EKSODA 24

₁Xikwembu xi ku eka Muxe: “Tlhandlukela eka Yehovha, wena na Aroni, na Nadabu, na Abihu, ni vakulukumba va Israele va ntlhanu wa makume ni makume mambirhi, mi ta khinsama ma ha ri ekule. ₂Ku ta tshinela Muxe a le swakwe emahlweni ka Yehovha; van'wana va nga tshuki va tshinela; na rona tiko ri nga tshuki ri tlhandluka na yena.”

₃Kwalaho Muxe a ya byela vanhu timhaka hinkwato ta Yehovha, ni ku lerisa hinkwako. Kutani tiko ri hlamula hi rito rin'we, ri ku: “Timhaka hinkwato leti vuriweke hi Yehovha hi ta ti endla.” ₄Muxe a tala marito hinkwawo ya Yehovha, kutani a pfuka nimpundzu, a aka alitari ehansi ka ntshava, a yimisa maribye ya khume na mambirhi, ku ringanisa tinyimba ta Israele ta khume na timbirhi. ₅Kutani a rhuma majaha ya vana va Israele ku endla magandzelo lama hisiwaka, ni magandzelo ya ku khensa Yehovha hi tinkunzi. ₆Kutani Muxe a hungula ngati yin'wana, a chela emikambaneni; yin'wana a yi halata ealitarini. ₇A teka ni buku ya ntwanano, a hlaya emahlweni ka tiko; kutani tiko ri ku: “Hinkwaswo leswi Yehovha a swi vuleke hi ta swi yingisa, hi va hi swi endla.” ₈Kavaloko Muxe a teka ngati, a xuva tiko ha yona, a ku: “Hi yona ngati ya ntwanano lowu Yehovha a wu endleke na n'wina hi marito lawa hinkwawo.”

₉Kutani Muxe na Aroni, na Nadabu na Abihu, ni vakulukumba va Israele va ntlhanu wa makume ni makume mambirhi, va tlhandluka, va vona Xikwembu xa Israele; ₁₀va vona ehansi ka milenge ya xona wo nge ntirho wa safiri leyi vangamaka, leyi tengeke kukota rona tilo. ₁₁Kutani a xi tlakusangi voko ehenhla ka vana va Israele lava hlawuriweke; kambe va vona Xikwembu, kutani va dya, va nwa.

₁₂Kutani Yehovha a ku eka Muxe: “Tlhandlukela halenu entshaveni u yima kona, ndzi ta ku nyika maribye ya swimphampha lama nga ni milawu ni ku lerisa ka mina loku ndzi ku tsaleke ku va dyondzisa hakona.” ₁₃Kavaloko Muxe a suka, a ri na Yoxuwa la n'wi tirhelaka; kutani Muxe a tlhandlukela entshaveni ya Xikwembu. ₁₄A ku eka vakulukumba: “Yimani kwala, hi ta tlhela hi vuya. Aroni na Huru va ta sala na n'wina; un'wana ni un'wana la nga ni mhaka u ta yi tisa eka vona.”

₁₅Muxe a tlhandluka entshaveni, kutani papa ri funengeta ntshava. ₁₆Kutani ku kwetsima ka Yehovha ku tshama entshaveni ya Sinayi; papa ri yi funengeta hi masiku ya ntlhanu na rin'we; hi siku ra ntlhanu na mambirhi a vita Muxe a ri epapeni. ₁₇Kutani xikombiso xa ku kwetsima ka Yehovha enhlohlorhini ya ntshava emahlweni ya vana va Israele a xi fana ni ndzilo lowu dlayaka. ₁₈Kutani Muxe a nghena epapeni, a khandziya entshaveni a tshama kona hi masiku ya mune wa makume, nhlekanhi ni vusiku.