Ta ku velekiwa ka Muxe.
1Kavaloko wanuna wa yindlu ya Levhi a ya teka wanhwana wa rixaka ra Levhi. 2Nsati loyi loko a tikile, a veleka n'wana wa wanuna; kuteloko a vona leswaku i xihlangi xo saseka, a xi fihla hi tin'hweti tinharhu. 3Kambe leswi a tsandzekaka ku engeta a xi fihla, a ya teka xirhundzu xa tinhlanga, a xi tota hi ntita ni nhlaka, kutani a nghenisa xihlangi eka xona, a xi veka exikarhi ka tinhlanga eribuwini ra nambu. 4Kambe makwavo wa xihlangi, wa wanhwana, a yima ekulenyana ku languta lexi nga ta n'wi humelela.
5Kutani n'wana Faro, wa wanhwana, a ngirimela enambyeni ku ya hlamba; vanhwanyana va yena a va fambafamba eribuwini ra nambu, kuteloko a vonile ngula exikarhi ka nhlanga, a rhuma nandza wa yena ku ya yi teka. 6Kuteloko a yi funungurile, a vona n'wana wa wanuna a ri karhi a rila. A n'wi twela vusiwana, a ku: “I n'wana wa Vaheveru.”
7Kambe makwavo wa xihlangi a ku eka n'wana wa Faro: “Xana ndzi nga ya ndzi ku vitanela muan'wisi exikarhi ka vavasati va Vaheveru, a ta ku an'wisela xihlangi-ke?”
8N'wana Faro a ku eka yena: “Yana.” Kutani wanhwana a suka, a ya vitana mana wa n'wana. 9N'wana Faro a ku eka yena: “Teka xihlangi lexi, u ndzi an'wisela xona; ndzi ta ku hakela.” Kutani wansati a teka xihlangi, a ya xi an'wisa. 10Kuteloko n'wana a kurile, a n'wi yisa eka n'wana Faro, yena a n'wi endla n'wana wa yena, a n'wi thya vito ra Muxe (hileswaku la humesiweke ematini), a ku: “Hikuva ndzi n'wi humesile ematini.”
Ta Muxe loko a dlaya Muegipta, a balekela etikweni ra Midiyani.
11Emikarhini yoleyo, kuteloko Muxe a kurile, a endza eka varikwavo, a ta vona ntirho wo tika wa vona; kutani a vona wanuna wa Muegipta a ba wanuna wa rikwavo, wa Muheveru. 12A languta hala ni hala, kutani leswi ku nga vonakiki munhu, a dlaya Muegipta, a n'wi lahla esaveni. 13Siku leri tlhandlamaka a huma kambe, a vona vavanuna vambirhi va Vaheveru va karhi va lwa; a ku eka loyi a nga ni nandzu: “U n'wi bela yini warikwenu xana?”
14Yena a ku: “I mani la ku vekeke hosi ni muavanyisi wa hina xana? Xana u rhandza ku ndzi dlaya tani hi leswi u nga dlaya Muegipta?” Muxe a tshuka, a ku: “Kunene mhaka leyi yi twakarile.” 15Kambe Faro loko a twa mhaka leyi, a lava Muxe ku n'wi dlaya. Kambe Muxe a balekela Faro, a ya fika etikweni ra Midiyani, a tshamisa exihlobyeni.
16Muprista wa Midiyani a a ri ni vana va vanhwanyana va ntlhanu na vambirhi, kutani va ta eku keni ka mati, va tata switsengele ku nwisa mitlhambi ya tata wa vona. 17Kambe varisi va fika va va hlongola; kambe Muxe a suka a yima, a va lamulela, a nwisa mitlhambi ya vona. 18Kuteloko va tlhelele ekaya, eka Rhuwele, tata wa vona, a ku: “Mi hatlisile ha yini ku vuya namuntlha xana?”
19Va ku: “Muegipta u hi lamulele eka varisi, a hi kelelela mati layo tala; a nwisa mitlhambi ya hina.”
20A ku eka vana va yena: “Wanuna loyi u kwihi, mi n'wi siyele yini? N'wi viteni, a ta dya swakudya.”
21Kutani Muxe a pfumela ku aka ni munhu loyi, kutani a teka Sipora, n'wana wa yena. 22Kutani Sipora a veleka n'wana wa wanuna; Muxe a n'wi thya vito ra Gerixomu (muluveri), hikuva a ku: “Ndzi muluveri etikweni ra van'wana.”
23Kuteloko malembe layo tala ma hundzile, hosi ya Egipta yi fa. Loko va ri vana va Israele, a va ri karhi va rila hikwalaho ka vukhumbi bya vona; va huwelela, kutani ku huwelela ka vona hikwalaho ka vukhumbi bya vona ku fika eka Xikwembu. 24Xikwembu xi yingisa ku rila ka vona, xi tsundzuka ntwanano wa xona na Abrahama, na Isaka, na Yakobo; 25kutani Xikwembu xi languta vana va Israele, xi va tiva.
