Yerusalema, u fanisiwa ni nsati wa vuoswi.
1Rito ra Yehovha ri humelela eka mina, ri ku: 2“N'wana wa munhu, tivisa Yerusalema, swidyoho swa yena! U ta ku: Ku vula Hosi Yehovha eka Yerusalema, a ku: 3Hi xivongo ni ku tswariwa ka wena u wa tiko ra Kanana; tata wa wena a a ri wa ka Amori; mana wa wena a a ri wa ka Hiti. 4Siku lero u nga tswariwa ha rona, nkava wa wena a wu nga tsemiwanga, a va ku hlantswanga hi mati ku ku basisa, a va ku totanga hi munyu, a va ku phutselanga engubyeni. 5A ku nga ri na munhu la, ku twelaka vusiwana ku ku pfuna, hambi hi xilo xin'we xa swilo leswiya, kambe hi siku ra ku tswariwa ka wena u cukumetiwile enhoveni hi lava ku nyenyeke.
6“A ndzi hundza ekusuhi na wena, ndzi ku vona u etlele engatini ya wena, ndzi ku: ‘Hanya engatini ya wena!’ Ndzi engeta ndzi ku: ‘Hanya engatini ya wena!’ 7Ndzi ku andzisile hi madzana ni madzana kukotisa byanyi bya nhova, kutani u kula, u va u lehile, u sasekile ngopfu; mavele ya wena ma kula, u hundzuka wanhwana, kambe a wu ri ni vusweti u nga ambalanga nchumu. 8Ndzi hundza ekusuhi na wena, ndzi ku vona; nkarhi wa wena a wu fikile, nkarhi wa rirhandzu, kutani ndzi tshandzavuta nkumba wa mina ehenhla ka wena, ndzi funengeta vusweti bya wena, ndzi ku hlambanyela, ndzi endla ntwanano na wena, ku vula Hosi Yehovha, kutani u va wa mina.
9“Ndzi ku hlantswa ematini, ndzi susa ngati ya wena ehenhla ka wena, ndzi ku tota hi mafurha. 10Ndzi ku ambexa nguvu leyi lukiweke, ndzi ku ambexa ni tintanghu ta dzovo ra ntini, ndzi ku bohelela nguvu ya ntsembyana, ndzi ku funengeta hi nguvu ya ku saseka ngopfu. 11Ndzi ku sasekisa hi swibombiso ni vusenga emavokweni, ndzi ku bohela ni sindza enhan'wini. 12Ndzi nghenisa xingwavila etinhompfini ta wena, ni swingwavila etindleveni, ni musingasoro lowo saseka, ndzi ku vehela enhlokweni. 13Hi mukhuva lowo u sasekisiwa hi nsuku ni silivhere, u funengela nguvu ya ntsembyana, ni tinguvu leto saseka ngopfu ni leto lukiwa. U xurha hi mapa lamanene ya koro, ni vulombe, ni mafurha, u va u saseka ngopfu, u fikela ni le vuhosini. 14U twarile ngopfu exikarhi ka matiko hi ku saseka ka wena, a ku vanga na xisandzu hikwalaho ka ku kwetsima ka mina loku ndzi ku funengete hakona, ku vula Hosi Yehovha.
15“Kambe u tshembile ku saseka ka wena, eku twaleni ka wena, u endlile vuoswi, u tinyiketile vaendzi hinkwavo lava nga swi rhandza. 16U tekile tinguvu ta wena, u ti rhunga swin'we ku tilunghisela tialitari ta ku gangisiwa kona. Swilo swo tano a swi nga si vonaka, kambe swi nga ka swi nga ha vonaki. 17U tekile swibombiso swa nsuku ni swa silivhere leswi ndzi nga ku nyika, u tiendlele swifaniso swa vavanuna lava u tinyamisake na vona. 18U tekile tinguvu ta wena leti lukiweke, u swi funengeta ha tona, u halatile emahlweni ka swona mafurha ya mina ni mirhi ya risuna ya mina. 19Ni vuswa lebyi ndzi ku nyikeke, ni mapa layo saseka, ni mafurha, ni vulombe, hinkwaswo leswi ndzi ku phameleke ha swona u swi vekile emahlweni ka swona, u endlile ha swona timhamba ta risuna. Kunene u swi endlile, ku vula Hosi Yehovha.
