ESAYA 40

₁Chavelelani, chavelelani tiko ra mina ku vula Xikwembu xa n'wina. ₂Vulavulani swa mbilu ya Yerusalema, mi n'wi tivisa leswaku vukhumbi bya yena byi herile, ni leswaku ku dyoha ka yena ku rivaleriwile, kambe u rihiwile kambirhi hi voko ra Yehovha swidyoho swa yena hinkwaswo!

₃Rito ri huwelela ri ku: “Lunghisani emananga ndlela ya Yehovha, khulelani emananga ndlela ya Xikwembu xa hina! ₄Nkova wun'wana ni wun'wana wu ta seleteriwa, ntshava yin'wana ni yin'wana ni xitsunga xin'wana ni xin'wana swi ta mbundzumuxiwa. Xitsunga xi ta hundzuka rivala, kutani tintshava ti ta hundzuka mikova. ₅Ku vonakala ka Yehovha ku ta humelela, kutani nyama yin'wana ni yin'wana yi ta ku vona, hikuva nomu wa Yehovha wu vurisile.”

₆Rito ri te: “Huwelela!” Kutani ku hlamuriwa, va ku: “Ndzi ta huwelela yini?” Nyama yin'wana ni yin'wana yi fana ni byanyi, ni ku saseka ka byona ku fana ni xiluva xa nhova. ₇Byanyi bya oma, xiluva xa vuna loko moya wa Yehovha wu hundzile ehenhla ka xona, kunene vanhu va fana ni byanyi. ₈Byanyi bya oma, xiluva xa vuna, kambe rito ra Xikwembu xa hina ri ta tshama hilaha ku nga heriki.

₉Tlhandlukelani entshaveni leyo leha, n'wina lami tiselaka Siyoni mhaka leyo nandziha; tlakusani rito hi matimba, n'wina la mi tiselaka Yerusalema, mhaka leyo nandziha; ri tlakuseni, mi nga chaveni; byelani miti ya Yuda, mi ku: “Hi xona Xikwembu xa n'wina!” ₁₀Vonani, Hosi, Yehovha wa ta hi matimba; wa fuma hi voko ra yena; vonani, wa ta a ri ni ku khensa ka yena, ku hakela ka yena ku n'wi rhangele. ₁₁Tanihi murisi, u ta risa ntlhambi wa yena; u ta rhola swinyimpfana hi mavoko u ta swi vukarha erhumbyini ra yena, u ta fambisa khwatsi leti an'wisaka.

₁₂I mani la pimeke lwandle hi xandla xa yena, la pimeke matilo hi mpimo xana? I mani la pimeke hi xirhundzu ntshuri hinkwawo wa misava, la pimeke tintshava, ni switsunga exikalweni? ₁₃La pimeke moya wa Yehovha i mani? Mutsundzuxi wa yena a a ri mani? La n'wi dyondziseke xilo i mani? ₁₄U vutisile mani, u dyondzisiwe hi mani? U kombisiwile hi mani ndlela ya leswo lulama? I mani la n'wi dyondziseke vutivi, ni la n'wi tiviseke ndlela ya vutlhari? ₁₅Vonani, emahlweni ka yena, matiko ma fana ni thonsi leri tengatengaka embiteni, ma fana ni ntshuri lowu nga exikalweni. Vonani swihlale, eka yena, swi fana ni ntshuri lowu nga empfhukeni. ₁₆Xihlahla xa Lebanoni xi nga ka xi nga ringani ndzilo wa magandzelo, ni swifuwo swa kona swi nga ka swi nga ringani timhamba ta magandzelo. ₁₇Matiko hinkwawo i xilo xa hava emahlweni ka yena; eka yena i swilo swahava ntsena!

₁₈Mi ta fanisa Xikwembu na mani? Mi ta endla xifaniso xihi xa yena? ₁₉Mutirhi u nyukisa xifaniso, mufuri wa xi nameka hi nsuku, u nameka eka xona timpecana ta silivhere. ₂₀Xisiwana lexi tsetselelaka swa xona, xi hlawula murhi lowu nga munyiwiki, xi tilavela mutirhi la tlhariheke ku vatla xifaniso lexi nga tsekatsekiki. ₂₁A mi swi tivi xana? A mi swi twangi xana? A mi tivisiwanga eku sunguleni? A mi xiyanga ta ku tumbuluka ka misava xana? ₂₂Hi yena la tshameke empfhukeni, ehenhla ka xirhendzevutana xa misava, kutani vaaki va yona va fana ni tinjiya. U andlala matilo tanihi nguvu leyo vevuka, u ma andlala tanihi tende a ma endla vuako bya yena. ₂₃Hi yena la endlaka tihosi xilo xa hava, ni vaavanyisi va misava xilo lexi nga riki xa nchumu. ₂₄Va nga si simekiwa ni ku byariwa, nsinya wa vona wu nga si va ni timitsu emisaveni wa huhuta ehenhla ka vona, kutani va vuna, kutani xihuhuri xi va vutla tanihi mungu. ₂₅“Mi ta ndzi fanisa na mani leswaku ndzi fana na yena xana?” ku vula la hlawulekeke. ₂₆Tlakusani mahlo ya n'wina, mi languta! I mani la tumbuluxeke swilo sweswo, la fambiseke hi ku ri xaxameta vandla ra swona xana? U swi vitana hinkwaswo hi mavito ya swona, hi ntamu lowukulu wa yena, ni matimba lamakulu ya yena, ku hava ni xin'we lexi pfumalekaka.

₂₇Oho Yakobo! U vula yini-ke sweswo, na wena Israele u ku: “Ndlela ya mina yi fihliwile emahlweni ka Yehovha, Xikwembu xa mina a xi vuri nchumu hi timhaka ta mina”? ₂₈A ku swi tivi xana? A ku swi twanga xana? I Xikwembu lexi nga heriki, yena Yehovha la tumbuluxeke makumu ya misava; a nga karhali, a nga heri matimba, a nga kona la kambeke vutlhari bya yena. ₂₉U nyika la karheleke matimba ya yena, u pfuxa la heleke mbilu. ₃₀Ti mbhuri ta karhala, ta hela matimba, ni tinhenha ti lava ku wa; ₃₁kambe lava tshembaka Yehovha va engeta va kuma matimba lamantshwa. Va ta haha tanihi magama, va ta tsutsuma va nga karhali; va ta famba va nga tsani!