Ta ku avanyisiwa ka Egipta.
1“Vonani, Yehovha u khandziyile epapeni lero vevuka; a kongome eEgipta; swikwembu swa Egipta swi rhurhumela emahlweni ka yena, timbilu ta Vaegipta ti tsanile endzeni ka vona. 2Ndzi ta hlohlotela Muegipta ku lwa na Muegipta, leswaku munhu a lwa ni makwavo, nakulobye a lwa ni nakulobye, muti wu lwa ni muti, vuhosi byi lwa ni vuhosi. 3Moya wa Egipta wu ta titivala, ndzi ta herisa makungu ya vona, va ta ya hlahluva eka swikwembu swahava, ni ka vangoma, ni ka vona lava vutisaka vafi, ni ka vabvumbi. 4Ndzi ta nyiketa Egipta emavokweni ya hosi leyo leva, u ta fumiwa hi hosi leyi chavisaka,” ku vula Hosi Yehovha wa tinyimpi.
5Mati ya nambu ma ta phya, nambu wu ta koka, wu oma. 6Milambu yi ta nun'hwa, migerho ya Matsoro yi ta phya, yi oma; tinhlanga ni vungu swi ta vuna. 7Madyelo lama nga eribuwini, ni mitanga ya nambu swi ta oma, swi hundzuka ntshuri, swi nga ha vi kona. 8Vaphasi va tinhlampfi va ta rila hinkwavo lava hoxaka swinjovo enambyeni va vovola; lava kokaka nkukuto ematini va le khombyeni. 9Lava tirhaka ntsembyana lowu fenyiweke, ni lava lukaka ritiyi va ta va ni tingana. 10Timhandze leti tiyisaka tiko ti ta tshoveka; vatirhi hinkwavo va ta va ni gome.
11Tindhuna ta Sowani ta hlanya, vatsundzuxi lavo tlhariha va Faro i swihunguki. Mi nga vurisa ku yini eka Faro, mi ku: “Ndzi n'wana wa tintlhari, ndzi n'wana wa tihosi ta khale?” 12Ti kwihi-ke tintlhari ta wena? Ingi va ku byela, ku ta tiviwa leswi Yehovha wa tinyimpi a swi kaneleke ehenhla ka Egipta! 13Tindhuna ta Sowani ti hungukile, tindhuna ta Nofu ti lahlekeriwile; ti hambukisa Egipta, tona ma nga masungulo ya tinxaka ta vona. 14Yehovha u va chele moya wa sululwana, va dedelekisa Egipta eswilweni hinkwaswo leswi a swi endlaka hilaha xipyopyi xi dedelekaka loko xi hlanta. 15A ku na xilo lexi nga ta pfuna Egipta, hambi nhloko, hambi ncila, hambi wu ri ncindzu, hambi ri ri vungu!
16Hi siku rero Egipta u ta va tanihi vavasati, u ta rhurhumela, u ta tshuka hi ku komba ka voko ra Yehovha wa tinyimpi leri a nga ta ri tshambuluta ku lwa na yena. 17Tiko ra Yuda ri ta hlundzukisa Egipta; hinkwavo lava nga ta swi twa va ta rhurhumela hikwalaho ka makungu ya Yehovha wa tinyimpi lama vuriweke ehenhla ka yena.
18Hi siku rero, etikweni ra Egipta ku ta va ni miti ya ntlhanu leyi nga ta vulavula ririmi ra Kanana, leyi nga ta hlambanya eka Yehovha wa tinyimpi; wun'wana wu ta thyiwa muti wa ku pona.
19Hi siku rero Yehovha u ta va ni gandzelo exikarhi ka tiko ra Egipta; ekusuhi ni ndzilakana, ku ta va ni xitsundzuxo lexi nga ta hlawuleriwa Yehovha. 20Xi ta va xikombiso ni vumbhoni eka Yehovha wa tinyimpi etikweni ra Egipta; hikuva kutakuloko va huwelela eka Yehovha hikwalaho ka vaxanisi va vona, u ta va rhumela muponisi ni mulweri la nga ta va lwela. 21Yehovha u ta titivisa eka Vaegipta, kutani Vaegipta va ta tiva Yehovha hi siku rero; va ta n'wi tirhela hi magandzelo ni mihlengo; va ta tiboha eka Yehovha hi ku hlambanya, kutani va ta endla hakona. 22Yehovha u ta ba Vaegipta, a va ba, kutani a va horisa; kwalaho va ta hundzukela eka Yehovha, kutani u ta olova, a va horisa. 23Enkarhini wolowo ndlela yi ta va kona leyi humaka eEgipta ku ya etikweni ra Asiriya, Asiriya u ta ya eEgipta, kutani Egipta u ta ya eka Asiriya kutani Vaegipta va ta gandzela swin'we ni Vaaxuru.
24Hi siku rero Israele u ta va wa vunharhu la hlanganeke na Egipta na Asiriya, ku va ku kateka exikarhi ka misava. 25Yehovha wa tinyimpi u ta va katekisa, a ku: “Ku katekile Egipta, tiko ra mina, na Asiriya, ntirho wa mavoko ya mina, na Israele, ndzhaka ya mina.”