20“U tekile varisanyana ni vanhwanyana lava u ndzi velekeleke vona, u gandzerile ha vona leswaku swi ta va swakudya swa swona. 21Xana vuoswi bya wena byi nga ringananga leswaku u engeta u dlaya vana va mina, u va nyiketa hi ku va hisa hi ndzilo-ke? 22Exikarhi ka manyala ya wena hinkwawo, ni vugangu bya wena, u rivele masiku ya vuntshwa bya wena loko wa ha ri ni vusweti bya wena ntsena, ni loko u puluvundza engatini ya wena.
23“Hikwalaho ka manyala ya wena hinkwawo u ni khombo, u ni khombo wena ku vula Hosi Yehovha. 24U tiakele tindlu to oswana kona, u lunghisile tindhawu to gangisiwa kona entsendzeleni wun'wana ni wun'wana; 25emahandzeni hinkwawo u lunghisile ndhawu ya vugangu, u nyamisile ku saseka ka wena, u tinyiketile eka muendzi un'wana ni un'wana, u engeterile ngopfu vuoswi bya wena. 26U endlile vuoswi ni Vaegipta, vanakuloni va miri leyo tiya, u engetele ngopfu vugangu bya wena ku ndzi vilerisa mbilu. 27Vona, ndzi tshambulutile voko ra mina ehenhla ka wena, ndzi hungutile ndzhaka ya wena, ndzi ku nyiketile valala va wena, va ri vanhwana va Vafilista lava nga ni tingana hikwalaho ka mitirho ya wena leyo biha. 28U gangisile ni Vaaxuru hikuva u nga si xurha hi ku dyoha; hambiswiritano a wu kolwanga. 29U andzisile kambe vuoswi bya wena etikweni ra Kanana ku fika eKalediya, hambiswiritano, a wu kolwanga.
30“Yo! Vutoya bya mbilu ya wena ku vula Hosi Yehovha, leswi u endleke hinkwaswo leswiya swa vuoswi lebyi kulukumba ngopfu! 31Loko u akile tindlu ta vuoswi emahandzeni hinkwawo, ni loko u tilunghisele tindhawu to oswana emitsendzeleni hinkwayo, a ku fananga ni lowa vuoswi, a ku langutelanga hakelo. 32Kambe a wu ri nsati wa vuoswi la rhurhelaka vaendzi ematshan'weni ya ku khensela nuna wa yena. 33Vaoswi hinkwavo va tsakisiwa hi hakelo, kambe hi wena la nga tsakisa lava u gangiseke na vona, u va hakerile kunene leswaku va humelela hinkwako ku ta oswana na wena. 34U hambene ni vavasati van'wana hi ku oswa ka wena, hikuva a ku tshamanga u naveriwa. Leswi u humeseke hakelo ematshan'weni ya ku yi amukela, emhakeni leyi, u hambene ni van'wana.
35“Hikwalaho, wena muoswi, yingisa rito ra Yehovha! 36Ku vula Hosi Yehovha a ku: Leswi u hangalaseke xuma xa wena, ni leswi u kombiseke vusweti bya wena evuoswini bya wena, ni hikwalaho ka swifaniso swa wena swa manyala, ni ngati ya vana va wena lava u nyikeke vona, 37waswivo, ndzi ta hlengeleta vagangisi va wena lava u oswaneke na vona, lava u va rhandzeke, ni lava u va vengeke, ndzi ta va hlengeleta hi matlhelo hinkwawo, ndzi va kombisa vusweti bya wena kutani va ta byi vona. 38Ndzi ta ku avanyisa hilaha nsati wa vuoswi ni loyi a halataka ngati va avanyisiwaka hakona. Mina ndzi ta halata ngati ya wena hi rilondzo ni vukari. 39Ndzi ta ku nyiketa emavokweni ya vona va ta mbundzuxa yindlu ya wena, va hlanhla switsunga swa wena, va ku susela tinguvu, va ku tekela masindza ni swingwavila swa wena, va ku siya evuswetini bya wena. 40Va ta rhamba vandla ku lwa na wena, va ku khandla hi maribye va ku tlhava hi matlhari. 41Va ta hisa tindlu ta wena hi ndzilo, va hetisa eka wena ku avanyisa ka mina emahlweni ka vavasati lavo tala. Hi mukhuva lowo, ndzi ta ku tshikisa vuoswi bya wena, u ta tshika ku humesa hakelo. 42Ndzi ta hetisa vukari bya mina ehenhla ka wena, rilondzo ra mina ri ta suka eka wena, ndzi miyela, kutani vukari bya mina byi ta hela.
