Ta vana va Israele loko, va pfukela Gibeya, va herisa va Benjamini.
1Kutani vana va Israele hinkwavo, va huma ku sukela eDani ku ya fika eBerexeba ni le tikweni ra Giliyadi, Vaisraele va hlengeletana eMispa emahlweni ka Yehovha, kukotisa loko a ri munhu un'we. 2Kutani vakulukumba va tiko hinkwaro, va tinyimba hinkwato ta Israele va humelela enhlengeletanweni ya tiko ra Xikwembu va ri 400 000 lava fambaka hi milenge, lava hlomeke matlhari. Kutani vana va Benjamini va twa leswaku vana va Israele va tlhandlukele eMispa.
3Kutani vana va Israele va ku: “Hi byeleni hilaha ku biha ku nga humelela hakona.” 4Kutani Mulevhi, nuna wa nsati la dlayiweke, a hlamula, a ku: “A ndzi hambukele eGibeya wa Benjamini ni mbuya ya mina ku etlela kona vusiku. 5Kutani vini va Gibeya va ndzi pfukela matimba, va rhendzela yindlu exikarhi nivusiku, va ku va lave ku ndzi dlaya; kambe va tsongahatile mbuya ya mina yi kondza yi fa. 6Kutani ndzi teka mbuya ya mina, ndzi yi endla swihlubyana, ndzi rhumela swihlubyana swa yona etikweni hinkwaro ra ndzhaka ya Israele, hikuva va Gibeya va endlile leswo biha ni manyala eIsraeleni. 7Langutani, mi kwala hinkwenu, n'wina vana va Israele, ehleketani mi tsundzuxana.”
8Kutani tiko hinkwaro ri yima kukotisa loko a ri munhu un'we, ri ku: “A ku nga vi na un'we wa hina la nga ta tlhelela entsongeni wa yena, hambi ku ri ku tlhelela endlwini ya yena. 9Kambe sweswi, hi swona leswi hi nga ta swi endla eka va Gibeya; hi ta ya lwa na vona. 10Hi ta teka etinyimbeni hinkwato ta Vaisraele vavanuna va khume exikarhi ka va dzana, ni va dzana exikarhi ka va khume ra madzana, ni va khume ra madzana exikarhi ka va khume ra magidigidi, ku ya tekela tiko timbuva, kutani hi ya eGibeya wa Benjamini, hi ta wu endlela hi manyala hinkwawo lama endliweke hi vona eIsraeleni.” 11Hikwalaho vavanuna hinkwavo va Israele va hlengeletanaka ku lwa na muti wolowo, va hlangana kukotisa munhu un'we.
12Kutani va tinyimba ta Israele va rhumela vavanuna eka nyimba hinkwayo ya Benjamini, va ku: “Ku biha loku endliweke exikarhi ka n'wina hi loku yini? 13Kutani sweswi, hi nyiketeni vanhu lavo, va Gibeya, vana va Beliyali, hi ta va dlaya, hi herisa leswo biha eIsraeleni. Kambe va Benjamini va ala ku yingisa marito ya vamakwavo, vana va Israele.”
14Kutani vana va Benjamini va huma emitini ya vona, va hlengeletana eGibeya ku ya lwa ni vana va Israele. 15Hi siku rero, vana va Benjamini loko va hlayiwa, a va ri vavanuna va 26 000 lava hlomeke matlhari, ehandle ka lava akeke eGibeya, va nga 700 lava hlawuriweke, loko va hlayiwa. 16Exikarhi la tiko hinkwaro leri a ku ri ni vavanuna va 700, lava hlawuriweke, va ximatsi; valavo hinkwavo, a va hoxa maribye hi xipelupelu, va nga pfumari, va tlhava ni nsisi.
17Ehandle ka Benjamini, loko ku hlayiwa vavanuna va Israele, a va ri vavanuna va 400 000, vavanuna va nyimpi hinkwavo, lava hlomeke matlhari. 18Kutani vana Vaisraele va suka, va tlhandlukela eBetele ku ya vutisa Xikwembu, va ku: “I mani eka hina la nga ta hi rhangela emahlweni ku lwa ni vana va Benjamini?” Yehovha a ku: “A ku rhange Yuda.”
19Kutani vana va Israele va pfuka wa ha ri mixo, va ya gova ekusuhi na Gibeya. 20Vana va Israele va huma ku ya lwa ni va Benjamini; kutani vavanuna va Israele va lunghisa nyimpi ekusuhi na Gibeya. 21Kutani vana va Benjamini va huma eGibeya, va dlayela ehansi Vaisraele va 22 000 hi siku rero.
22Hambiswiritano, tiko, vavanuna va Israele va tiyisa mbilu, va engeta va lunghisa nyimpi hilaha va nga yi lunghisa kona eku sunguleni. 23Kutani vana va Israele va tlhandluka va ya rila emahlweni ka Yehovha, ku fika madyambu, va engeta va vutisa Yehovha, va ku: “Xana hi ta engeta hi ya lwa ni vamakwerhu, vana va Benjamini xana?” Yehovha a ku: “Tlhandlukani mi ya lwa na yena.” 24Kutani vana va Israele va tshinelela vana va Benjamini ra vumbirhi. 25Kutani va Benjamini va huma eGibeya ku ya hlangana na vona ra vumbirhi, va dlayela ehansi vana va Israele va 18 000, hinkwavo lava hlomeke matlhari.
