1Sweswi, ndzi ta eka n'wina vafuwi! Rilani, mi kolola hikwalaho ka makhombo ya n'wina, lama nga ta mi humelela. 2Xuma xa n'wina xi borile ni tinguvu ta n'wina ti dyiwe hi tinsumba. 3Nsuku wa n'wina ni silivhere swi dyiwe hi ku kurha, kutani ku kurha ka swona yi ta va mbhoni leyi nga ta mi avanyisa, ku ta dya tinyama ta n'wina kukota ndzilo. Mi tihlengeletele xuma eku heteleleni ka masiku. 4Vonani, hakelo ya vatirhi lava tshoveleke masimu ya n'wina leyi va yi tsoniweke hi n'wina, ya huwelela, kutani ku huwelela ka vatshoveri ku fikile etindleveni ta Hosi ya tinyimpi. 5Mi tihanyele hi ku titsakela ni ku tlanga la emisaveni, mi korwisile timbilu ta n'wina kukotisa loko swa nge hi siku ra xitlhavelo. 6Mi avanyisile, mi dlele la lulameke, kambe a nga tilwelanga.
Ku tiyisiwa lava nga enhlomulweni.
7Loko swi ri tano, vamakwerhu, lehisani timbilu, Hosi yi ko yi ta. Vonani, murimi u langutela mihandzu leyi pfumariwaka ya misava, a ri karhi a lehisa mbilu ya yena, a ko a nyikiwa mpfula ya ku sungula ni leya makumu. 8Na n'wina, lehisani timbilu ta n'wina, mi ti tiyisa, hikuva ku ta ka Hosi ku kusuhi. 9Vamakwerhu, mi nga tshuki mi vilerisana leswaku mi nga ti avanyisiwa; vonani, Muavanyisi u yimile enyangweni. 10Vamakwerhu, khomani ntila wa nhlomulo ni wa ku tiyisela ka vaprofeta lava vulavuleke hi vito ra Hosi. 11Vonani, hi dzunisa ku kateka ka lava tiyiseleke loko va ri eku vavisekeni. Mi twile ku tiyisela ka Yobo, kutani mi vonile mahetelelo ya yena eHosini; hikuva Hosi yi tele tintswalo ni nsovo.
Ku hlambanya.
12Kambe, vamakwerhu, emahlweni ka hinkwaswo, mi nga hlambanyi, hambi ku ri hi tilo, hambi ku ri hi misava, ni loko ku ri ku hlambanya kwihi ni kwihi; kambe ina ya n'wina yi fanele ku va ina, ni e-e ya n'wina a yi ve e-e, leswaku mi nga tshuki mi wela eku avanyisiweni.
Matimba ya xikhongelo.
13Un'wana exikarhi ka n'wina loko a ri enhlomulweni, a a khongele; loko a tsakile a a yimbelele tinsimu; 14un'wana loko a vabya, a a vite vakulu va Kereke kutani va n'wi khongelela, va ri karhi va n'wi tota hi mafurha hi vito ra Hosi. 15Kutani ku khongela loku endliwaka hi ku pfumela ku ta hanyisa muvabyi, kutani Hosi yi ta n'wi pfuxa emasangwini, kambe kungakuloko a dyohile, u ta rivaleriwa.
16Byelanani ku dyoha ka n'wina, kutani mi khongelelana leswaku mi ta hola; hikuva ku khongela ka la lulameke, loku endliwaka hi ku hiteka, ku ni matimba lamakulu. 17Eliya a a ri munhu la titwaka kukota hina, kutani a kombela hi ku khongela leswaku mpfula yi nga ni, kutani a yi nangi emisaveni hi malembe manharhu, ni tin'hweti ta ntlhanu na yin'we. 18Kutani a engeta a khongela, kutani tilo ri nisa mpfula, na yona misava yi mirisa swa yona.
19Vamakwerhu, kungakuloko un'wana wa n'wina a hambukile eka leswinene, kutani un'wana a n'wi tlherisa, 20yeloyi a a swi tive leswaku la tlheriseke mudyohi eku hambukeni ka yena, a ta ponisa moya wun'wana eku feni, kutani a funengeta swidyoho leswo tala.
