EKSODA 35

₁Kutani Muxe a vitana nhlengeletano hinkwayo ya vana va Israele, a ku eka vona: “Hi leti timhaka leti Yehovha a mi leriseke ku ti endla: ₂Ku ta tirhiwa masiku ya ntlhanu na rin'we, kambe siku ra ntlhanu na mambirhi, ri ta va leri hlawuriweke, i Savata leyi hlawuleriweke Yehovha. Mani na mani la tirhaka ntirho hi siku lero, u ta dlawa. ₃Mi nga tshuki mi tshivela ndzilo etindlwini hinkwato ta n'wina hi siku ra Savata.”

₄Kutani Muxe a byela nhlengeletano hinkwayo ya vana va Israele, a ku: “Lexi lerisiweke hi Yehovha hi lexi: ₅Humesani swilo swa n'wina leswi mi swi nyikaka Yehovha. Munhu un'wana ni un'wana la swi rhandzaka hi mbilu, u ta tisela Yehovha ku nyika ka yena: nsuku, ni silivhere, ni koporo; ₆ni xivunguvungu, ni scarlet, ni crimson, ni ntsembyana lowo saseka, ni voya bya timbuti, ₇ni madzovo ya makhuna lama totiweke hi leswo tshwuka, ni madzovo ya maxwale, ni mirhi ya munga; ₈ni mafurha ya rivoningo, ni mirhi ya risuna ya ku endla mafurha yo tola, ni mirhi ya risuna leyo hisiwa; ₉ni maribye ya onikisi, ni maribye leyi nghenisiwaka etifukwaneni ta efodi, ni ya nguvu ya xifuva.

₁₀“Kutani vavanuna hinkwavo lavo tlhariha exikarhi ka n'wina, va ta ta, va ta tirha hinkwaswo leswi lerisiweke hi Yehovha: ₁₁Tabernakela, ni ntsonga wa yona, ni xifunengeto xa yona, ni swovetana, ni mapulangi ya yona, ni timbalelo ta yona, ni timhandze ta yona, ni switshamo swa yona; ₁₂ni areka ni mimpingu ya yona, ni vukhongelelo, ni nguvu leyi lukiweke, ₁₃ni tafula ni mimpingu ya rona, ni mitirho hinkwayo ya yona, ni vuswa bya xikombiso; ₁₄ni kandelari yo voninga, ni mitirho ya yona, ni mavoningo ya yona, ni mafurha ya ku voninga; ₁₅ni alitari ya mirhi ya risuna, ni mimpingu ya yona, ni mafurha yo tola, ni mirhi ya risuna leyo hisiwa; ni nguvu leyi lukiweke leyi nga enyangweni ya Tabernakela; ₁₆ni alitari ya magandzelo lama hisiwaka, ni roster ya koporo ni mimpingu ya yona, ni mitirho ya yona, ni nkamba ni xitshamo xa wona; ₁₇ni tinguvu ta xivava, ni timhandze ta tona, ni switshamo swa tona, ni nguvu leyi nga enyangweni ya huvo; ₁₈ni timhingu ta Tabernakela, ni timhingu ta huvo ni tingoti ta tona; ₁₉ni tinguvu ta ku tirha ntirho wa vukwetsimelo, ti nga tinguvu leti hlawuriweke ta muprista Aroni, ni tinguvu ta vana va yena ta ku tirha ntirho wa vuprista.”

₂₀Nhlengeletano hinkwayo ya vana va Israele yi suka emahlweni ka Muxe. ₂₁Kutani munhu un'wana ni un'wana la tsundzuxiweke hi mbilu ya yena, ni hinkwavo lava swi rhandzeke va tisa leswi va swi nyikaka Yehovha, ku ta tirha ntirho wa Yindlu ya nhlengeletano, ni hinkwaswo swa ntirho wa yona, ni tinguvu leti hlawuriweke. ₂₂Ku ta vavanuna ni vavasati; hinkwavo lava swi rhandzeke hi mbilu; va tisa swingwavila ni masindza ni tintlhama, ni tinxakaxaka ta mitirho ya nsuku; un'wana ni un'wana a humesa ku nyika ka yena ka nsuku loku a ku hlawuleleke Yehovha. ₂₃Un'wana ni un'wana la ngi a ri ni xivunguvungu, ni scarlet, ni crimson, ni ntsembyana lowo saseka, ni voya bya mbuti, ni madzovo ya makhuna lama totiweke hi leswo tshwuka, ni madzovo ya xwale, va swi tisa. ₂₄Un'wana ni un'wana la nga humesa nyiko ya silivhere, ni koporo, va yi tisa eka Yehovha; ni hinkwavo lava nga ni mirhi ya munga ya mitirho ya Tabernakela, va yi tisa. ₂₅Vavasati hinkwavo lavo tlhariha va luka hi mavoko ya vona, kutani va tisa lexi va xi lukeke, xivunguvungu, ni scarlet, ni crimson, ni ntsembyana lowo saseka. ₂₆Kutani vavasati hinkwavo lava tsundzuxiweke hi timbilu ta vona, va luka voya bya timbuti. ₂₇Loko ti ri tihosana ta tiko, ti tisa maribye ya onikisi ni maribye lama nghenisiwaka etifukwaneni ta efodi ni le ngubyini ya xifuva, ₂₈ni mirhi ya risuna, ni mafurha ya rivoni ni mafurha ya ku tola, ni ya mirhi ya risuna leyi hisiwaka. ₂₉Vana va Israele, ni vavasati hinkwavo lava rhandzeke ku tisa swilo swa ntirho hinkwawo lowu Yehovha a nga lerisa Muxe leswaku wu endliwa, va tisela Yehovha nhlengo hi ku rhandza ka vona.

₃₀Kutani Muxe a ku eka vana va Israele: “Vonani, Yehovha u vitanile Besalele, n'wana Uri, n'wana Huru wa rixaka ra Yuda; ₃₁u n'wi chele hi moya wa Xikwembu, ni vutlhari ni ku twisisa, ni ku tiva ku tirha mitirho hinkwayo, ₃₂ni ku thya yin'wana, ku endla mitirho ya nsuku, ni ya silivhere, ni ya koporo, ₃₃ni ku vatla maribye lama nghenisiwaka eswifukwaneni, ni ku vatla mirhi, ni ku tirha mitirho hinkwayo ya vutlhari. ₃₄Kutani u n'wi nyikile swin'we na Oholiyabu, n'wana Ahisamaki, wa rixaka ra Dani, vutlhari bya ku dyondzisa van'wana. ₃₅U va tatisele vutlhari leswaku va tirha mitirho hinkwayo ya valuki, ni vaswuri va xivunguvungu, ni scarlet ni crimson, ni ntsembyana lowo saseka, leswaku va endla mitirho hinkwayo, ni leswaku va chula yin'wana.