka vanhwana va Xilo, kutani mi famba na vona etikweni ra Benjamini. 22Kutakuloko vatata wa vona, kumbe vamakwavo va vona va ta eka hina ku ta mi hehla, hi ta ku eka vona: Mi va tsetselela hikwalaho ka hina, hikuva a hi swi kotanga ku va khomela hinkwavo vavasati enyimpini; loko mi ri n'wina, hilaha mi nga hluleka ku va nyika vana va n'wina, a mi na nandzu.” 23Kutani vana va Benjamini va endlisa sweswo, va titekela vavasati exikarhi ka lava cinaka, hi ku ringana vunyingi bya vona, kutani va suka va tlhelela endzhakeni ya vona, va pfuxa miti, va aka kona. 24Na vona vana va Israele va suka hi nkarhi wolowo, va tlhelela ekaya, un'wana ni un'wana enyimbeni ya yena, ni le ndlwini ya yena; un'wana ni un'wana a suka a ya endzhakeni ya yena.
25Enkarhini wolowo, a ku nga ri na hosi eIsraeleni; un'wana ni un'wana a a endla hi laha a swi rhandzaka hakona.
