ESAYA 16

₁Rhumelani mufumi wa tiko swinyimpfana swa ndzuvo, swi suka eSela, swi hundza emananga ku ya nghena entshaveni ya wanhwana wa Siyoni! ₂Tanihi tinyanyana leti hahaka hinkwako, tanihi mavondlo ya tona lama humesiweke exisakeni, vanhwanyana va Mowabu va ta va tano emahlalukweni ya Arinoni. ₃“Hi tsundzuxe, hi lamule, hi nyike enhlekanhini munyama wa vusiku; fihla vachavi, u nga nyiketi vabaleki! ₄Vabaleki va Mowabu a va luvele eka wena! U va xichavelo xa vona eka mulovisi! Hikuva fumu ri ta suka ku phanga ku ta hela, vaxanisi va ta sukela tiko. ₅Vutshamo bya vuhosi byi ta tiyisiwa hi nsovo, ehenhla ka byona ku ta tshama hi ku tiya entsongeni wa Davhida muavanyisi la rhandzaka swo lulama, ni la hatlisaka ku avanyisa hi swinene.”

₆Ha tiva ku tikukumuxa ka Mowabu la tiarisaka, ni manyunyu, ni ku tikurisa, ni xintsaka, ni ximonyo xa yena. ₇Mowabu u ta rilela Mowabu! Tiko hinkwaro ri ta va enkosini! Rilani, mi rilela swipambana swa Kiri-Harasete! ₈Hikuva mitanga ya Hexiboni yi tshikiwile, na yona mitanga ya vhinya ya Sibima leyi ngi yi pyopyisa vini va matiko, leyi nga nava ku fikela eYazere, ni le kule emananga, leyi nga yisa mahluke ya yona entsungeni wa lwandle! ₉Ndza rilela hi swirilo swa Yazere tivhinya ta Sibima; ndzi ku tsakamisa hi mihloti ya mina, wena Hexiboni, na wena Eleyale; hikuva huwa ya mukhuvuti yi wele ehenhla ka mihandzu ni tinhulu ta wena. ₁₀Ku tsaka ni mikhuvo swi sukile emitangeni; ni le tivhinyeni, a ka ha ri na tinsimu ni ku tsaka, a ka ha khuvutiwi mihandzu eswikhuvutelweni, ndzi miyetile mitlango ya vakhuvuti! ₁₁Hikwalaho marhumbu ya mina ma pfuma ehenhla ka Mowabu, tanihi xitendze, ni mbilu yanga yi endlisa sweswo ehenhla ka Kiri-Herexe. ₁₂Kutani, hambi ku voniwa Mowabu a karhala exitsungeni, ni loko a nghena etempeleni ku ya khongela, a nga ka a nga kumi nchumu!

₁₃Hi rona rito ra Yehovha leri a nga ri vula khale ehenhla ka Mowabu. ₁₄Kambe sweswi Yehovha u vurisa sweswo, u ri: “Ku ta hundza malembe manharhu lama fanaka ni malembe ya mutirhi, kutani Mowabu swin'we ni ntshungu lowukulu wa yena, u ta tekeriwa ku vonakala ka yena, lexi nga ta sala xi ta va xilo lexitsanana, lexi nga ha riki nchumu.”