AMOSI 2

₁Yehovha u ri: “Hikwalaho ka milandzu minharhu kumbe ya mune ya Mowabu — ndzi nga ka ndzi nga hundzuki, hikuva va hisile marhambu ya hosi ya Edomu, va ma endle nkuma; ₂ndzi ta hoxa ndzilo le Mowabu, wu ta hisa tindlu ta vukosi ta Keriyoto, kutani Mowabu u ta lova edzolongeni rero exikarhi ka nkosi ni ku pfuma ka mhalamhala. ₃Kutani ndzi ta lovisa muavanyisi exikarhi ka yena, tihosi ta yena ndzi ti herisa swin'we na yena,” ku vula Yehovha.

₄Yehovha u ri: “Hikwalaho ka milandzu, minharhu kumbe ya mune ya Yuda — ndzi nga ka ndzi nga hundzuki, hikuva va sorile nawu wa Yehovha, a va hlayisanga ku lerisa ka yena, va hambuxiwa hi mavunwa ya vona lawa vakokwa wa vona va nga famba ha wona, ₅ndzi ta hoxa ndzilo eYuda, wu ta hisa tindlu ta vukosi ta Yerusalema.”

₆Yehovha u ri: “Hikwalaho ka milandzu minharhu, kumbe ya mune ya Israele — ndzi nga ka ndzi nga hundzuki, hikuva va xave mali hi la lulameke, va xave tintanghu hi xisiwana, ₇va navela ku vona ntshuri wa misava ehenhla ka nhloko ya xisiwana kutani va gombonyokisa timhaka ta lava nga ekhombyeni; munhu ni tata wa yena va nghenela nsati a ri un'we ku sandzisa vito ra mina leri hlawuriweke, ₈kutani va etlela etingubyini leti tekiweke hikwalaho ka nandzu emahlweni ka tialitari hinkwato, va nwa vhinyo ya miriho endlwini ya swikwembu swa vona.

₉“Kasi hi mina la heriseke Vaamori emahlweni ka n'wina, valavo ku leha ka vona a ku fana ni ku leha ka tikedari, va ri ni matimba ku fana ni tieike, ndzi heta mihandzu ya vona ehenhla, ni timitsu ta vona ehansi. ₁₀Kambe hi mina ndzi nga mi humesa etikweni ra Egipta, ndzi mi fambisa emananga hi malembe ya mune wa makume mi ta fuma tiko ra Vaamori. ₁₁Kutani ndzi pfuxile vaprofeta exikarhi ka vana va n'wina, ni le xikarhi ka majaha ya n'wina ndzi pfuxa Vanaziri. A swi tano xana, vana va Israele?” ku vula Yehovha. ₁₂“Kambe mi nwisile Vanaziri vhinyo; loko va ri vaprofeta, mi va lerisile, mi ku: ‘Mi nga tshuki mi profeta.’

₁₃“Vonani, ndzi ta mi phyandlasa kukotisa golonyi leyi teleke tinyandza. ₁₄Wa matsamba, u ta tsandzeka ku tsutsuma, wa matimba a nga ka a nga tiyisi hi matimba ya yena; ni xihontlovila, xi nga ka xi nga hlayisi vutomi bya xona. ₁₅Loyi a tameleke vurha a nga ka a nga tihanyisi, ni la khandziyaka hanci a nga ka a nga ponisi ku hanya ka yena; ₁₆hambi a ri la tiyeke exikarhi ka tinhenha, u ta tsutsuma a hluvurile hi siku rero,” ku vula Yehovha.