EZEKIELE 11

₁Moya wu ndzi tlakusela ehenhla, wu ndzi yisa enyangweni ya le vuxeni bya Yindlu ya Yehovha, leyi langutaka tlhelo ra le vuxeni; kutani, maswivo, enyangweni a ku yimile vavanuna va 25; exikarhi ka vona ndzi vona Yaazaniya n'wana Azuri, na Pelatiya n'wana Benaya, tihosana ta tiko. ₂Yehovha a ku eka mina: “N'wana wa munhu, hi vona valavo lava anakanyaka leswo homboloka, ni lava letelaka leswo biha emutini lowo, ₃va ku: ‘A hi nkarhi wo aka tindlu; muti lowu i mbita, hina, hi nyama.’ ₄Hikwalaho profeta ehenhla ka vona u bvumbha, wena n'wana wa munhu.” ₅Kavaloko moya wa Yehovha wu xikela ehenhla ka mina, wu ku eka mina: “Vulavula, u ku: Ku vurile Yehovha: Mi ri karhi mi vula sweswo, n'wina va yindlu ya Israele! Leswi swi mi khandziyelaka etinhlokweni, ndza swi tiva mina. ₆Mi andzisile mitsumbu emutini lowo, mi tatisile mitsendzele hi ngati. ₇Hikwalaho, ku vula Hosi Yehovha, u ri: Lava mi nga va dlaya exikarhi ka wona, hi yona nyama, na wona muti i mbita. Kambe n'wina ndzi ta mi humesa exikarhi ka wona. ₈Mi chavile fumu, kasi ndzi ta ri tisa ehenhla ka n'wina, ku vula Hosi Yehovha. ₉Ndzi ta mi humesa exikarhi ka muti ku mi nyiketa emavokweni ya vamatiko ndzi va ndzi mi avanyisa. ₁₀Mi ta wa hi fumu, ndzi ta mi avanyisa endzilakaneni wa tiko ra Israele, mi ta tiva leswaku hi mina Yehovha. ₁₁Muti lowu, wu nga ka wu nga vi mbita eka n'wina, na n'wina mi nga ka mi nga vi tinyama. Ndzi ta mi avanyisa endzilakaneni wa tiko ra Israele, ₁₂mi ta tiva leswaku hi mina Yehovha loyi mi nga hlayisangiki milawu ya yena; kambe mi hanyile hi milawu ya matiko lama mi rhendzeleke.” ₁₃Loko ndzi ri karhi ndzi profeta, Pelatiya, n'wana Benaya, a fa; kutani ndzi wa hi mombo wa mina, ndzi huwelela hi rito leri tlakukeke, ndzi ku: “Yo! Hosi Yehovha! Xana u ta lovisa lava seleke Vaisraele xana?” ₁₄Kutani rito ra Yehovha ri ta eka mina, ri ku: ₁₅“N'wana wa munhu, vamakwenu, vamakwenu va xinuna va rixaka ra wena, ni va yindlu hinkwayo ya Israele, hi vona valavo vaaki va Yerusalema, va nge eka vona: ‘Tshamisani ekule na Yehovha, hi nyikiwile tiko ku ri fuma!’

₁₆“Hikwalaho vula u ku: ‘Ku vula Hosi Yehovha: Kunene ndzi va hangalasile exikarhi ka matiko, ndzi va hangalasile ematikweni man'wana, kambe ndzi ta va xichavelo xa vona nkarhinyana ematikweni laha va nga kona.’ ₁₇Hikwalaho u ta ku: ‘Ku vula Hosi Yehovha: Ndzi ta mi vuyisa hi le matikweni, ndzi ta mi tlherisa ematikweni laha ndzi mi hangalaseke kona, ndzi mi nyika kambe tiko ra Israele.’ ₁₈Va ta vuya eka rona, va ta susa swiyilo hinkwaswo ni manyala hinkwawo. ₁₉Ndzi ta va nyika mbilu yi ri yin'we, ndzi nghenisa endzeni ka vona moya lowuntshwa; ndzi ta susela emimirini ya vona timbilu ta maribye, ndzi va nyika timbilu ta nyama, ₂₀leswaku va famba emilawini ya mina va ri karhi va hlayisa swileriso swa mina va swi hetisa, kutani va ta va tiko ra mina, mina ndzi va Xikwembu xa vona. ₂₁Loko va ri vona lava tsakelaka swifaniso swa vona ni manyala ya vona, ndzi ta va rihisela mitirho ya vona etinhlokweni ta vona, ku vula Hosi Yehovha.”

₂₂Kutani tikerubu ti tlakusa timpapa ta tona, ni masondzo ma ri karhi malandza ekusuhi, kutani ku kwetsima ka Xikwembu xa Israele a ku tshama ehenhla ka tona empfhukeni. ₂₃Kutani ku kwetsima ka Yehovha ku suka exikarhi ka muti ku ya yima ehenhla ka ntshava leyi nge tlhelo ra vuxa ra muti.

₂₄Moya wu ndzi tlakula hi norho, wu ndzi yisa eKalediya, eka vabohiwa, kutani mahlori lawa ndzi ma voneke ma suka emahlweni ka mina. ₂₅Kutani ndzi hlayela vabohiwa marito hinkwawo lawa Yehovha a ndzi kombiseke wona.