Ta ku pona ka Yerusalema.
1“Ndzi yingiseni, n'wina lava tilavelaka swo lulama, lava lavaka Yehovha! Langutani ribye leri mi tekiweke eka rona ni ntshava ya ribye leyi mi humesiweke eka yona! 2Langutani Abrahama, tata wa n'wina, na Sara la mi velekeke; hikuva ndzi n'wi vitanile loko a ri swakwe, kutani ndzi n'wi katekisile, ndzi va ndzi n'wi andzisa. 3Hikuva Yehovha u chavelerile Siyoni, u chavelerile marhumbi ya yena hinkwawo, u endlile mananga ya yena xivandla lexi fanaka na Edeni, ni nhova ya yena mitanga ya Yehovha. Ku ta kumiwa kona ku tsaka ni mikhuvo ya ku tsaka, tinsimu ta ku dzunisa ni mpfumawulo wa timbila.
4“Yingisa, wena, tiko ranga, na n'wina vanhu vanga, mi ndzi rhiyela tindleve, hikuva nawu wu ta huma eka mina; ndzi ta tiyisa milawu ya mina ku voninga matiko. 5Ku lulama ka mina ku kusuhi, ku ponisa ka mina ku ta humelela, kutani voko ra mina ri ta avanyisa matiko; swihlale swi ta ndzi tshemba, swi ta tshemba voko ra mina. 6Tlakusani mahlo ya n'wina le matilweni, kutani mi languta ehansi emisaveni hikuva matilo ma ta tlhaka tanihi musi, kutani misava yi ta hlakala tanihi nguvu, vaaki va yona va ta fa tanihi tinhongana, kambe ku hlayiseka ka mina ku ta tshama hi masiku, ku lulama ka mina a ku nga heri.
7“Ndzi yingiseni, n'wina lava tivaka swo lulama, wena tiko leri nga ni nawu wa mina embilwini ya wena! Mi nga chaveni xisandzu xa vanhu, mi nga tshukisiwi hi mirhukano ya vona; 8hikuva nsumba yi ta va dya tanihi nguvu, hele ri ta va luma tanihi voya; kambe ku lulama ka mina ku ta sala hi masiku, ni ku hlayiseka ka mina hilaha ku nga heriki!”
9Pfuka, pfuka! Ambala matimba ya wena, voko ra Yehovha! Pfuka kukota khale, kukota malembe ya madzana ya khalekhale! Xana a hi wena la nga herisa Rahava (Egipta), la tlhaveke dragona? 10Xana a hi wena la nga omisa lwandle, mati ya xidziva lexikulu? La boxeke emikoveni ya lwandle endlela ya ku perisa lava kutsuriweke xana?
11Vakutsuriwa va Yehovha va ta tlhela va nghena eSiyoni hi tinsimu ta ku tsaka; ku tsaka loku nga heriki ku ta va etinhlokweni ta vona, ku tsaka ni ku tsakisisa swi ta tshama na vona; ku vaviseka ni mikosi swi ta va balekela.
12“Hi mina, hi mina la mi chavelelaka. U mani wena u chavaka vanhu lava nga ta fa, ni vana va vanhu lava nga ta hundza kukota byanyi, 13u va u rivala Yehovha, Muvumbi wa wena, la andlaleke matilo, a tiyiseke ni misava. Kasi u chava hi mikarhi hinkwayo, ni siku hinkwaro, vukari bya muxanisi, loko a rhandza ku ku lovisa? Vukari byi kwihi bya muxanisi? 14La korhameke u ta hatla a tshunxiwa; a nga ka a nga fi ekheleni, a nga ka a nga pfumari vuswa bya yena. 15Mina Yehovha, ndzi Xikwembu xa wena, lexi tlakusaka lwandle, magandlati ya rona ma boboma; Yehovha wa tinyimpi i vito ra yena. 16Ndzi vekile marito ya mina enon'wini wa wena, ndzi ku vekile endzhutini wa voko ra mina, ku andlala matilo lamantshwa ni ku sungula misava leyintshwa, ni ku byela Siyoni: ‘U tiko ra mina!’ ”
17Pfuka, pfuka, Yerusalema, la nweke evokweni ra Yehovha ndzheko wa vukari bya yena, la nweke, a va a heta ndzheko wa ku pyopyisa! 18Eka vana hinkwavo lava a va velekeke a ku nga ri na un'we la n'wi fambiseke, eka vana hinkwavo lava a va wundleke a ku na un'we la n'wi khomeke hi voko. Makhombo mambirhi ma ku bile, u ta tweriwa vusiwana hi mani? 19Maxangu ni ku lova, ndlala ni tlhari, xana ndzi ta ku chavelerisa ku yini? 20Vana va wena a va ri na gome va wile emahlanganweni ya mitsendzele hinkwayo tanihi mhalamhala exirimbaneni va pyopyiwile hi vukari bya Yehovha, ni ku wumeta ka Xikwembu xa wena.
21Hikwalaho-ke, twana timhaka teti, wena xisiwana, wena la pyopyiweke, kambe ku nga ri hi vhinyo, 22ku vula sweswo Hosi Yehovha, Xikwembu xa wena, lexi lwelaka tiko ra xona: “Vona ndzi susile evokweni ra wena ndzheko wa xipyopyiso; u nga ka u nga ha nwi ndzheko lowu wa vukari bya mina. 23Ndzi ta wu veka evokweni ra vaxanisi va wena, ra lava nga ku byela, va te: ‘Korhama hi hundza!’ Kutani u endlile hi nhlana wa wena misava, ni ntsendzele wa lava hundzaka.”
