EZEKIELE 10

₁Ndzi languta, kutani ndzi vona empfhukeni lowu ngi wu ri ehenhla ka tinhloko ta tikerubu xilo lexi nga ribye ra safiri, ni xilo lexi nga fana ni xiluvelo a xi ri ehenhla ka wona. ₂Kutani Yehovha a ku eka munhu la ambaleke nguvu ya ntsembyana: “Nghena exikarhi ku masondzo ehansi ka tikerubu, u tata mavoko ya wena hi makala lama vuvumelaka, lama humaka exikarhi ka tikerubu, u ma hangalasa ehenhla ka muti!” Kutani a ya kona ndzi ri karhi ndzi n'wi vona.

₃Tikerubu a ti yimile hitlhelo ra xinene ra Yindlu loko munhu loyi a ya kona, kutani papa ri tata xivava xa le ndzeni. ₄Kutani ku kwetsima ka Yehovha ku suka ehenhla ka tikerubu ku ya yima ehenhla ka nyangwa ya Yindlu, kutani yindlu yi tatiwa hi papa, na xona xivava xi tala hi ku vangama ka ku kwetsima ka Yehovha. ₅Mpfumawulo wa timpapa ta tikerubu wu twakala ku fika exivaveni xa le handle, wu fana ni rito ra Xikwembu xa matimba loko xi vulavula.

₆Yehovha a lerisa munhu loyi a ambaleke nguvu ya ntsembyana, a ku: “Oka ndzilo exikarhi ka masondzo, exikarhi ka tikerubu. Kutani munhu loyi a pfuka a ya yima ekusuhi ni masondzo. ₇Kavaloko kerubu yi tshambuluta voko ra yona exikarhi ka tikerubu tlhelo ra ndzilo lowu nga exikarhi ka tikerubu,” yi okela ndzilo yi wu veka emandleni ya munhu la ambaleke nguvu ya ntsembyana; yena a wu teka a huma. ₈Kambe a ku vonaka xivumbeko xa voko ra munhu ehansi ka timpapa ta tikerubu.

₉Ndzi va ndzi languta, kutani ndzi vona mune wa masondzo ekusuhi ni tikerubu; sondzo rin'wana ni rin'wana a ri ri ekusuhi ni kerubu yin'wana ni yin'wana; nghohe ya masondzo a yi fana ni krisolita. ₁₀Ma fanana hi vumune bya wona, sondzo rin'wana a ri hingakanya sondzo rin'wana. ₁₁Loko ma tshinelela emahlweni, ma famba hi matlhelo ya wona ya mune, a ma nga rhendzeleki, laha nhloko yi languteke kona, hilaha ma nga famba kona ma nga rhendzeleki. ₁₂Mimiri ya tikerubu ni mihlana ya wona, ni mavoko ya wona, ni timpapa, ni masondzo ya wona ya mune a swi tele hi mahlo hi matlhelo hinkwawo. ₁₃Loko ma ri masondzo, ndzi twa leswaku ma thyiwa vito ra xidzedze. ₁₄Kerubu yin'wana ni yin'wana a yi ri ni mimombo ya mune; mombo lowo rhanga a wu ri mombo wa kerubu, wa lowa vumbirhi a wu ri mombo wa munhu; wa vunharhu, wa nghala; wa vumune, wa gama. ₁₅Kutani tikerubu ti tlakuka; tona, a swi ri swivumbiwa leswi ndzi nga swi vona enambyeni wa Kebara. ₁₆Loko tikerubu a ti famba, masondzo na wona a ma famba ekusuhi na tona; loko tikerubu ti tlakusa timpapa ku hahela ehenhla, wona masondzo a ma nga suki ekusuhi na tona. ₁₇Loko ti yima, na wona masondzo a ma yima; loko ti tlakukela ehenhla, na wona masondzo ma titlakusa na tona, hikuva moya wa swivumbiwa leswi hanyaka a wu ri eka wona.

₁₈Kutani ku kwetsima ka Yehovha ku suka enyangweni ya yindlu ku ya yima ehenhla ka tikerubu. ₁₉Tikerubu ti tlakusa timpapa ta tona, ti haha ti suka emisaveni emahlweni ka mina, loko ti suka, na wona masondzo ma landza hi le kusuhi. Kutani ti yima enyangweni ya le vuxeni ya Yindlu ya Yehovha; ku kwetsima ka Xikwembu xa Israele a ku ri ehenhla ka tona. ₂₀Hi swona swivumbiwa leswi ndzi nga swi vona ehansi ka Xikwembu xa Israele, ekusuhi ni nambu wa Kebara, kutani ndzi vona leswaku a ti ri tikerubu. ₂₁Yin'wana ni yin'wana a yi ri ni mune wa mimombo, yin'wana ni yin'wana a yi ri ni mune wa timpapa; xilo lexi fanaka ni voko ra munhu a xi ri ehansi ka timpapa ta tona. ₂₂Mimombo ya tona a yi fana kunene ni mimombo leyi ndzi yi voneke enambyeni wa Kebara, a yi fana hi nghohe, a ya ri yona hi xiviri. Yin'wana ni yin'wana a yi famba emahlweni ka yona.