EZRA 5

₁Kute nkarhi lowu muprofeta Hagayi na muprofeta Zakariya, n'wana Ido, va nga profeta eka Vayuda va le Yudiya ni va le Yerusalema, hi vito ra Xikwembu xa Israele lexi nga vulavula na vona. ₂Hiloko ku pfuka Zerubabele, n'wana Salatiele, na Yexuwa, n'wana Yosadaka, va tlhela va sungula ku aka yindlu ya Xikwembu eYerusalema, va ri ni vaprofeta va Xikwembu lava va pfunaka.

₃Enkarhini wolowo ku ta eka vona Tatenayi, hosi ya tiko ra le ntsungeni wa nambu, a ri na Xetara-Bozenayi, ni vanakulobye va ku eka vona: “Mi byeriwile hi mani ku aka yindlu yoleyo, ni ku heta rirhangu rolero xana?” ₄Kutani hi va byela ni mavito ya vavanuna lava akeke vuako byolebyo. ₅Kambe tihlo ra Xikwembu xa vona ri languta vakulukumba va Vayuda, kutani va tshika ku va sivela loko mhaka yoleyo ya ha yisiwile ka Dariyosi, va langutela papila ra ku hlamula mhaka yoleyo.

₆Hi wona marito ya papila leri rhumeriweke hosi Dariyosi hi Tatenayi hosi ya tiko ra hase ka nambu, a ri na Xetara-Bozenayi ni vanakulobye va Afarsaka, va hase ka nambu. ₇Va n'wi rhumela papila ra ku n'wi tivisa, leri ku tsariweke timhaka leti eka rona, ri nge: “Eka hosi Dariyosi a ku ve ku rhula hinkwako lokukulu!

₈“Hosi a yi tive leswaku a hi yile etikweni ra Yuda, endlwini ya Xikwembu lexikulu; yona yi akiwa hi maribye lamakulu, lama vatliweke ni makhumbi ma fuleriwa hi mapulangi; mitirho ya hatlisa, ni mavoko ya vona ma ni vulwandla. ₉Kambe hi vutisile vakulukumba, hi vulavula na vona, hi ku: ‘Mi byeriwile hi mani ku aka yindlu yoleyo, ni ku aka rirhangu rolero xana?’ ₁₀Hi va vutisa ni mavito ya vona, hi ta ku byela wona hi ta tsala mavito ya vavanuna lava va va tirhisaka. ₁₁Kutani va hi hlamule, va ku: ‘Hi malandza ya Xikwembu xa le matilweni ni le misaveni, hi pfuxa yindlu leyi akiweke khale, ku ni malembe layo tala yi akiwile yi va yi hela hi hosi yin'wana leyikulu ya Vaisraele.

₁₂“ ‘Kuteloko vatata wa hina va karihisile Xikwembu xa le matilweni xi va nyiketa emavokweni ya Nebukadnetsara, Mukalediya, hosi ya Babilona, hi yena la onheke yindlu yoleyo, a yisa tiko leri eBabilona, evukhumbini. ₁₃Hambiswiritano, hi lembe ro sungula ra ku fuma ka Korexe, hosi ya Babilona, hosi Korexe yi vula leswaku yindlu ya Xikwembu a yi pfuxiwe; ₁₄swi tsandza ni mitirho ya nsuku ni ya silivhere ya yindlu ya Xikwembu leyi ngi yi humesiwile etempeleni ya Yerusalema hi Nebukadnetsara, a famba na yona, a yi veka etempeleni ya Babilona; hosi Korexe a yi humesa etempeleni ya Babilona, a yi tlherisa, a yi veka emavokweni ya Xexebasara, loyi a vekiweke vuhosi hi yena. ₁₅A ku eka yena: “Teka mitirho leyi, u famba na yona u yi veka etempeleni ya le Yerusalema, yindlu ya Xikwembu yi va yi pfuxiwa exiteni xa yona.” ₁₆Xexebasara, yeloyi u tile, u cerile masungulo ya yindlu ya Xikwembu leyi nga eYerusalema, kutani mpfhuka yi akiwa, ni sweswi a yi si hela.’

₁₇“Loko swi ri tano, loko hosi yi pfumela, a ku laviwe evuhlayiselweni bya xuma xa hosi ya Babilona loko ku vuriwile hi hosi Korexe leswaku ku akiwa yindlu ya Xikwembu eYerusalema, kutani hosi yi ta hi tivisa ku rhandza ka yona emhakeni leyi.”