Nawu wa Muxe a wu ri ndzhuti wa swilo leswi nga ta humelela.
1Hikuva nawu, leswi wu nga ndzhuti wa leswo saseka leswi nga ta humelela, swi nga riki xifaniso xa xiviri xa timhaka, wu tsandzekile ku hetisisa, ni siku ni rin'we, lava tshinelelaka magandzelo lama humesiwaka hi masiku hi lembe rin'wana ni rin'wana. 2Loko swi nga ri tano, xana ingi va nga tshikanga ku ma humesa, hikuva vagandzeri lava ngi va hlantswiwile kan'we va nga ka va nga ha vi na ripfalo ra swidyoho swa vona.
Mhamba ya Kriste, hi yona leyinene.
3Kambe emagandzelweni walowo, ku anakanyiwa vudyoho hi lembe rin'wana ni rin'wana; 4hikuva ngati ya tinkunzi ni ya swiphongo yi tsandzeka ku susa xidyoho. 5Hikwalaho Kriste, siku a nga ta emisaveni, u te: “A ku rhandzanga magandzelo, hambi yi ri mihlengo, kambe u ndzi lunghisele miri. 6A ku tsakelanga magandzelo lama hisiwaka, hambi ma ri lama humesiwaka hikwalaho ka vudyoho. 7Hilaha ndzi nge: ‘Vona, Xikwembu, ndza ta ku ta endla ku rhandza ka wena,’ hilaha ku tsariweke ehenhla ka mina ebukwini.” 8Leswi a nga te eku sunguleni leswaku: “Loko ma ri magandzelo hambi yi ri mihlengo, ni magandzelo lama hisiwaka, ni magandzelo lama humesiwaka hikwalaho ka vudyoho, a ku ma rhandzanga ni ku ma tsakela”; kasi hi swona leswi humesiwaka hi nawu; 9a engeta kambe, a ku: “Vona, Xikwembu, ndza ta ku ta endla ku rhandza ka wena.” U herisa hi sweswo swo sungula, leswaku a ta veka swa vumbirhi. 10Hi ku rhandza kuloko, hi basisiwa hi magandzelo ya miri wa Yesu Kriste, lama nga endliwa kan'we.
11Loko a ri muprista un'wana ni un'wana, a ri karhi a yima hi masiku hinkwawo, a tirhela Xikwembu, a humesa kanyingi magandzelo ma ri man'we lama nga tiviki, ni siku ni rin'we, ku susa swidyoho; 12kambe yena, kuteloko a humesile mhamba yi ri yin'we hikwalaho ka vudyoho, u titshamele evokweni ra xinene ra Xikwembu hilaha ku nga heriki, 13a ri karhi a langutela leswi seleke, hileswaku lava nga valala eka yena, va endliwa vunavelo bya mikondzo ya yena. 14Hikuva hi ku humesa mhamba kan'we, u hetisile hilaha ku nga heriki lava basisiweke.
15Kutani Moya lowo Kwetsima, na wona, wu hi endlela vumbhoni bya mhaka leyi; 16hikuva kuteloko wu rhangile hi ku vula leswaku: “Hi wona ntwanano lowu ndzi nga ta wu endla na vona loko ku hundzile masiku walawo, ku vula Hosi, ndzi ta nghenisa milawu ya mina etimbilwini ta vona, ndzi yi tsala eswifuveni swa vona”; 17a engeta, a ku: “Kutani a ndzi nga ha tsundzuki swidyoho swa vona, ni ku homboloka ka vona.” 18Kunene laha ku rivaleriwa ka ku dyoha ku nga kona, a ka ha humesiwi mhamba hikwalaho ka swidyoho.
Vapfumeri va khongoteriwa ku tiya eku tshembeni, ni le ku pfumeleni, ni le ku yingiseleni.
19Hikwalaho, vamakwerhu, leswi hi pfumeleriwaka ku nghena evukwetsimelweni hi ngati ya Yesu, 20yi nga ndlela leyintshwa leyi hanyaka, leyi Yesu a nga hi boxela yona hi ku boxa xisirhelelo, yi nga nyama ya yena; 21kutani leswi hi nga ni muprista lonkulu la vekiweke endlwini ya Xikwembu, 22a hi tshineleleni hi mbilu leyinene, ni ku pfumela loku hetisekeke, timbilu ta hina ti basisiwile, ti nga ha ri na mapfalo layo biha, 23ni miri wa hina wu hlantswiwile hi mati lama tengeke. A hi tiyiseleni eku tivuleni ka ku tshemba ka hina, hi nga ri na ku tsekatseka, hikuva la hi tshembiseke wa tshembeka. 24A hi lavelaneni leswaku hi ta fambisana hi ku chivirika erirhandzwini, ni le mitirhweni leyo saseka. 25Hi nga tshuki hi tshika nhlengeletano ya hina hi mukhuva wa van'wana, kambe hi khongotelana, ngopfu leswi mi vonaka siku ri tshinelaka. 26Hikuva kungakuloko hi dyoha ha vomu, leswi hi nga amukela ku tiva ka ntiyiso, a ka ha ri na mhamba ya ku susa vudyoho, 27kambe ku ni ku langutela loku chavisaka ka ku avanyisiwa, ni ku kariha ka ndzilo lowu nga ta hisa valala.
28Loyi ngi a sandza nawu wa Muxe a a dlawa, ku nga ri na tintswalo, hi ku vula ka timbhoni timbirhi kumbe tinharhu; 29xana loko mi ehleketa, a hi ku biwa loku tlurisaka loku a nga ta ringanisiwa hakona, loyi a kandziyeleke N'wana wa Xikwembu, a ringaniseke leswaku ngati ya ntwanano leyi a hlantswiweke ha yona a hi nchumu, a engeta a sandza Moya wa tintswalo xana? 30Hikuva hi tiva la nga te: “Ku rihisa i ka mina; ndzi ta tirihisela ndzi ri mina, ku vula Hosi.” Na kona kambe u te: “Hosi yi ta avanyisa tiko ra yona.” 31I mhaka leyi chavisaka ku wela emavokweni ya Xikwembu lexi hanyaka.
32Kambe anakanyani mikarhi leyo sungula, leyi kungakuloko mi voningiwile, mi nga tiyela ku lwa lokukulu ka ku vaviseka: 33hambi ku ri loko mi khomiwe hi tingana ni ku xanisiwa emahlweni ka vanhu, hambi ku ri loko mi yimile, mi va vanakulobye va lava toloveleke sweswo. 34Hikuva mi twele vusiwana lava bohiweke, kutani mi pfumerile hi ku tsaka loko swa n'wina swi tekiwa hi ku tiva leswaku mi ni rifuwo leri tlurisaka, leri nga kona hi masiku etilweni. 35Hikwalaho, mi nga tshuki mi lahla ku tshemba ka n'wina loku nga ni hakelo leyikulu. 36Hikuva mi fanele ku va ni ku tiyisela leswaku, kutakuloko mi endle ku rhandza ka Xikwembu, mi kuma leswi mi tshembisiweke swona. 37“Hikuva ku sele kutsongo, kutsongonyana, kutani la taka u ta fika a nga ka a nga hlweri. 38Kambe la lulameke u ta hanya hi ku pfumela, kambe kungakuloko a tlhelela endzhaku, moya wa mina a wa ha n'wi tsakeri.” 39Loko hi ri hina, a hi vanhu va ku tlhelela ku ya eku lahlekeni, kambe hi va ku pfumela, leswaku mimoya ya hina yi hanyisiwa.
