Vaisraele va ta huma eBabilona.
1Yingisani, n'wina va yindlu ya Yakobo, lava mi thyiweke hi vito ra Israele, lava mi humeke exihlobyeni xa Yuda; n'wina lava mi hlambanyaka hi vito ra Yehovha, lava mi dzunisaka vito ra Xikwembu xa Israele, lava mi nga ni ku kanganyisa ni ku pfumala ku lulama, 2hikuva va tithya hi vito ra muti lowo kwetsima, va tshemba Xikwembu xa Israele, lexi vito ra xona ri nga Yehovha wa tinyimpi! 3“Khale ndzi vurile leswo rhanga, swi hume enon'wini wa mina ndzi swi vurile, kan'we ndzi swi endlile kutani swi humelela. 4Hikuva a ndzi swi tiva leswaku wa nonon'hwa, ni leswaku nhamu ya wena yi fana ni nhonga ya nsimbhi; ni mombo wa wena, ni koporo, 5ndzi ku byerile khale ndzi ku tivisile swona swi nga si humelela swi nga ri leswaku u vula, u ku: ‘Swi endle hi xifaniso xa xikwembu xa mina! Swi lerise hi xikwembu xa mina xa ntsandze, kumbe xa nsuku!’ 6U swi twile, vona, hinkwaswo swi humelele! Kambe n'wina, xana mi nga ka mi nga swi vuli? Ndza ku tivisa sweswi timhaka letintshwa leti fihliweke, leti u nga ti tiviki! 7Ta ha ku tumbuluka sweswi, ku nga ri khale, a ku twangi nchumu wa tona ku fika sweswi, hileswaku u nga ti vula, u ku: ‘Vonani, a ndzi swi tiva?’ 8A ku twanga nchumu, a ku tivanga nchumu, ndleve ya wena a yi twangi nchumu, hikuva a ndzi swi tiva leswaku u mukanganyisi, ni leswaku le khwirini ra mana wa wena vito ra wena a ri ri mutiarisi!
9“Hikwalaho ka vito ra mina, ndzi khoma vukari bya mina, hikwalaho ka ku twala ka mina, ndza tikhoma ndzi nga tshuki ndzi ku lovisa. 10Vona, ndzi ku n'okisile, kambe a ndzi kumanga silivhere, ndzi ku ringile exirhengeleni xa khombo. 11Hikwalaho ka mina, ka mina ntsena, ndzi ta swi endla; hikuva xana ndzi ta pfumela ha yini-ke leswaku vito ra mina ri ta sandziwa? A ndzi swi koti ku nyika un'wana ku vonakala ka mina.
12“Ndzi yingise, Yakobo, na wena Israele, loyi ndzi ku vitaneke, hi mina loyi ndzi nga lowo rhanga, kambe hi mina loyi a nga wa makumu. 13Hi rona voko ra mina leri akeke masungulo ya misava, i voko ra mina ra xinene leri andlaleke matilo; ndza ma vitana, ma tumbuluka kan'we. 14Hlengeletanani hinkwenu, mi yingisa: I mani wa vona la bvumbheke swilo leswi? La rhandziwaka hi Yehovha u ta endla eka Babele lexi a xi rhandzaka, voko ra yena ri ta lwa ni Vakalediya. 15Mina, mina ndzi vurile, ndzi n'wi vitanile, ndzi n'wi tisile, u ta hetisa ntirho wa yena.
16“Ndzi tshineleleni, yingisani! Mpfhuka eku sunguleni, a ndzi vulavulangi exihundleni, loko swilo leswi swi humelela a ndzi ri kona,” kutani sweswi Yehovha Xikwembu u ndzi rhuma ndzi ri ni moya wa yena.
17Ku vula sweswo Yehovha Mukutsuri wa wena, Muhlawuriwa wa Israele a ku: “Hi mina Yehovha, Xikwembu xa wena la ku dyondzisaka, a ku pfuna a ku fambisa endleleni leyi u faneleke ku famba ha yona. 18Mawako! Loko ngi u yingisa milawu ya mina! Ku rhula ka wena ku ta va tanihi nambu, ku lulama ka wena ku ta fana ni magandlati ya lwandle, vatukulu va wena va ta fana ni sava, 19ni lava humaka ekhwirini ra wena tanihi swiribyana swa sava; vito ra yena ri nga ka ri nga susiwi ni ku hlanguriwa emahlweni ka mina.”
20Humani eBabele, balekani kule ni Vakalediya, mi ri karhi mi huwelela hi ku tsaka! Tivisani, vulavulani lerisani ku yisa makumu ya misava vulani mi nge: “Yehovha u kutsurile Yakobo, nandza wa yena,” 21vona lava a va fambiseke emananga a va twangi torha, u va khulukisele mati ya ribye, u pandzerile ribye, kutani mati ma hume hi matimba! 22“A ku na ku rhula eka swidyohi,” ku vula Yehovha!
