GENESA 35

₁Xikwembu xi ku eka Yakobo: “Rhurha, u tlhandlukela eBetele, u ya aka kona, u akela kona gandzelo eka Xikwembu lexi nga tikombisa eka wena, nkarhi lowu u nga balekela mombo wa Esawu, makwenu.”

₂Yakobo a ku eka va yindlu ya yena ni le ka hinkwavo lava ngi va ri na yena: “Susani swikwembu swin'wana leswi nga exikarhi ka n'wina, mi tihlantswa, mi funengela tinguvu tin'wana; ₃kutani hi ta suka hi tlhandlukela eBetele, ndzi akela kona gandzelo eka Xikwembu lexi nga ndzi hlamula siku ra khombo ra mina, xi nga va na mina endleleni leyi ingi ndzi fambile eka yona.” ₄Kavaloko va nyika Yakobo swikwembu hinkwaswo swin'wana leswi ngi swi ri emandleni ya vona, ni swingwavila swa le tindleveni ta vona, Yakobo a swi yimbela ehansi ka nkuhlu wa le kusuhi na Xikeme.

₅Kavaloko va suka; kutani ku chava Xikwembu ku ve ehenhla ka miti leyi vandzamaneke na vona, hikwalaho a va landzelangi vana va Yakobo. ₆Yakobo, ni vanhu hinkwavo lava ngi a ri na vona, va fika eLuzi, a nga Betele, etikweni ra Kanana. ₇Kutani a akela kona gandzelo, a thya xivandla lexi vito ra Eli-Betele (Xikwembu xa Betele); hikuva hi kona Xikwembu xi nga tihlavutela eka yena enkarhini a balekaka emahlweni ka hosi ya yena. ₈Kutani Debora, muan'wisi wa Rhaveka, a fa, a lahliwa ehansi ka Betele, ehansi ka nkuhlu; hikwalaho va wu thya vito ra Nkuhlu-wa-mikosi.

₉Xikwembu xi engeta xi tikombisa eka Yakobo loko a ri karhi a vuya hi le Padani-Aramu, xi n'wi katekisa. ₁₀Xikwembu xi ku eka yena: “Vito ra wena u Yakobo; vito ra wena a wu nga ha vuriwi Yakobo, kambe vito ra wena u ta va Israele”; sweswo xi n'wi thya vito ra Israele. ₁₁Kutani Xikwembu xi ku eka yena: “Hi mina Xikwembu xa matimba hinkwawo: tswalani, ma andza, tiko ni vunyingi bya matiko swi ta huma eka wena, ni tihosi ti ta huma enkaveni wa wena. ₁₂Kutani tiko leri ndzi nga ri nyika Abrahama na Isaka, ndzi ta ku nyika rona, ndzi ri nyika ni vatukulu va wena, endzhaku ka wena.” ₁₃Kutani Xikwembu xi tlhandluka, xi suka eka yena exivandleni xexo xi nga vulavula na yena eka xona. ₁₄Yakobo a aka xitsundzuxo exivandleni xexo Xikwembu xi nga vulavula na yena eka xona, xi ri xitsundzuxo xa maribye, kutani a gandzela ehenhla ka xona, a chela ni mafurha ehenhla ka xona. ₁₅Kutani Yakobo a thya xivandla xexo Xikwembu xi nga vulavula na yena eka xona, vito ra Betele (yindlu ya Xikwembu).

₁₆Kavaloko va suka eBetele, ka hari mpfhukanyana ku ya fika eEfrata, Rahele a lava ku veleka, kambe ku veleka ku nonon'hwa; ₁₇kakuloko ku veleka ku n'wi karhata, sungakati ri ku eka yena: “U nga chavi, hikuva u tlhela u tela hi n'wana wa wanuna.” ₁₈Kakuloko a lave ku nyiketa moya, u nge o fa, a n'wi thya vito ra Benoni (n'wana wa ku vaviseka ka mina); kambe tata wakwe a n'wi thya vito ra Benjamini (n'wana wa voko ra xinene).

₁₉Kavaloko Rahele a fa, a lahliwa endleleni ya Efrata, yi nga yona Betlehema. ₂₀Kutani Yakobo a aka xitsundzuxo ehenhla ka sirha ra yena; hi xona xitsundzuxo xa sirha ra Rahele, ninamuntlha xa ha ri kona. ₂₁Israele a suka, a dzima mitsonga ya yena emahlweni ka Edere.

₂₂Kakuloko Israele a akile etikweni lero, Rhuveni a ya etlela na Biliha, nhlantswa ya mana wa yena; Israele a twa mhaka leyi.

₂₃Vana va Yakobo a va ri khume na vambirhi: vana va Leya: Rhuveni, n'wana wa Yakobo wa mativula, na Simiyoni, na Levhi, na Yuda, na Isakara, na Zebuloni. ₂₄Vana va Rahele: Yosefa na Benjamini. ₂₅Vana va Biliha, nhlantswa ya Rahele: Dani na Neftali. ₂₆Vana va Zilipa, nhlantswa ya Leya: Gadi na Asere. Hi vona lavo vana va Yakobo, lava nga velekeriwa ePadani-Aramu. ₂₇Kutani Yakobo a fika eka Isaka, tata wakwe, eMamre, emutini wa Kiriyata-Araba, ku nge Hebroni, laha Abrahama na Isaka va akeke kona.

₂₈Masiku ya Isaka a ma ri malembe ya 180. ₂₉Kutani Isaka a nyiketa moya, a fa, a rhurheliwa eka varikwavo, a dyuhele, a andzele hi masiku. Kutani Esawu na Yakobo, vana va yena, va n'wi lahla.