HOSIYA 6

₁“Tanani, a hi tlheleleni eka Yehovha, hikuva hi yena la hi handzuleke, kambe u ta hi horisa; u tsemile, kambe u ta hi bohelela timbanga. ₂Loko ku hele masiku mambirhi, u ta hi hanyisa; hi ra vunharhu, u ta hi yimisa leswaku hi hanya emahlweni ka yena. ₃A hi tiveni Yehovha, a hi chivirikeni ku n'wi tiva! Ku humelela ka yena ku tiyile kukotisa vurhonga; u ta hi tela kukotisa mpfula, kukotisa mpfula ya xirimo leyi nonisaka misava.”

₄Ndzi ta ku endla yini, Efrayimi? Ndzi ta ku endla yini, Yuda? Hikuva rirhandzu ra n'wina ri tanihi hunguva ya vuxa, ni mberha leyi sukaka hi ku hatlisa. ₅Hikwalaho, ndzi va bile hi vaprofeta, ndzi va dlele hi marito ya nomu wa mina; ku avanyisa ka mina ku ve tanihi ku vonakala loku humaka! ₆Hikuva ndzi rhandza tintswalo, ku nga ri magandzelo, ni ku tiviwa ka Xikwembu ku tlurisa tiholokosta.

₇Kambe vona va tlule ntwanano kukotisa Adama; laha, va ndzi endlele vuntswaka. ₈Giliyadi i muti wa vadyohi, u tichele hi ngati. ₉Ku fana ni makhamba lama tumbelelaka vanhu, hi sweswo ntlawa wa vaprista; va dlaya vanhu endleleni leyi yaka eXikeme; hikuva va endla hi mona. ₁₀Endlwini ya Israele, ndzi vone leswo chavisa; kona ku oswana Efrayimi! Israele wa tinyamisa! ₁₁Na wena Yuda, u hlayiseriwe ku tshovela, siku ndzi kutsulaka tiko ra mina evukhumbini bya rona.