Yehovha u ta gandzeriwa exivandleni lexi a nga ta xi hlawula.
1“Hi yona milawu ni ku lerisa leswi mi nga ta swi hlayisa etikweni leri Yehovha, Xikwembu xa vatata wa n'wina, xi mi nyikaka ku ri fuma hi masiku hinkwawo lawa mi nga ta hanya emisaveni.
2“Mi ta herisa kunene swivandla hinkwaswo leswi matiko lawa mi nga ta teka tiko ra wona, ma gandzeleke swikwembu swa wona eka swona, etintshaveni leti tlakukeke, ni le switsungeni, ni le hansi ka murhi wun'wana ni wun'wana lowu hlukeke; 3mi ta hlanhla magandzelo ya vona, mi faya swifaniso swa vona, mi hisa swifaniso swa vona swa Axera, mi mbundzuxa swifaniso leswi vatliweke swa swikwembu swa vona, mi va mi herisa vito ra swona exivandleni xexo.
4“Mi nga ka mi nga endlisi sweswo eka Yehovha, Xikwembu xa n'wina, 5kambe xivandla lexi Yehovha, Xikwembu xa n'wina, a nga ta hlawula exikarhi ka tinxaka hinkwato ta n'wina ku veka kona vito ra yena, hi xona xivandla xa yindlu ya yena; mi ta n'wi lavisisa kona, mi va mi ya kona. 6Mi ta tisa kona tiholokosta ta n'wina, ni magandzelo ya n'wina, ni swa vukhume bya n'wina, ni leswi mavoko ya n'wina ma nga ta swi pambula, ni magandzelo ya n'wina ya ku tiboha hi ku hlambanya, ni magandzelo ya ku tirhandzela ka n'wina, ni mativula ya swifuwo leswikulu ni leswitsongo swa n'wina. 7Mi ta dya kona emahlweni ka Yehovha, Xikwembu xa n'wina, mi titsakela, mi ri ni mindyangu ya n'wina, eswilweni hinkwaswo leswi mi nga ta swi endla, leswi Yehovha, Xikwembu xa wena, a ku katekiseke ha swona.
8“Un'wana ni un'wana a nga tshuki a endla leswi a swi ringanisaka swo lulama, hilaha hi swi endlaka namuntlha kwala. 9Hikuva, ku fika sweswi, a mi nghenanga eku wiseni, ni le ndzhakeni leyi Yehovha, Xikwembu xa wena, a ku nyikaka yona. 10Mi ta pela Yordani, kutani mi ta aka etikweni leri Yehovha, Xikwembu xa n'wina, a nga ta mi dyisa ndzhaka ya rona; a ta mi nyika ku wisa, mi nga karhatiwi hi valala hinkwavo lava mi rhendzelaka, kutani mi ta aka, mi nga chavi nchumu. 11Exivandleni, lexi Yehovha, Xikwembu xa n'wina, a nga ta hlawula ku ta akisa kona vito ra yena, hi kona mi nga ta tisa hinkwaswo leswi ndzi mi lerisaka swona, tiholokosta ta n'wina, ni magandzelo ya n'wina, ni swa vukhume bya n'wina, ni leswi mavoko ya n'wina ma swi pambuleke, ni mihlengo ya n'wina ya leswo saseka leyi mi nga ta yi tisa eka Yehovha ku tiyisa leswi mi tiboheke hi ku hlambanya ku swi endla. 12Mi ta titsakela emahlweni ka Yehovha, n'wina ni vana va n'wina va xinuna ni va xisati, ni malandza ya n'wina ya xinuna ni ya xisati, ni Mulevhi la nga emitini ya n'wina, hikuva a nga nyikiwanga ku averiwa ni ndzhaka swin'we na n'wina.
13“Chava ku humesa tiholokosta ta wena eswivandleni hinkwaswo leswi u nga ta swi vona. 14Kambe u ta humesa tiholokosta ta wena exivandleni lexi Yehovha a nga ta xi hlawula erixakeni rin'wana ra wena, hi kona laha u nga ta humesa tiholokosta ta wena kona; u ta endla kona hinkwaswo leswi ndzi ku leriseke swona.
15“Kambe kungakuloko u swi rhandza, u ta tiva ku tlhava swifuwo ni ku dya nyama emitini hinkwayo ya wena hilaha Yehovha, Xikwembu xa wena, a nga ta ku katekisa hakona; la nga tengangiki ni la tengeke va ta dya kukotisa loko va dya mhunti ni nhlangu. 16Ntsena mi nga tshuki mi dya ngati; mi ta yi halata ehansi kukotisa mati.
