VAAVANYISI 15

₁Kuteloko ku hundzile masiku man'wana, hi nkarhi wa ku tshovela koro, Samsoni a endzela nsati wa yena, a ri ni ximbutana, a ku: “Ndza ha nghena eka nsati wa mina endlwini.” Kambe tata wa yena a nga n'wi pfumelelanga ku nghena. ₂Tata wa yena a ku: “Kunene ndzi ehleketile leswaku u n'wi vengile, ndzi n'wi nyikile nxangwana ya wena. Xana ndzisana ya yena a nga n'wi tluri hi ku saseka xana? A ve yena nsati wa wena ematshan'weni ya yeloyi.” ₃Samsoni a ku eka vona: “Sweswi ndzi ta pfumala nandzu eka Vafilista loko ndzi va endla hi nsele.”

₄Kutani Samsoni a famba, a ya khometela timhungubye ta 300, a teka swisa, kuteloko a hlanganisile micila ha mimbirhi, a vehela xisa exikarhi ka micila. ₅Kutani a lumeka swisa a tshiketa timhungubye emasin'wini ya Vafilista, a hisa tinhulu ta tinyandza ni koro leyi yimeke, ni masimu ya mitlhwari.

₆Kutani Vafilista va vutisa, va ku: “Swi endliwe hi mani xana?” Va ku: “I Samsoni, mukon'wana wa nuna wa Timina, hi leswi a n'wi tekeleke nsati wa yena, a n'wi nyika nxangwana ya yena.” Kutani Vafilista va tlhandluka, va hisa nsati yeloyi, ni tata wa yena. ₇Kutani Samsoni a ku eka vona: “Leswi mi endleke leswi, ndzi nga ka ndzi nga fambi, ndzi nga si tirihisela eka n'wina.” ₈Kutani a va ba ndzhumbi ni xisuti, ku va ku dlayiwa lokukulu. Kutani a suka kona, a ya tshama ebakweni ra ribye ra Etamu.

₉Kutani Vafilista va huma nyimpi, va ya gova etikweni ra Yuda, va makanyeka eLehi. ₁₀Vavanuna va Yuda va ta, va ku: “Mi hi humele hi fumu hikwalaho ka yini xana?” Va ku: “Hi tile ku boha Samsoni, hi ta n'wi endla kukotisa leswi a nga endla eka hina.” ₁₁Kutani vavanuna va Yuda va 3 000 va ngirimela ebakweni ra ribye ra Etamu, va ku eka Samsoni: “Xana a ku swi tivi leswaku Vafilista va hi fuma xana? U hi endlele yini sweswo?” A ku eka vona: “Ndzi va endlile hilaha va ndzi endleke hakona.” ₁₂Va ku eka yena: “Hi tile ku ta ku boha, hi ku nyiketa emavokweni ya Vafilista.” Samsoni a ku: “Ndzi hlambanyeleni leswaku mi nga ka mi nga ndzi pfukeli matimba mi ri n'wina!” ₁₃Va n'wi hlamula, va ku: “E-e, hi ta ku boha, hi ku nyiketa emavokweni ya vona; kambe hi nga ka hi nga ku dlayi.” Kutani va n'wi boha hi mapindza mambirhi lamantshwa, va n'wi susa eribyeni.

₁₄Kuteloko a fika eLehi, Vafilista va huwelela loko va hlangana na yena. Kutani Moya wa Yehovha wu n'wi tela hi matimba, mapindza lama boheke mavoko ya yena ma hundzuka swangi i harhana leyi tshweke; leswi a bohiweke ha swona swi tshunxeka emavokweni ya yena. ₁₅Kutani a vona rihlaya leri tsakamaka ra mbhongolo, a ri teka, kutani a dlaya vanhu va 1 000 ha rona. ₁₆Kavaloko Samsoni, a ku:

₁₇A ku a ha ku heta ku vulavula, a cukumeta rihlaya; kutani a thya vito ra kona Ramati-Lehi (ntsunga wa rihlaya).

₁₈Kutani a khomiwa ngopfu hi torha, a huwelela eka Yehovha, a ku: “Leswi u nga pfuna nandza wa wena swonghasi, xana sweswi ndzi nga fa hi torha ndzi wela emavokweni ya lava nga yimbangiki xana?” ₁₉Kutani Xikwembu xi handzula ribye ra Lehi, ri va khele, mati ma huma eka rona; a nwa, kutani a pfuneka, mbilu ya yena yi tlhelela evutshan'weni bya yona. Hikwalaho ku thyiweke vito ra kona Eni-Hakori (xihlovo xa la huwelelaka), xi kona eLehi ni namuntlha.

₂₀Kutani a avanyisela Vaisraele hi malembe ya 20, emikarhini ya Vafilista.