Ta ku bvumbhiwa ka ku onhaka ka Yerusalema.
1“Loko u ri wena, n'wana wa munhu, u teka xitina, u xi veka emahlweni ka wena, u tsala eka xona xifaniso xa muti wa Yerusalema. 2U wu sivelela hilaha va endlaka hakona enkarhini wa nyimpi, u aka khokholo, u pfuxa tinhulu eka wona, ni swo hlanhla rirhangu ra wona. 3Kutani u teka pani ra nsimbhi u ri endla khumbi ra nsimbhi exikarhi ka wena ni xifaniso xa muti, u wu langutisisa; kutani wu ta rhendzeriwa; na wena, u wu sivela. Xona xi ta va xikombiso eka yindlu ya Israele.
4“Endzhaku ka swona u ta etlela hi rivambu ra ximatsi, u veka ku homboloka ka yindlu ya Israele eka rona. Kutani u ta rhwala ku homboloka ka vona hi masiku lama ringanaka ku etlela ka wena. 5Mina, ndzi ta ku ringanisela malembe ya ku homboloka ka vona hi masiku, ma va masiku ya 390; u ta rhwala sweswo ku homboloka ka yindlu ya Israele. 6Loko u ma hetile, u ta engeta u etlela hi rivambu ra xinene ra wena, sweswo u ta rhwala ku homboloka ka yindlu ya Yuda hi masiku ya mune wa makume. Siku rin'wana ni rin'wana ri ringanisa lembe. 7U ta languta tlhelo ra Yerusalema, lowu nga siveleriwa, u tshambuluta eka wona voko ra wena leri nga funengetiwangiki, kutani u ta bvumbha eka wona. 8Vona, ndzi ta veka mapindza ehenhla ka wena leswaku u nga hundzulukeli erivambyini rin'wana, ku kondza u va u hetile masiku ya ku siveriwa ka wena.
9“U teka koro, ni barley, ni tinyawa, ni swinyawana, ni mphoho, ni n'wahuva, u swi katsa swin'we embiteni, u tipfuvela vuswa ha swona, hi masiku hinkwawo ya ku etlela ka wena. U ta dya byona hi masiku ya, 390. 10Leswi u nga ta swi dya, swi ta tika ku ringana tixikele ta makume mambirhi hi siku rin'wana ni rin'wana. U swi dya u nusa eka swona kambe na kambe. 11U ta nwa matinyana lama ringanaka magombe mambirhi hi siku; u ta ma nwa hi nkarhi, ni nkarhi. 12U ta dya swinkwanyana swa barley, u swi sweka hi vulongo bya munhu emahlweni ka vona.” 13Kutani Yehovha u te: “Hi mukhuva lowo, vana va Israele va ta dya vuswa lebyi yilaka ematikweni laha ndzi nga ta va hlongolela kona.”
14Kavaloko ndzi ku: “Yo! Yehovha Xikwembu, vona moya wa mina a wu nga si tinyamisa, a ndzi si dya xifuwo lexi nga fa, hambi lexi nga handzuriwa ku sukela evuntshweni bya mina ku fikela sweswi, ni nyama leyi nunh'waka a yi nghenanga enon'wini wa mina.” 15Hilaha a nga te eka mina: “Vona, ndzi ku nyika vulongo bya homu ematshan'weni ya vulongo bya munhu, u ta sweka vuswa bya wena ha byona.” 16Kutani a ku: “N'wana wa munhu, ndzi ta susa timbuva ta vuswa emutini wa Yerusalema, va ta dya vuswa hi mpimo, va ri karhi va hlunama; va ta nwa mati hi mpimo, va ri karhi va tshuka. 17Va ta pfumala vuswa ni mati, va ta tshuka hinkwavo, va ta ondza eku hombolokeni ka vona.”
