ESTERE 6

₁Hi vusiku byolebyo, hosi a yi nga kumi vurhongo; kutani yi ku, ku tisiwa buku ya switsundzuxo, ya timhaka ta ku fuma, yi va yi hlayiwa emahlweni ka hosi. ₂Ku kumiwa ku tsariwe hilaha Mordekayi ingi a tivisile timhaka ta Bigitana na Terexi tindhuna letimbirhi ta hosi va nga valanguteri va nyangwa, ta leswi va nga lava ku khoma hosi Ahasuwerusi. ₃Hosi yi ku: “Ku dzuna ni ku khensa hi loku yini leswi Mordekayi a swi endleriweke enkarhini wolowo?” Malandza lawa ma tirhelaka hosi, ma ku: “A nga endleriwangi nchumu.” ₄Hosi yi ku: “I mani la nga ehandle?” Kutani Hamani a a fikile exivandleni lexi nga exikarhi ka yindlu ya hosi, a tele ku ta kombela eka hosi leswaku ku hayekiwa Mordekayi emhandzeni leyi a n'wi lunghiseleke yona. ₅Malandza ya hosi ma ku eka yona: “Hamani hi loyi, u yime erivaleni.” Hosi yi ku: “A a nghene.” ₆Hilaha Hamani a nghenaka, kutani hosi yi ku eka yena: “Ku ta endliwa yini eka munhu loyi hosi yi rhandzaka ku n'wi tsakisa xana?” Hamani a ku embilwini ya yena: “Hosi yi nga rhandza ku tsakisa mani loko ndzi nga ri mina xana? ₇Kutani Hamani a ku eka hosi: Loko a ri munhu loyi hosi yi rhandzaka ku n'wi tsakisa, ₈a ku tisiwe xifunengelo xa vuhosi lexi funengelaka hi hosi, ni hanci leyi khandziyaka hi hosi, ni harhi ya vuhosi leyi vekeriwaka enhlokweni ya yona, ₉xifunengelo ni hanci swi vekiwa emavokweni ya ndhuna yin'wana ya hosi ya letikulu; ku funengetiwa munhu loyi hosi yi rhandzaka ku n'wi tsakisa, kutani a fambisiwa hi hanci entsendzeleni wa muti, kutani ku huweleriwa emahlweni ka yena, va ku: ‘Ku endliwa sweswo eka munhu loyi hosi yi rhandzaka ku n'wi tsakisa!’ ” ₁₀Kutani hosi yi ku eka Hamani: “Hatlisa u teka xifunengelo ni hanci, hilaha u nga vula hakona, kutani u endla sweswo eka Mordekayi, Muyuda la tshamaka emahlweni ka nyangwa ya hosi; u nga tshiki mhaka ni yin'we ya hinkwaswo leswi u swi vuleke.” ₁₁Kutani Hamani a teka xifunengelo ni hanci, a funengeta Mordekayi, kutani a n'wi fambisa hi hanci entsendzeleni wa muti, a ri karhi a huwelela emahlweni ka yena, a ku: “Ku endliwa sweswo eka munhu loyi hosi yi rhandzaka ku n'wi tsakisa.”

₁₂Kutani Mordekayi a vuya a tlhelela enyangweni ya hosi, Hamani, yena, a hatlisa a tiyela ekaya, a ri ku vavisekeni, a tifunengete nhloko. ₁₃Hamani a rungulela Zerexa, nsati wa yena, ni maxaka hinkwawo ya yena, hinkwaswo leswi n'wi humeleleke. Tintlhari ta yena, ni nsati wa yena Zerexa, va ku eka yena: “Leswi Mordekayi yeloyi u sunguleke ku wa emahlweni ka yena, a ri wa rixaka ra Vayuda, u nga ka u nga n'wi hluli, kambe hakunene u ta wa emahlweni ka yena.” ₁₄Va ku va ha vulavula, ku fika tindhuna ta hosi, ti hatlisa ti yisa Hamani eswakudyeni leswi endliweke hi Estere.