17“U nga ka u nga dyi emindyangwini ya wena swa vukhume bya mavele ya wena, ni bya vhinyo ya wena, ni bya mafurha ya wena, hambi ma ri mativula ya tihomu ta wena ni ya timbuti ta wena, ni loko xi ri xilo lexi u nga ta xi humesa loko u hlambanyile, hambi yi ri mihlengo ya ku tirhandzela ka wena, hambi xi ri lexi voko ra wena ri xi pambuleke. 18U ta dya swilo leswi emahlweni ka Yehovha, Xikwembu xa wena, exivandleni lexi Yehovha, Xikwembu xa wena, a nga ta xi hlawula, u ta dya u ri ni vana va wena va xinuna ni va xisati, ni malandza ya wena ya xinuna ni ya xisati, ni Valevhi lava nga emitini ya wena; u ta titsakela emahlweni ka Yehovha, Xikwembu xa wena, emitirhweni hinkwayo ya mavoko ya wena. 19Tilangutele leswaku u nga rivali Mulevhi hi masiku hinkwawo lawa u nga ta hanya emisaveni.
20“Kutakuloko Yehovha, Xikwembu xa wena, a anamisile mindzilekana ya wena, hilaha a nga ku byela hakona, kutani kungakuloko u rhandza ku dya nyama, u ta ku: ‘Mbilu yanga yi navela ku dya nyama,’ u ta tiva ku dya nyama mikarhi hinkwayo leyi u yi rhandzaka. 21Kungakuloko xivandla lexi Yehovha Xikwembu xa wena, a nga ta xi hlawula ku veka vito ra yena kona, xi le kule na wena, u ta titlhavela tihomu ni timbuti leti Yehovha a ku nyikeke tona, hilaha ndzi ku leriseke hakona kutani u ta dya emindyangwini ya wena hilaha u nga ta swi rhandza hakona. 22Kambe u ta swi dya kukotisa mhunti ni nhlangu; la nga tengangiki ni la tengeke va ta dya havambirhi. 23Ntsena tiya, u chava ku dya ngati, hikuva ngati i vutomi, kutani u nga ka u nga dyi vutomi swin'we ni nyama. 24U nga tshuki u yi dya; u ta yi halatela ehansi kukotisa mati. 25U nga tshuki u dya yona, leswaku u tsaka u ri wena ni vana va wena endzhaku ka wena loko u ta endla leswo lulama emahlweni ka Yehovha.
26“Kambe loko swi ri swilo leswi u swi hlawuleke, ni leswi u nga ta swi humesa hi ku hlambanya, u ta swi teka, u ya na swona exivandleni lexi Yehovha a nga ta xi hlawula; 27kutani u ta humesa tiholokosta ta wena, yi ri nyama ni ngati; loko ma ri magandzelo man'wana ya wena, ngati yi ta cheriwa ealitarini ya Yehovha, Xikwembu xa wena, kutani u ta dya nyama ya wona. 28Tilangutele, u yingisa timhaka hinkwato leti ndzi ku lerisaka tona leswaku u tsaka, ni vana va wena endzhaku ka wena, hilaha ku nga yiki helo, hikuva u ta va u endlile leswinene ni leswi lulameke emahlweni ka Yehovha, Xikwembu xa wena.
29“Kutakuloko Yehovha, Xikwembu xa wena, a susile emahlweni ka wena matiko lawa u nga ta ma hlongola ni loko u tekile tiko ra wona, u akile kona, 30chava ku phasiwa entlhan'wini hi ku landza mitila ya wona (loko kutani ma herisiwile emahlweni ka wena) ni ku lava swikwembu swa wona, hilaha u nga ta ku: ‘Xana matiko lawa ma tirhelisa ku yini swikwembu swa wona xana? Ndzi ta endla kukotisa wona, na mina.’ 31U nga tshuki u endlela Yehovha, Xikwembu xa wena hi sweswo: hikuva va endlela swikwembu swa vona hinkwaswo leswi yilaka emahlweni ka Yehovha ni leswi a swi vengaka, hikuva hambi va ri vana va vona va varisanyana ni va vanhwanyana, va va hisela swikwembu swa vona endzilweni.
32“Timhaka hinkwato leti ndzi mi lerisaka tona, mi ta ti hlayisa mi endla ha tona; u nga tshuki u ti engetela hi nchumu, kambe u nga tshuki u hunguta nchumu eka tona.
