Ta Muxe loko a khongelela tiko ra Israele.
1Kutani Yehovha a ku eka Muxe: “Suka u famba, wena, ni tiko leri u ri humeseke eEgipta, u ya etikweni leri ndzi hlambanyeke leswaku ndzi ta ri nyika Abrahama, na Isaka, na Yakobo loko ndzi te: ‘Ndzi ta ri nyika vatukulu va vona.’ 2Ndzi ta rhuma ntsumi leyi nga ta ku rhangela emahlweni kutani ndzi ta hlongola Vakanana ni Vaamori, ni Vahiti, ni Vaperesi, ni Vahivhi, ni Vayebusi, 3ndzi mi nghenisa etikweni leri pfelelaka ntswamba ni vulombe, hikuva ndzi nga ka ndzi nga fambi exikarhi ka n'wina mi nga tiko leri tinonon'hwisaka tinhamu, ndzi nga ti tshuka ndzi mi dlaya endleleni.”
4Kuteloko tiko ri yingisile rito leri chavisaka leri, ri rila, ri tshika ku tibombisa. 5Kambe Yehovha u byerile Muxe, a ku: “U nge eka vana va Israele: ‘Mi vanhu va tinhamu leti nonon'hwaka; loko ndzi famba na n'wina ku nga ri kungani, ndzi nga mi lovisa. Kutani sweswi, susa leswi u bombaka ha swona, ndzi ta tiva leswi ndzi nga ta swi endla.’ ” 6Kavaloko vana va Israele va susa leswi va bombaka ha swona ku suka entshaveni ya Horebe.
7Kavaloko Muxe a hahlula ntsonga, a tiakela wona ehandle ka mixaxa, kule na yona, kutani a wu thya ntsonga wa nhlengeletano; kutani mani na mani la rhandzeke ku vutisa Yehovha, a ya entsongeni ya nhlengeletano lowu nga ehandle ka mixaxa. 8Kutani kakuloko Muxe a huma ku ya endlwini ya nhlengeletano, vanhu hinkwavo a va yima, un'wana ni un'wana enyangweni ya ntsonga wa yena, va languta, Muxe a ko a nghena endlwini; 9kuteloko Muxe a nghena endlwini, papa ri xika, ri yima enyangweni ya yindlu, kutani Yehovha a vulavula na Muxe. 10Vanhu hinkwavo, kakuloko va vone papa enyangweni ya yindlu va yima, va khinsama, un'wana ni un'wana enyangweni ya ntsonga wa yena. 11Yehovha a tshama a vulavula na Muxe va langutene, kukota munhu loko a vulavula ni nakulobye; kutani Muxe a tlhelela emixaxeni; kambe Yoxuwa, n'wana wa Nuni, nandza wa yena wa jaha, a a nga suki endlwini.
12Kutani Muxe a ku eka Yehovha: “Waswivo, u te eka mina: ‘Humesa tiko leri,’ kambe a ku ndzi byelanga loyi u nga ta n'wi rhuma a famba na mina Kambe u vurile, u ku: ‘Ndza ku tiva hi vito ra wena, u vonile tintswalo ta mina.’ 13Sweswi, loko kunene ndzi vonile tintswalo ta wena, ndzi kombise tindlela ta wena, ndzi ta ku tiva, ndzi vona tintswalo ta wena! Kambe anakanya leswaku tiko leri i tiko ra wena.” 14Yehovha a ku: “Mombo wa mina wu ta famba, kutani ndzi ta ku wisisa.” 15Kutani Muxe a ku: “Loko mombo wa wena wu nga fambi na hina, hi nga ka hi nga suki kwala. 16Swi ta tiviwa ha yini leswaku ndzi vonile tintswalo ta wena, mina ni tiko ra wena? Xana a hi loko u famba na hina? Hi sweswo hi nga ta hlawuriwa, mina ni tiko ra wena eka matiko hinkwawo lama nga emisaveni.” 17Kutani Yehovha a ku eka Muxe: “Ndzi ta endla lexi u xi vulaka, hikuva u kumile tintswalo eka mina, kambe ndzi ku tivile hi vito ra wena.”
18Kutani Muxe a ku: “Wa nga ndzi komba ku vonakala ka wena.” 19Kutani Yehovha a ku: “Ndzi ta hundzisa vunene hinkwabyo bya mina emahlweni ka wena; ndzi vula vito ra Yehovha emahlweni ka wena, ndzi ta tsetselela loyi ndzi n'wi rhandzaka, ndzi n'wi endla hi tintswalo loyi ndzi n'wi rhandzaka.” 20A engeta a ku: “U nga ka u nga voni mombo wa mina; hikuva a ku na munhu la nga ndzi vonaka a va a hanya.” 21Yehovha a engeta a ku: “Waswivo, ku ni xivandla ekusuhi na mina; u ta yima eribyeni; 22kutakuloko ku kwetsima ka mina ku hundza, ndzi ta ku nghenisa ebakweni ra ribye, ndzi ku funengeta hi voko ra mina, ndzi ko ndzi khaluta; 23hi kona ndzi nga ta susa voko ra mina, kutani u ta ndzi vona hi mafulara, kambe mombo wa mina a wu voniwi.”