26Kutani vana va Israele hinkwavo ni tiko hinkwaro, va tlhandlukela eBetele va karhi va rila, va yima kona emahlweni ka Yehovha, va titsonile swakudya hi siku rero, ku fikela madyambu, va humesela Yehovha magandzelo lama hisiwaka, ni magandzelo ya ku khensa. 27Kutani vana va Israele va vutisa Yehovha hikuva areka ya ntwanano wa Xikwembu a yi ri kona eka vona enkarhini wolowo. 28Finiyasi, n'wana Eliyazara, n'wana Aroni, a a yimile emahlweni ka yona enkarhini wolowo, va ku: “Xana hi ta engeta hi huma hi ya lwa ni vana va Benjamini, vamakwerhu, kumbe hi tshika xana?” Yehovha a ku: “Tlhandlukani, hikuva mundzuku ndzi ta va nyiketa emavokweni ya n'wina.”
29Kutani Vaisraele va veka vavanuna lava etlelelaka ematlhelweni hinkwawo ya Gibeya, 30kutani vana va Israele va tlhandluka ra vunharhu ku ya pfuka vana va Benjamini va lunghisa nyimpi emahlweni ka Gibeya, kukotisa eku sunguleni. 31Kutani vana va Benjamini va huma ku ya hlangana ni nyimpi, kambe va kokeriwa ekule ni muti, kutani va dlaya van'wana vanhu kukotisa eku sunguleni, endleleni leyi tlhandlukelaka eBetele ni le ndleleni leyi yaka eGibeya, exikarhi ka nkova, va dlaya Vaisraele va 30. 32Kutani vana va Benjamini va ku: “Va hluriwa emahlweni ka hina kukotisa eku sunguleni.” Kasi vana va Israele a va te: “A hi balekeni hi ta va kokela etindleleni ekule ni muti.” 33Kutani vana va Israele hinkwavo, va yima laha ingi va ri kona, va lunghisa nyimpi eBaala-Tamara; ni Vaisraele lava etleleleke va hatlisa va huma laha ingi va ri kona erivaleni ra Gibeya. 34Kutani vavanuna hinkwavo lava hlawuriweke exikarhi ka Vaisraele va 10 000, va humelela emahlweni ka Gibeya; nyimpi yi lwa hi ku vaviseka, kambe va Benjamini va nga tivi khombo leri nga ta va humelela. 35Kutani Yehovha a ba Benjamini emahlweni ka Israele, vavanuna va Israele va lovisa vavanuna va Benjamini hi siku rero, va 25 100, va ri lava hlomeke matlhari hinkwavo.
36Hi mukhuva wolowo vana va Benjamini va vona leswaku va Israele va hluriwile, hikuva vana va Israele a va baleka emahlweni ka va Benjamini, kasi a va tshembile lava etleleleke eGibeya. 37Kutani lava etleleleke a va hatlisile va tsutsumela eGibeya, lava etleleleke va ya emahlweni, va dlaya hinkwavo, va muti hi ku kariha ka fumu. 38Vaisraele a va endlile xikombiso ni lava etleleleke va te: “Endlani musi wa langavi lerikulu emutini.” 39Kutani vavanuna va Israele va rhendzeleka eku lweni, va Benjamini a va sungurile ku tlhava ni ku dlaya vavanuna van'wana va Israele, lava laveke ku va vavanuna va 30; hikuva a va ku: “Va hluriwile emahlweni ka hina kukotisa enyimpini ya ku sungula.” 40Kambe kuteloko musi wu sungula ku tlhandluka emutini hi langavi ra ndzilo, va Benjamini va rhendzeleka va vona musi wa muti hinkwawo wu tlhandluka etilweni. 41Kutani vavanuna va Israele va hundzuka, kambe vavanuna va Benjamini va chava loko va vona leswaku khombo ri va humelele. 42Hikwalaho, va baleka emahlweni ka Vaisraele, hi ndlela leyi yaka emananga, kambe nyimpi yi va wela ehenhla, ni va miti ya kona va dlayiwa. 43Hi mukhuva wolowo a va rhendzerile va Benjamini exikarhi, va va hlongorisa ni ku va tshika va fularhela Gibeya hitlhelo ra vuxa, va nga va siveri. 44Va Benjamini lava dlayiweke a va ri va 18 000, vavanuna va tinhenha hinkwavo. 45Kutani va rhendzeleka, va balekela emananga ku ya fika eribyeni ra Rimoni; kambe va dlaya etindleleni vavanuna va vona va 5 000. Va va tsutsumela ku ya fika eGidomo, va dlaya kambe vavanuna va 2 000. 46Vavanuna hinkwavo, va Benjamini lava nga dlayiwa hi siku rero, a va ri 25 000 lava hlomeke matlhari, vanhu va tinhenha hinkwavo.
47Kambe vavanuna va 600, va balekela emananga, eribyeni ra Rimoni, va tshama kona mune wa tin'hweti. 48Kambe vavanuna va Israele va tlhelela eka vana va Benjamini lava seleke va va dlaya hi ku kariha ka fumu, ku sungula hi vanhu va miti ku yisa eka swifuwo ni swilo hinkwaswo swa kona; va hisa ni miti ya kona hinkwayo.
