GENESA 15

₁Endzhaku ka timhaka teto, rito ra Yehovha ri fika eka Abrama enorhweni, ri ku: “Abrama, u nga chavi. Ndzi xitlhangu xa wena ni hakelo ya wena leyikulu.”

₂Abrama a ku: “Hosi Yehovha, u ta ndzi nyika yini-ke? Ndza tifambela ndzi nga ri na vana, ni mudyandzhaka wa yindlu yanga, hi loyi Eliezere wa Damaska.” ₃Abrama a engeta a ku: “Waswivo, a ku ndzi nyikanga n'wana, kutani vona, loyi a nga ta dya ndzhaka ya mina i nandza la nga tswariwa endlwini.”

₄Kavaloko rito ra Yehovha ri fika eka yena, ri ku: “Yeloyi a nga ka a nga dyi ndzhaka ya wena, kambe ku ta dya loyi a nga ta huma emarhumbyini ya wena.” ₅Kutani a n'wi humesela ehandle, a ku: “Languta tilo u hlaya tinyeleti loko u nga swi kota.” A engeta a ku: “Vatukulu va wena va ta kotisa sweswo.”

₆Abrama a pfumela eka Yehovha, Yehovha a n'wi hlayela kona ku lulama.

₇Yehovha a engeta, a ku: “Hi mina Yehovha, la nga ku humesa eUru wa Kalediya, ku ta ku nyika tiko leri, u ri fuma.”

₈Kutani a ku: “Ndzi ta swi tivisisa ku yini leswaku ndzi ta ri fuma?”

₉Kutani Yehovha a ku: “Ndzi tisele thokazi ra malembe manharhu, ni mbuti ya malembe manharhu, ni khuna ra malembe manharhu, ni tuva, ni gugurhwana.” ₁₀Kutani a n'wi tisela swilo leswo, a swi avanyisa hi le xikarhi, a swi xaxameta swi lavana; ntsena a nga avanyisangi tinyanyana. ₁₁Kutani makoti ma ta wela etinyameni, kambe Abrama a ma swukuta.

₁₂Kavaloko dyambu ri lava ku pela, vurhongo lebyikulu byi khoma Abrama, kutani maswivo, nchavo wa munyama lowukulu wu n'wi khoma. ₁₃Kutani a ku eka Abrama: “U tivisisa swinene leswaku vatukulu va wena va ta luvela etikweni leri nga ka ri nga vi ra vona, va ta va makhumbi ya kona, va ta tsongahatiwa hi malembe ya mune wa madzana. ₁₄Kambe ndzi ta avanyisa tiko leri va nga ta fumiwa hi rona, kutani ndzhaku va ta huma kona va fuwe ngopfu. ₁₅Loko u ri wena, u ta tifambela hi ku rhula eka vatata wa wena, u ta yimberiwa u dyuhele swinene. ₁₆Kambe erixakeni ra vumune, va ta vuya halenu, hikuva ku homboloka ka Vaamori a ku si tala hi ku ringana.”

₁₇Kuteloko dyambu ri perile, ku wa munyama; kutani maswivo, khele leri pfurhaka, ni swisa leswi pfurhaka swi hundza exikarhi ka swilo leswi avanyisiweke. ₁₈Hi siku rolero, Yehovha a tiyisa ntwanano na Abrama, a ku: “Ndzi nyikile tiko leri eka vatukulu va wena, ku suka enambyeni wa Egipta, ku fikela enambyeni lowukulu, wu nga nambu wa Yufrata, ₁₉tiko ra Vakeni, ni ra Vakenizi, ni ra Vakadimoni, ₂₀ni ra Vahiti, ni ra Vaperesi, ni ra Varefayimi, ₂₁ni ra Vaamori, ni ra Vakanana, ni ra Vagirigaxi, ni ra Vayebusi.”