43“Hikuva u rivele masiku ya vuntshwa bya wena, kambe u ndzi holovisile hi timhaka leti hinkwato, vona ndzi ta rihisa mikhuva ya wena enhlokweni ya wena, ku vula Hosi Yehovha. Kutani u nga ka u nga ha engeteli manyala ya wena hi vudlayi.
44“Vona, un'wana ni un'wana la vulavulaka hi swivuriso u ta vula ehenhla ka wena xivuriso lexi: ‘Wanhwana u fana ni mana wakwe.’ 45U n'wana wa mana wa wena la nga fularhela nuna ni vana va yena; u makwavo wa vamakwenu lava nga fularhela vanuna ni vana va vona. Mana wa n'wina a a ri wa ka Hiti, tata wa n'wina a a ri wa ka Amori. 46Hosi ya wena ya xisati la tshamaka eximatsini xa wena i Samariya, ni vanhwanyana va yena; ndzisana ya wena la tshamaka exineneni, i Sodoma, ni vanhwanyana va yena. 47A ku fambanga hi mitila ya vona ntsena, ni ku landza mikhuva ya vona ntsena, a swi ri leswitsongo leswo; kambe u va tlurile emanyaleni ya wena hinkwawo. 48Ndza hanya, ku vula Hosi Yehovha: Sodoma, makwenu ni vanhwana va yena a va endlanga hilaha u endleke hakona, wena ni vanhwana va wena. 49Loko ku ri ku homboloka ka makwenu Sodoma ni vanhwana va yena, va tikurisile, a va hanya endzalweni, a va tirivala, a va nga tweli vusiwana lava nga ekhombyeni ni vapfumari. 50Va tikurisile va endlile manyala emahlweni ka mina; kutani loko ndzi swi vonile ndzi va susile. 51Loko a ri Samariya, a nga dyohanga kukotisa tlhelo rin'we ra swidyoho swa wena; u n'wi tlurile ngopfu hi ku biha ka wena; u landzurile vamakwenu hi ku homboloka ka wena. 52Na wena sweswi, u soriwa hilaha u nga sola vamakwenu hikwalaho ka swidyoho swa wena leswi tlulaka leswa vona, hi ku biha ka wena, u va lulamisa. Na wena u tshuka, u va ni tingana, hikuva u landzurile vamakwenu.
53“Ndzi ta tlherisa vabohiwa va vona, vabohiwa va Sodoma, ni vanhwana va vona, ni vabohiwa va Samariya, ni vanhwana va vona, ni vabohiwa va wena exikarhi ka vona, 54leswaku u rhwala tingana ta wena, u va u soriwa hikwalaho ka mitirho ya wena, kutani swi ta va chavelela. 55Makwenu Sodoma, ni vanhwana va yena va ta tlhela ematshamelweni ya vona ya khale, na Samariya, ni vanhwana va yena, va ta tlhela ematshamelweni ya vona ya khale, na wena ni vanhwana va wena, mi ta tlhela ematshamelweni ya n'wina ya khale. 56Hi siku ra ku tikurisa ka wena, vito ra Sodoma a ri nga ri enon'wini wa wena, 57loko ku homboloka ka wena ku nga si tiviwa, loko u tshama u soriwa hi vanhwana va Siriya ni va matlhelo hinkwawo, ni vanhwana va Vafilista lava nga ku rhuketela hi matlhelo hinkwawo? 58U rhwala ku homboloka ka wena ni manyala ya wena, ku vula Yehovha.
59“Hikuva ku vula Hosi, Yehovha: Ndzi ta ku endla hilaha u endleke hakona, kasi u sorile ku hlambanya ka wena loko u onhile xinakulobye. 60Kambe mina, ndzi ta anakanya xinakulobye xa mina, lexi ndzi nga xi endla na wena evuntshweni bya wena, ndzi ta endla na wena ntwanano lowu nga heriki. 61U ta va ni tingana loko u ta anakanya mitirho ya wena loko u ta amukela vamakwenu lavakulu ni lavatsongo, ni loko ndzi ku nyika vona, leswaku va va vanhwana va wena, kambe ku nga ri hikwalaho ka xinakulobye xa wena. 62Ndzi ta tiyisa ntwanano wa mina na wena, kutani u ta tiva leswaku hi mina Yehovha, 63leswaku u anakanya mikarhi leyi nga hundza, u va ni tingana, kambe u miyela, ni ku tisola, loko ndzi ta ku rivalela mitirho hinkwayo ya wena, ku vula Hosi, Yehovha.”
