EKSODA 40

₁Kutani Yehovha a vulavula na Muxe, a ku: ₂“Hi siku ro rhanga ra n'hweti yo sungula, u ta dzima yindlu, yi nga Tabernakela ya nhlengeletano, ₃u nghenisa kona areka ya vumbhoni, u sirhela areka hi nguvu, ₄u ta tisa ni tafula, u ri lunghisela swibya swa rona; u tisa ni kandelari, u lumeka timboningo ta yona. ₅U ta veka alitari ya nsuku ya mirhi ya risuna emahlweni ka areka ya vumbhoni, kutani u ta vamba nguvu enyangweni ya Tabernakela. ₆U ta veka alitari ya ku hisa magandzelo enyangweni ya yindlu ya Tabernakela ya nhlengeletano. ₇Kutani u ta veka nkamba exikarhi ka yindlu ya nhlengeletano ni alitari, u chela mati kona. ₈U ta rhendzela hinkwako hi xivava u vamba nguvu enyangweni ya xivava. ₉Kutani u ta teka mafurha ya ku tota, u tota tabernakela ni swilo hinkwaswo swa yona u yi hlawurisa sweswo ni mitirho hinkwayo ya yona kutani yi ta va yi hlawuriwile. ₁₀U ta tota alitari ya magandzelo ni mitirho hinkwayo ya yona; u hlawula alitari, kutani alitari yi ta va leyi kwetsimaka ngopfu. ₁₁U tota ni nkamba ni xikhato xa wona, u wu hlawula.

₁₂“Kutani u ta tshineta Aroni, ni vana va yena enyangweni ya yindlu ya nhlengeletano, u va hlantswa hi mati, ₁₃kutani u ta ambexa Aroni hi tinguvu leti hlawuriweke, u n'wi tota, u n'wi hlawula leswaku a tirha ntirho wa vuprista emahlweni ka mina. ₁₄U tshineta ni vana va yena, u va ambexa tinguvu; ₁₅u va tota kukota tata wa vona, leswaku va tirha ntirho wa vuprista emahlweni ka mina; ku totiwa ka vona ku ta va veka vaprista hi masiku etinxakeni ta vona.”

₁₆Kutani Muxe a endla hinkwaswo hilaha Yehovha a nga n'wi lerisa hakona. ₁₇Hi siku ro sungula ra n'hweti yo rhanga ya lembe ra vumbirhi, tabernakela yi yimisiwa. ₁₈Muxe a yimisa tabernakela, a veka xifunengeto ni switshamo swa mapulangi, ni timbalelo, a yimisa ni timhandze. ₁₉Kutani a fulela yindlu hi tende, a tlhandleka ehenhla ka yona xifunengeto, hilaha Yehovha a nga lerisa Muxe hakona. ₂₀Kutani a teka vumbhoni a byi nghenisa earekeni; a vehela mimpingu earekeni, kutani a veka vukhongelelo ehenhla ka areka; ₂₁a tisa areka etabernakeleni, a vamba nguvu, a sirhela areka ya vumbhoni ha yona hilaha Yehovha a nga lerisa Muxe hakona. ₂₂Kutani a nghenisa tafula etabernakeleni ya nhlengeletano, en'walungwini ka yindlu, haleno ka nguvu; ₂₃a veka ni swinkwa emahlweni ka Yehovha, a xi lunghisa etafuleni, hilaha Yehovha a nga lerisa Muxe hakona. ₂₄Kandelari, yona a yi veka endlwini ya nhlengeletano, yi lavane ni tafula, edzongeni ra tabernakela. ₂₅Kutani a veka mavoningo emahlweni ka Yehovha, hilaha Yehovha a nga lerisa Muxe hakona. ₂₆A veka alitari ya nsuku endlwini ya nhlengeletano, kusuhi ni nguvu; ₂₇a hisa mirhi ya risuna, hilaha Yehovha a nga lerisa Muxe hakona. ₂₈Kutani a hayeka nguvu enyangweni ya tabernakela. ₂₉Kutani a veka alitari ya magandzelo lama hisiwaka enyangweni ya yindlu, ya tabernakela ya nhlengeletano, a humesa magandzelo lama hisiwaka, hilaha Yehovha a nga lerisa Muxe hakona. ₃₀Kutani a veka nkamba exikarhi ka yindlu ya nhlengeletano ni alitari, a va a chela mati ka wona leswaku va hlamba kona. ₃₁Muxe, na Aroni ni vana va yena, va hlamba mavoko ni milenge. ₃₂Kakuloko va nghena endlwini ya nhlengeletano, ni loko va tshinelela alitari, va hlamba hilaha Yehovha a nga lerisa Muxe hakona. ₃₃Kutani a yimisa xivava lexi rhendzelekelaka tabernakela ni alitari, kutani a hayeka nguvu enyangweni ya xivava; hi sweswo Muxe a hetaka ntirho lowu.

₃₄Kutani papa ri funengeta Yindlu ya nhlengeletano, kutani ku kwetsima ka Yehovha ku tata Yindlu. ₃₅Swi tsandza na Muxe a hluleka ku nghena endlwini ya nhlengeletano hikuva papa a ri le henhla ka yona ni ku kwetsima ka Yehovha a ku tata Yindlu. ₃₆Kutani loko papa ri tlakuka ehenhla ka Yindlu, vana va Israele va famba; swi endlisa sweswo eku fambeni hinkwako ka vona. ₃₇Kambe loko papa ri nga tlakuki, a va nga suki ku fikela siku leri papa ri tlakukaka ha rona. ₃₈Hikuva papa ra Yehovha a ri tshama ehenhla ka tabernakela ninhlekanhi, kutani nivusiku, a ku voninga ndzilo epapeni emahlweni ka yindlu hinkwayo ya Israele, eku fambeni hinkwako ka vona.